ബെംഗളൂരു: 2026–27 അധ്യയന വർഷത്തെ പ്രീ-മെട്രിക്, പോസ്റ്റ്-മെട്രിക് സ്കോളർഷിപ്പുകൾക്കായി പട്ടികവർഗ (ST) വിഭാഗത്തിൽപ്പെട്ട വിദ്യാർത്ഥികളിൽ നിന്നും സാമൂഹ്യക്ഷേമ വകുപ്പ് ഓൺലൈൻ അപേക്ഷകൾ ക്ഷണിച്ചു. ബെംഗളൂരു ഈസ്റ്റ് താലൂക്കിലെ സ്കൂളുകളിലും കോളേജുകളിലും പഠിക്കുന്ന അർഹരായ വിദ്യാർത്ഥികൾക്ക് സംസ്ഥാന സ്കോളർഷിപ്പ് പോർട്ടൽ (SSP) വഴി അപേക്ഷ സമർപ്പിക്കാവുന്നതാണ്.
കൂടുതൽ വിവരങ്ങൾക്ക് ടി.സി പാളയ മെയിൻ റോഡിലുള്ള ഡിപ്പാർട്ട്മെന്റ് ഓഫ് സോഷ്യൽ വെൽഫെയർ അസിസ്റ്റന്റ് ഡയറക്ടറുടെ (ഗ്രേഡ്-1) ഓഫീസുമായി ബന്ധപ്പെടണം. കൂടാതെ 080-29535045 എന്ന നമ്പറിലോ, tswoeastblore@gmail.com എന്ന ഇമെയിൽ വിലാസം വഴിയോ വിവരങ്ങൾ അറിയാൻ സാധിക്കുമെന്ന് അധികൃതർ അറിയിച്ചു.
അതേസമയം, ന്യൂനപക്ഷ ക്ഷേമ വകുപ്പും 2026–27 അധ്യയന വർഷത്തെ പ്രീ-മെട്രിക് സ്കോളർഷിപ്പുകൾക്കായി അപേക്ഷ ക്ഷണിച്ചിട്ടുണ്ട്. 1 മുതൽ 8 വരെയുള്ള ക്ലാസുകളിൽ പഠിക്കുന്ന മുസ്ലിം, ക്രിസ്ത്യൻ, ബുദ്ധ, സിഖ്, പാഴ്സി, ജൈന മതവിഭാഗങ്ങളിൽപ്പെട്ട വിദ്യാർത്ഥികൾക്കാണ് അവസരം.
അർഹരായ വിദ്യാർത്ഥികൾക്ക് സെപ്റ്റംബർ 30-നകം സംസ്ഥാന സ്കോളർഷിപ്പ് പോർട്ടൽ (SSP) വഴി അപേക്ഷിക്കാം. വിശദവിവരങ്ങൾക്ക് ന്യൂനപക്ഷ ഡയറക്ടറേറ്റിന്റെ ഔദ്യോഗിക വെബ്സൈറ്റ് സന്ദർശിക്കുകയോ, പ്രവൃത്തിസമയങ്ങളിൽ ബെംഗളൂരു-560001 ലുള്ള ഡിപ്പാർട്ട്മെന്റ് ഓഫ് മൈനോറിറ്റീസ് വെൽഫെയർ ഡിസ്ട്രിക്റ്റ് ഓഫീസുമായി ബന്ധപ്പെടുകയോ ചെയ്യാം. ഹെൽപ്പ് ലൈൻ നമ്പർ: 080-22866718.
