തിരുവനന്തപുരം: കൊച്ചി മെട്രോ ഉദ്ഘാടനവുമായി ബന്ധപ്പെട്ട വിവാദങ്ങള് അവസാനിക്കുന്നു. ഉദ്ഘാടന വേദിയില് ഡി എം ആര് സി ഉപദേഷ്ടാവ് ഇ ശ്രീധരനും ഉണ്ടാകുമെന്ന് പ്രധാനമന്ത്രിയുടെ ഓഫീസ് അറിയിച്ചു. മുഖ്യമന്ത്രിയെയാണ് ഇക്കാര്യം അറിയിച്ചത്.പ്രതിപക്ഷനേതാവ് രമേശ് ചെന്നിത്തലക്കും വേദിയില് സ്ഥാനം ഉണ്ടാകും. നേരത്തെ കൊച്ചി മെട്രോ നിര്മ്മാണത്തിന് മേല്നോട്ടം വഹിച്ച ഇ ശ്രീധരനെ ഉദ്ഘാടന ചടങ്ങില്നിന്ന് ഒഴിവാക്കിയത് വിവാദമായിരുന്നു.
ശ്രീധരന് പുറമെ പ്രതിപക്ഷനേതാവ്, സ്ഥലം എംപി, സ്ഥലം എംഎല്എ മുന്മുഖ്യമന്ത്രി ഉമ്മന്ചാണ്ടി എന്നിവരെയും ഒഴിവാക്കിയിരുന്നു. പ്രധാനമന്ത്രിയുടെ ഓഫീസ് ഇടപെട്ടാണ് ഉദ്ഘാടനവേദിയില് സന്നിഹിതരാകുന്നവരുടെ എണ്ണം ചുരുക്കിയത്. ഇതിനെതിരെ മുഖ്യമന്ത്രി പിണറായി വിജയന് പ്രധാനമന്ത്രിക്ക് കത്തയച്ചിരുന്നു. ശ്രീധരനെയും പ്രതിപക്ഷനേതാവിനെയും ചടങ്ങില് ഉള്പ്പെടുത്തിയതായി പ്രധാനമന്ത്രിയുടെ ഓഫീസ് അറിയിച്ചതായി നേരത്തെ ബിജെപി അദ്ധ്യക്ഷന് കുമ്മനം രാജശേഖരനും അറിയിച്ചിരുന്നു.
