പാചക പരീക്ഷണങ്ങൾ സോഷ്യൽ മീഡിയയിൽ പലപ്പോഴും തരംഗമാകാറുണ്ടെങ്കിലും, ഇത്തരത്തിലൊന്ന് ആരും സ്വപ്നത്തിൽ പോലും ചിന്തിച്ചു കാണില്ല. കോഴിയുടെ പാക്കിംഗ് കവർ പോലും മാറ്റാതെ അത് ചട്ടിയിലിട്ട് കറിവെച്ച ഒരു വീട്ടുജോലിക്കാരിയുടെ വീഡിയോയാണ് ഇപ്പോൾ ഇന്റർനെറ്റിൽ ചർച്ചാവിഷയം.
പ്രമുഖ കണ്ടന്റ് ക്രിയേറ്ററായ സൗരവ് ദേവ്റാണിയാണ് തന്റെ വീട്ടിൽ നടന്ന ഈ വിചിത്ര സംഭവം ക്യാമറയിൽ പകർത്തി പങ്കുവെച്ചത്. “ഞാൻ എന്റെ വീട്ടുജോലിക്കാരിയെ പിരിച്ചുവിടണോ?” എന്ന രസകരമായ അടിക്കുറിപ്പോടെയാണ് വീഡിയോ പോസ്റ്റ് ചെയ്തിരിക്കുന്നത്.
അടുക്കളയിൽ ചിക്കൻ കറി തയ്യാറാക്കുന്നതിനിടെ പാത്രത്തിൽ നോക്കിയ സൗരവ് ശരിക്കും ഞെട്ടിപ്പോയി. മസാലയും വെള്ളവും ചേർത്ത് തിളച്ചുകൊണ്ടിരിക്കുന്ന പാത്രത്തിൽ, പ്ലാസ്റ്റിക് കവറിനുള്ളിൽ ഇരിക്കുന്ന നിലയിലായിരുന്നു ചിക്കൻ! ഫ്രിഡ്ജിൽ കവറിൽ സൂക്ഷിച്ചിരുന്ന ചിക്കൻ, കവർ പൊളിക്കാൻ പോലും നിൽക്കാതെ നേരിട്ട് പാത്രത്തിലേക്ക് ഇടുകയായിരുന്നു.
സോഷ്യൽ മീഡിയ പ്രതികരണം
വീഡിയോ വൈറലായതോടെ രസകരമായ കമന്റുകളാണ് ഇൻസ്റ്റഗ്രാമിലും മറ്റും നിറയുന്നത്. “ആ ദീദിയുടെ കാലിൽ എനിക്കൊന്ന് തൊട്ടു വന്ദിക്കണം” എന്നായിരുന്നു ഒരാളുടെ കമന്റ്. “ഇത് പുതിയ തരം ‘പ്ലാസ്റ്റിക് ചിക്കൻ’ ആണോ?” എന്നും ചിലർ പരിഹസിക്കുന്നു.
ആരോഗ്യത്തിന് ഭീഷണി
തമാശകൾക്കപ്പുറം, ഈ പ്രവണത അതീവ ഗുരുതരമാണെന്ന് വിദഗ്ധർ മുന്നറിയിപ്പ് നൽകുന്നു. പ്ലാസ്റ്റിക് കവറുകൾ ചൂടാകുമ്പോൾ അതിലെ വിഷാംശങ്ങൾ ഭക്ഷണത്തിൽ കലരുന്നത് മാരകമായ ആരോഗ്യപ്രശ്നങ്ങൾക്ക് കാരണമാകും. ഇത്തരം അബദ്ധങ്ങൾ വീട്ടമ്മമാരും ജോലിക്കാരും പ്രത്യേകം ശ്രദ്ധിക്കണമെന്നും സോഷ്യൽ മീഡിയയിൽ പലരും ഓർമ്മിപ്പിക്കുന്നുണ്ട്.
