ബെംഗളൂരു: പിന്നാക്ക വിഭാഗങ്ങളിലെയും മാനസിക വെല്ലുവിളികൾ നേരിടുന്ന സ്ത്രീകളുടെയും പുനരധിവാസത്തിനും ശാക്തീകരണത്തിനുമായി പ്രവർത്തിക്കുന്ന വിഷൻ ഇന്ത്യയുടെ ആഭിമുഖ്യത്തിൽ “ത്രെഡ്സ് ഓഫ് ഹ്യൂമാനിറ്റി” (Threads of Humanity) ഫണ്ട്റൈസിംഗ് ഗാല ജൂൺ 27-ന് ബെംഗളൂരുവിലെ കോരമംഗലയിൽ സംഘടിപ്പിച്ചു.
വേൾഡ് മലയാളി ഫെഡറേഷന്റെ (WMF) മുൻ പ്രസിഡന്റും സാമൂഹിക പ്രവർത്തകനുമായ ആർക്കിടെക്റ്റ് അലെക്കിൻ്റെ നേതൃത്വത്തിൽ നടന്ന പരിപാടി വിഷൻ ഇന്ത്യയുടെ സി.ഇ.ഒ ജോബി വർഗീസ് നയിക്കുന്ന സംഘടനയുടെ പ്രവർത്തനങ്ങൾക്ക് പിന്തുണയും അവബോധവും വർധിപ്പിക്കുക എന്ന ലക്ഷ്യത്തോടെയായിരുന്നു. സമൂഹത്തിന്റെ വിവിധ മേഖലകളിൽ നിന്നുള്ള പ്രൊഫഷണലുകൾ, വ്യവസായികൾ, ജീവകാരുണ്യ പ്രവർത്തകർ, വനിതാ സംരംഭകർ, സാമൂഹിക പ്രവർത്തകർ, സുമനസ്സുകൾ എന്നിവർ ചടങ്ങിൽ പങ്കെടുത്തു.
വനിതകളുടെ സ്വയംപര്യാപ്തതയും സാമ്പത്തിക ശാക്തീകരണവും പ്രോത്സാഹിപ്പിക്കുന്നതിന്റെ ഭാഗമായി വനിതാ സംരംഭകർക്കും സ്റ്റാർട്ടപ്പുകൾക്കും അവരുടെ ഉൽപ്പന്നങ്ങളും കഴിവുകളും സംരംഭങ്ങളും അവതരിപ്പിക്കാനുള്ള അവസരവും ഗാലയിൽ ഒരുക്കിയിരുന്നു. ധനസമാഹരണത്തിനപ്പുറം, സമൂഹത്തിന്റെ കൂട്ടായ പിന്തുണയിലൂടെ അർഹരായ സ്ത്രീകളുടെ ജീവിതത്തിൽ പ്രതീക്ഷയും ആത്മവിശ്വാസവും പകരുകയെന്ന സന്ദേശവും പരിപാടി മുന്നോട്ടുവച്ചു.
“We are blessed to be a blessing” എന്ന സന്ദേശം ഉയർത്തിപ്പിടിച്ച ചടങ്ങിൽ കരുണ, സൗഹൃദം, സഹവർത്തിത്വം, സാമൂഹിക ഉത്തരവാദിത്തം എന്നിവയുടെ പ്രാധാന്യം ഊന്നിപ്പറഞ്ഞു. വിവിധ മേഖലകളിൽ നിന്നുള്ള വ്യക്തികളെയും സംഘടനകളെയും ഒരു വേദിയിൽ ഒന്നിപ്പിച്ച ഈ ഗാല, കൂട്ടായ പ്രവർത്തനത്തിലൂടെ സമൂഹത്തിൽ അർഥവത്തായ മാറ്റങ്ങൾ സൃഷ്ടിക്കാനാകുമെന്ന സന്ദേശമാണ് നൽകിയത്.
‘ത്രെഡ്സ് ഓഫ് ഹ്യൂമാനിറ്റി’ മാനവിക മൂല്യങ്ങൾ ഉയർത്തിപ്പിടിച്ചും സ്ത്രീ ശാക്തീകരണത്തിനും സാമൂഹിക സേവന പ്രവർത്തനങ്ങൾക്കും കൂടുതൽ പിന്തുണ ഉറപ്പാക്കിയും ശ്രദ്ധേയമായ ഒരു സാമൂഹിക സംരംഭമായി മാറിയതായി സംഘാടകർ അറിയിച്ചു.
ബെംഗളൂരുവാർത്തയുടെ ആൻഡ്രോയ്ഡ് ആപ്ലിക്കേഷൻ ഇപ്പോൾ ഗൂഗിൾ പ്ലേസ്റ്റോറിൽ ലഭ്യമാണ്, പോർട്ടലിൽ പ്രസിദ്ധീകരിക്കുന്ന വാർത്തകൾ വേഗത്തിൽ അറിയാൻ മൊബൈൽ ആപ്പ് ഇൻസ്റ്റാൾ ചെയ്യുക. If you cannot read Malayalam,Download BengaluruVartha Android app from Google play store and Click On the News Reader Button. [masterslider id="10"]
