ബെംഗളൂരു: രാജ്യതലസ്ഥാനമായ ഡൽഹിയിലെ മെട്രോ ട്രെയിനുകളിൽ നേരത്തെ റിപ്പോർട്ട് ചെയ്യപ്പെട്ടതിന് സമാനമായ മോശം പെരുമാറ്റങ്ങളും പ്രണയരംഗങ്ങളും ഇപ്പോൾ സിലിക്കൺ സിറ്റിയായ ബെംഗളൂരുവിലെ ‘നമ്മ മെട്രോ’യിലും ആവർത്തിക്കുന്നു. ട്രെയിൻ കോച്ചിനുള്ളിൽ വച്ച് സഹയാത്രികരെ സാക്ഷി നിർത്തി യുവദമ്പതികൾ നടത്തിയ അമിതമായ പ്രണയപ്രകടനമാണ് ഇപ്പോൾ കടുത്ത പൊതുജനരോഷത്തിന് കാരണമായിരിക്കുന്നത്. ഇവർക്കെതിരെ കർശന നടപടി സ്വീകരിക്കണമെന്ന് ആവശ്യപ്പെട്ട് യാത്രക്കാർ രംഗത്തെത്തിയിട്ടുണ്ട്.
കെ.ആർ. പുരം ലക്ഷ്യമാക്കി നീങ്ങുകയായിരുന്ന മെട്രോ ട്രെയിനിന്റെ കോച്ചിനുള്ളിലാണ് വിവാദപരമായ ഈ സംഭവം അരങ്ങേറിയത്. ട്രെയിനിൽ യാത്രക്കാരുടെ വൻ തിരക്കുണ്ടായിരുന്നിട്ടും, അത് ഒട്ടും കണക്കിലെടുക്കാതെ പൊതുസ്ഥലത്തിന്റെ മര്യാദകൾ ലംഘിച്ച് യുവദമ്പതികൾ പരസ്പരം കെട്ടിപ്പിടിക്കുകയും ചുംബിക്കുകയുമായിരുന്നു. ദമ്പതികളുടെ ഈ അസഭ്യ പെരുമാറ്റത്തിൽ അസ്വസ്ഥനായ ഒരു സഹയാത്രികൻ തന്റെ മൊബൈൽ ക്യാമറയിൽ ഈ ദൃശ്യങ്ങൾ മുഴുവൻ പകർത്തി.
തുടർന്ന് ഈ വീഡിയോ സോഷ്യൽ മീഡിയയിൽ പ്രചരിച്ചതോടെ വലിയ രീതിയിലുള്ള വിമർശനങ്ങളാണ് ഉയരുന്നത്. ഇത് പൊതുഗതാഗത സംവിധാനമാണോ അതോ പ്രണയിതാക്കൾക്ക് വേണ്ടിയുള്ള സ്വകാര്യ ഇടമാണോ എന്ന് ചോദിച്ച് നെറ്റിസൺസ് രോഷം പ്രകടിപ്പിക്കുന്നുണ്ട്. സംഭവത്തിൽ ബാംഗ്ലൂർ മെട്രോ റെയിൽ കോർപ്പറേഷൻ ലിമിറ്റഡിനും (BMRC) ബെംഗളൂരു പോലീസിനുമെതിരെയും സോഷ്യൽ മീഡിയയിൽ വിമർശനങ്ങൾ ശക്തമാണ്. പൊതുസ്ഥലങ്ങളിൽ ഇത്തരം അച്ചടക്കമില്ലാത്ത പെരുമാറ്റങ്ങൾ തടയുന്നതിനായി സുരക്ഷാ ഉദ്യോഗസ്ഥർ കർശനമായ നടപടികൾ സ്വീകരിക്കണമെന്നാണ് പൊതുജനങ്ങളുടെ ആവശ്യം.
