ബെംഗളൂരു: കർണാടകയുടെ പുതിയ മുഖ്യമന്ത്രിയായി ഡി.കെ. ശിവകുമാർ ഇന്ന് (ജൂൺ 3) സത്യപ്രതിജ്ഞ ചെയ്ത് അധികാരമേൽക്കുന്ന പശ്ചാത്തലത്തിൽ, ബാംഗ്ലൂരിലെ വിധാൻ സൗധ ഉൾപ്പെടെയുള്ള പ്രധാന സർക്കാർ ഓഫീസുകൾക്ക് പകുതി ദിവസം അവധി പ്രഖ്യാപിച്ചു. കടുത്ത സുരക്ഷാ ക്രമീകരണങ്ങൾ ഉറപ്പാക്കുന്നതിനും നഗരത്തിലെ ഗതാഗത നിയന്ത്രണം സുഗമമാക്കുന്നതിനും വേണ്ടിയാണ് ഈ മുൻകരുതൽ നടപടിയെന്ന് സിബ്ബന്ദി ഭരണപരിഷ്കാര വകുപ്പ് (DPAR) പുറപ്പെടുവിച്ച ഔദ്യോഗിക ഉത്തരവിൽ വ്യക്തമാക്കുന്നു.
വിധാൻ സൗധ, വികാസ് സൗധ, ബഹുനില കെട്ടിടങ്ങൾ (എം.എസ് ബിൽഡിംഗ്) എന്നിവടങ്ങളിൽ പ്രവർത്തിക്കുന്ന സർക്കാർ ഓഫീസുകൾക്കാണ് നാളെ ഉച്ചയ്ക്ക് ശേഷം അവധി ബാധകമാക്കിയിരിക്കുന്നത്. നാളെ വൈകുന്നേരം 4:05-ന് കർണാടക നിയമസഭാ സമുച്ചയത്തിലാണ് സത്യപ്രതിജ്ഞാ ചടങ്ങുകൾ നടക്കുക. വിപുലമായ ജനപങ്കാളിത്തവും പ്രമുഖ നേതാക്കളുടെ സാന്നിധ്യവും പ്രതീക്ഷിക്കുന്നതിനാൽ വിധാൻ സൗധയും പരിസരപ്രദേശങ്ങളും കടുത്ത സുരക്ഷാ വലയത്തിലായിരിക്കും. നാളെ നഗരത്തിൽ ഏർപ്പെടുത്തിയിട്ടുള്ള ഗതാഗത നിയന്ത്രണങ്ങളും ബദൽ റൂട്ടുകളും സംബന്ധിച്ച് ബെംഗളൂരു ട്രാഫിക് പോലീസ് ഇതിനകം തന്നെ യാത്രാക്കാർക്കായി നിർദ്ദേശങ്ങൾ പുറപ്പെടുവിച്ചിട്ടുണ്ട്.
കഴിഞ്ഞ ആഴ്ച മുഖ്യമന്ത്രി സ്ഥാനം രാജിവച്ച സിദ്ധരാമയ്യയുടെ പിൻഗാമിയായാണ് ഡി.കെ. ശിവകുമാർ കർണാടകയുടെ അമരത്തേക്ക് എത്തുന്നത്. പാർട്ടി ഹൈക്കമാൻഡുമായി ചേർന്ന് പുതിയ മന്ത്രിസഭയിലെ അംഗങ്ങളെയും വകുപ്പുകളെയും നിശ്ചയിക്കുന്നതിനുള്ള തിരക്കിട്ട ചർച്ചകൾ ഡൽഹിയിൽ പൂർത്തിയായി വരികയാണ്. ഡി.കെ. ശിവകുമാറും സിദ്ധരാമയ്യയും ഉൾപ്പെടെയുള്ള മുതിർന്ന കോൺഗ്രസ് നേതാക്കൾ ഡൽഹിയിൽ ക്യാമ്പ് ചെയ്ത് എഐസിസി അധ്യക്ഷൻ മല്ലികാർജുൻ ഖാർഗെയുമായി അവസാനവട്ട കൂടിക്കാഴ്ചകൾ നടത്തിയിരുന്നു.
പുതിയ മന്ത്രിസഭാ രൂപീകരണവുമായി ബന്ധപ്പെട്ട അന്തിമ പട്ടിക തയ്യാറാക്കിക്കഴിഞ്ഞതായും സത്യപ്രതിജ്ഞാ ചടങ്ങിന് തൊട്ടുപിന്നാലെ പുതിയ മന്ത്രിമാരും ചുമതലയേൽക്കുമെന്നുമാണ് പാർട്ടി വൃത്തങ്ങൾ നൽകുന്ന സൂചന. ഗതാഗതക്കുരുക്കും പൊതുജനങ്ങൾക്കുള്ള ബുദ്ധിമുട്ടുകളും ഒഴിവാക്കാൻ ലളിതമായ രീതിയിലായിരിക്കും ചടങ്ങുകൾ സംഘടിപ്പിക്കുക എന്ന് ഡി.കെ. ശിവകുമാർ അറിയിച്ചിട്ടുണ്ട്. പുതിയ സർക്കാരിന്റെ സത്യപ്രതിജ്ഞയെയും രാഷ്ട്രീയ മാറ്റങ്ങളെയും ഏറെ ആകാംഷയോടെയാണ് രാജ്യം ഉറ്റുനോക്കുന്നത്.
ബെംഗളൂരുവാർത്തയുടെ ആൻഡ്രോയ്ഡ് ആപ്ലിക്കേഷൻ ഇപ്പോൾ ഗൂഗിൾ പ്ലേസ്റ്റോറിൽ ലഭ്യമാണ്, പോർട്ടലിൽ പ്രസിദ്ധീകരിക്കുന്ന വാർത്തകൾ വേഗത്തിൽ അറിയാൻ മൊബൈൽ ആപ്പ് ഇൻസ്റ്റാൾ ചെയ്യുക. If you cannot read Malayalam,Download BengaluruVartha Android app from Google play store and Click On the News Reader Button. [masterslider id="10"]
