ബെംഗളൂരു: ദൊഡ്ബല്ലാപുര താലൂക്കിലെ നാഗദേവനഹള്ളിലുള്ള സർവകലാശാലാ ഹോസ്റ്റൽ കെട്ടിടത്തിന്റെ ആറാം നിലയിൽ നിന്ന് ചാടി ഇരുപതുകാരിയായ ബി.ടെക് വിദ്യാർത്ഥിനി ജീവനൊടുക്കി. ആന്ധ്രാപ്രദേശ് സ്വദേശിനിയായ വർഷിനി വി (20) ആണ് ദാരുണമായി മരിച്ചത്. ജിതാം (GITAM) യൂണിവേഴ്സിറ്റിയിലെ മൂന്നാം വർഷ കമ്പ്യൂട്ടർ സയൻസ് ആൻഡ് എൻജിനീയറിങ് വിദ്യാർത്ഥിനിയായിരുന്നു വർഷിനി. സർവകലാശാലാ കാമ്പസിലെ ഹോസ്റ്റലിൽ താമസിച്ചാണ് അവൾ പഠനം നടത്തിയിരുന്നത്.
കഴിഞ്ഞ വ്യാഴാഴ്ച രാത്രി 8.30-ഓടെയായിരുന്നു സംഭവം. ഹോസ്റ്റൽ കെട്ടിടത്തിന്റെ ആറാം നിലയിലെ ഇടനാഴിയിൽ നിന്ന് വർഷിനി താഴേക്ക് ചാടുകയായിരുന്നുവെന്നും ഗുരുതരമായി പരിക്കേറ്റ അവൾ സംഭവസ്ഥലത്തുതന്നെ മരിച്ചതായും പോലീസ് വ്യക്തമാക്കി. സംഭവസ്ഥലത്ത് നിന്ന് ആത്മഹത്യാ കുറിപ്പുകളൊന്നും കണ്ടെടുത്തിട്ടില്ല. സി.സി.ടി.വി ദൃശ്യങ്ങൾ പരിശോധിച്ചതിൽ വർഷിനി സ്വയം താഴേക്ക് ചാടുന്ന ദൃശ്യങ്ങൾ വ്യക്തമാണെന്നും ഇതിൽ ദുരൂഹതയൊന്നുമില്ലെന്ന് പ്രഥമിക അന്വേഷണത്തിൽ വ്യക്തമായതായും മുതിർന്ന പോലീസ് ഉദ്യോഗസ്ഥൻ പറഞ്ഞു. കൂടാതെ, വിദ്യാർത്ഥിനിയുടെ മൊബൈൽ ഫോണും പോലീസ് പരിശോധിച്ചുവരികയാണ്. ഏതെങ്കിലും തരത്തിലുള്ള മാനസിക വിഷമങ്ങളോ വിഷാദമോ അവൾ അനുഭവിച്ചിരുന്നോ എന്നതിനെക്കുറിച്ചും അന്വേഷണം നടക്കുന്നുണ്ട്.
അതേസമയം, സംഭവമറിഞ്ഞ് വെള്ളിയാഴ്ചയോടെ ബെംഗളൂരുവിൽ എത്തിയ വർഷിനിയുടെ കുടുംബാംഗങ്ങൾ സർവകലാശാലാ മാനേജ്‌മെന്റിനെതിരെ ഗുരുതരമായ ആരോപണങ്ങളുമായി രംഗത്തെത്തി. വിദ്യാർത്ഥികൾ അപകടത്തിൽപ്പെടുകയോ താഴേക്ക് ചാടുകയോ ചെയ്യുന്നത് തടയാൻ ഹോസ്റ്റൽ ഇടനാഴികളിൽ ആവശ്യമായ സുരക്ഷാ മുൻകരുതുകളോ ഇരുമ്പ് ഗ്രില്ലുകളോ സ്ഥാപിച്ചിട്ടില്ലെന്ന് കുടുംബം ആരോപിച്ചു. ഇടനാഴിയിൽ സുരക്ഷാ വലയോ ഗ്രില്ലുകളോ ഇല്ലാത്തതാണ് വർഷിനിക്ക് ആറാം നിലയിൽ നിന്ന് എളുപ്പത്തിൽ താഴേക്ക് ചാടാൻ സാഹചര്യമൊരുക്കിയതെന്നും ബന്ധുക്കൾ കുറ്റപ്പെടുത്തി. കുടുംബത്തിന്റെ പരാതിയുടെ അടിസ്ഥാനത്തിൽ ദൊഡ്ബല്ലാപുര റൂറൽ പോലീസ് സ്റ്റേഷനിൽ അശ്രദ്ധമൂലമുള്ള മരണത്തിന് കാരണമായതിന് സെക്ഷൻ 106 പ്രകാരം കേസെടുത്ത് അന്വേഷണം ആരംഭിച്ചിട്ടുണ്ട്.
