ബെംഗളൂരു : യുദ്ധം നടക്കുന്ന ഇറാനിൽ കുടുങ്ങിയ കർണാടക സ്വദേശികളായ 16 പേരെ തിരിച്ചെത്തിച്ചു. കേന്ദ്രസർക്കാർ നടപടിയെത്തുടർന്ന് കഴിഞ്ഞദിവസം ഡൽഹിയിൽ എത്തിയ ഇവർ അവിടെനിന്ന് ബെംഗളൂരുവിൽ എത്തുകയായിരുന്നു.
ചിക്കബല്ലാപുര ജില്ലയിലെ അലിപുർ ഗ്രാമത്തിൽനിന്നുള്ളവരാണ് എല്ലാവരും. ഈ ഗ്രാമനിവാസികളായ എൺപതോളം പേർ ഇറാനിൽ കുടുങ്ങിയിട്ടുണ്ട്. ഇവരെയും തിരിച്ചെത്തിക്കാൻ നടപടിയാരംഭിച്ചു.
മെഡിക്കൽ വിദ്യാർഥികൾ അടക്കം കർണാടകയിൽനിന്ന് 120- ഓളം പേർ ഇറാനിൽ കുടുങ്ങിയിരുന്നു. ഇവരിൽ മിക്കവരും ഇറാൻ വിട്ടു. അർമേനിയയിൽ എത്തിയ ഇവരെ അവിടെനിന്ന് നാട്ടിലേക്ക് കൊണ്ടുവരാനാണ് ശ്രമിക്കുന്നത്.
