ബെംഗളൂരു: ഇന്ത്യൻ റെയിൽവേ യാത്രക്കാർക്ക് ഏറെ ആശ്വാസം നൽകിക്കൊണ്ട് ടിക്കറ്റ് ബുക്കിംഗ് സംവിധാനം കൂടുതൽ ലളിതവും വേഗത്തിലുമാക്കാൻ പുതിയ വെബ്സൈറ്റുമായി ഇന്ത്യൻ റെയിൽവേ കാറ്ററിംഗ് ആൻഡ് ടൂറിസം കോർപ്പറേഷൻ (ഐആർസിടിസി). ജൂലൈ 15 മുതൽ പ്രാബല്യത്തിൽ വരുന്ന പുതിയ വെബ്സൈറ്റ്, നിലവിലെ സാങ്കേതിക തടസ്സങ്ങളും മന്ദഗതിയിലുള്ള ടിക്കറ്റ് ബുക്കിംഗും പൂർണ്ണമായും പരിഹരിക്കാൻ ലക്ഷ്യമിട്ടുള്ളതാണ്. രാജസ്ഥാനിൽ നടന്ന ഒരു ചടങ്ങിൽ റെയിൽവേ മന്ത്രി അശ്വിനി വൈഷ്ണവാണ് യാത്രക്കാരുടെ ദീർഘനാളത്തെ ആവശ്യങ്ങൾ പരിഗണിച്ചുള്ള ഈ വലിയ മാറ്റം ഔദ്യോഗികമായി പ്രഖ്യാപിച്ചത്.
പഴയ വെബ്സൈറ്റിൽ ടിക്കറ്റ് ബുക്ക് ചെയ്യുമ്പോൾ നേരിടുന്ന വേഗതക്കുറവ്, തത്കാൽ ബുക്കിംഗിനിടെയുള്ള സെർവർ തകരാറുകൾ, ആവർത്തിച്ചുള്ള കാപ്ച പരിശോധനകൾ എന്നിവ വലിയ ബുദ്ധിമുട്ട് സൃഷ്ടിക്കുന്നതായി വിദ്യാർത്ഥികൾ ഉൾപ്പെടെയുള്ള യാത്രക്കാർ മന്ത്രിയുടെ ശ്രദ്ധയിൽപ്പെടുത്തിയിരുന്നു. ഇതിനുള്ള ശാശ്വത പരിഹാരമായാണ് അത്യാധുനിക സവിശേഷതകളോടെയുള്ള പുതിയ വെബ്സൈറ്റ് യാഥാർത്ഥ്യമാക്കിയിരിക്കുന്നത്.
സെർവർ തകരാറുകൾക്ക് വിട; മിനിറ്റിൽ ഒന്നരലക്ഷം ടിക്കറ്റുകൾ
നിലവിലെ ഐആർസിടിസി വെബ്സൈറ്റിന് മിനിറ്റിൽ ഏകദേശം 32,000 ടിക്കറ്റുകൾ മാത്രമേ പ്രോസസ്സ് ചെയ്യാൻ സാധിച്ചിരുന്നുള്ളൂ. എന്നാൽ പുതിയ വെബ്സൈറ്റിലൂടെ ഇത് മിനിറ്റിൽ 1.5 ലക്ഷത്തിലധികം ടിക്കറ്റുകളായി ഉയരും. ഇത് തത്കാൽ ടിക്കറ്റ് ബുക്കിംഗ് സമയങ്ങളിൽ ഉണ്ടാകാറുള്ള സെർവർ തടസ്സങ്ങൾ പൂർണ്ണമായും ഇല്ലാതാക്കും. കൂടാതെ, നിലവിലെ പാസഞ്ചർ റിസർവേഷൻ സിസ്റ്റത്തിൽ (പിആർഎസ്) മിനിറ്റിൽ 4 ലക്ഷം അന്വേഷണങ്ങൾ മാത്രമേ കൈകാര്യം ചെയ്യാൻ കഴിഞ്ഞിരുന്നുള്ളൂ എങ്കിൽ, പുതിയ സിസ്റ്റത്തിൽ അത് 40 ലക്ഷമായി വർദ്ധിക്കും. ഇത് ട്രെയിനുകളെയും സീറ്റുകളെയും കുറിച്ചുള്ള വിവരങ്ങൾ കൂടുതൽ വേഗത്തിൽ ലഭ്യമാക്കാൻ സഹായിക്കും.
ഇഷ്ടപ്പെട്ട സീറ്റ് തിരഞ്ഞെടുക്കാം; ഒറ്റ സ്ക്രീനിൽ എല്ലാ ക്ലാസുകളും
മുൻപ് സ്ലീപ്പർ, 3 എസി, 2 എസി തുടങ്ങിയ ഓരോ ക്ലാസുകളിലെയും സീറ്റ് ലഭ്യത വെവ്വേറെ ക്ലിക്ക് ചെയ്ത് പരിശോധിക്കേണ്ടി വന്നിരുന്ന സ്ഥാനത്ത്, പുതിയ വെബ്സൈറ്റിൽ എല്ലാ ക്ലാസുകളുടെയും വിവരങ്ങൾ ഒറ്റ സ്ക്രീനിൽ തന്നെ ഒരേസമയം കാണാൻ സാധിക്കും. കൂടാതെ, യാത്രക്കാർക്ക് തങ്ങൾക്ക് താല്പര്യമുള്ള സീറ്റുകൾ നേരിട്ട് തിരഞ്ഞെടുക്കാനുള്ള ഓപ്ഷനും പുതിയ നിരക്ക് കലണ്ടറും ഇതിലുണ്ട്. വിവിധ തീയതികളിലെ ടിക്കറ്റ് നിരക്കുകൾ ഒരിടത്ത് തന്നെ താരതമ്യം ചെയ്ത് അനുയോജ്യമായ ദിവസം തിരഞ്ഞെടുക്കാൻ ഈ കലണ്ടർ യാത്രക്കാരെ സഹായിക്കും.
അനാവശ്യ പരസ്യങ്ങളും കാപ്ച പരിശോധനകളും ഒഴിവായി
ടിക്കറ്റ് ബുക്കിംഗ് വേളയിൽ കടുത്ത മടുപ്പുണ്ടാക്കുന്ന പരസ്യ ഗ്രാഫിക്സുകൾ, അനാവശ്യ പോപ്പ്-അപ്പുകൾ എന്നിവ പുതിയ വെബ്സൈറ്റിൽ പരമാവധി ഒഴിവാക്കിയിട്ടുണ്ട്. ഒപ്പം നിരന്തരമായ സുരക്ഷാ കാപ്ച പരിശോധനകളും കുറച്ചിട്ടുള്ളതിനാൽ തത്കാൽ ടിക്കറ്റുകൾ വളരെ വേഗത്തിൽ ബുക്ക് ചെയ്ത് തീർക്കാൻ സാധിക്കും. പ്രാദേശിക ഭാഷകളിൽ ലഭ്യമാകുന്ന പുതിയ വെബ്സൈറ്റിൽ വികലാംഗർ, രോഗികൾ, വിദ്യാർത്ഥികൾ എന്നിവർക്ക് പ്രത്യേക സേവനങ്ങൾ നൽകാനായി ഒറ്റ പ്ലാറ്റ്ഫോമിൽ തന്നെ വിപുലമായ ക്രമീകരണങ്ങളും ഒരുക്കുന്നുണ്ട്. കൂടുതൽ ലളിതവും ജനസൗഹൃദവുമായ പുതിയ രൂപകൽപ്പന രാജ്യത്തെ കോടിക്കണക്കിന് റെയിൽ യാത്രക്കാർക്ക് വലിയ യാത്രാസൗകര്യമാണ് സമ്മാനിക്കുന്നത്.
