ബെംഗളൂരു: സിൽക്ക് ബോർഡ് ജംഗ്ഷനിലെ ഗതാഗതക്കുരുക്കിന് പരിഹാരമായി നിർമ്മിച്ച എച്ച്.എസ്.ആർ ലേഔട്ട് – രാഗിഗുഡ ഡബിൾ ഡക്കർ മേൽപ്പാലം തുറന്നുകൊടുത്തതോടെ നഗരത്തിൽ പുതിയ ഗതാഗത പ്രതിസന്ധി. ജയദേവ ഹോസ്പിറ്റൽ, ഉഡുപ്പി ഗാർഡൻ തുടങ്ങിയ പ്രധാന സിഗ്നലുകൾ ഒഴിവാക്കി വേഗത്തിൽ യാത്ര ചെയ്യാമെന്ന പ്രതീക്ഷയോടെ എത്തുന്ന വാഹനങ്ങൾ, പാലം അവസാനിക്കുന്ന രാഗിഗുഡയിൽ കിലോമീറ്ററുകളോളം നീളുന്ന കുരുക്കിൽ അകപ്പെടുകയാണ്.
മാറുന്ന കുരുക്ക്
മെട്രോ യെല്ലോ ലൈനിന്റെ തൂണുകളിൽ തന്നെ നിർമ്മിച്ച ഈ അത്യാധുനിക മേൽപ്പാലം കഴിഞ്ഞ വെള്ളിയാഴ്ചയാണ് ഉപമുഖ്യമന്ത്രി ഡി.കെ. ശിവകുമാർ ഉദ്ഘാടനം ചെയ്തത്. സിൽക്ക് ബോർഡിലെ തിരക്ക് ഒഴിവാക്കാൻ സാധിക്കുന്നുണ്ടെങ്കിലും പാലം അവസാനിക്കുന്നത് രാഗിഗുഡയിലെ ട്രാഫിക് സിഗ്നലിന് മുന്നിലായതാണ് പ്രധാന തിരിച്ചടിയായത്. പാലത്തിൽ നിന്ന് ഇറങ്ങുന്ന വാഹനങ്ങൾ നേരെ സിഗ്നലിലേക്ക് എത്തുന്നതോടെ തിരക്കുള്ള സമയങ്ങളിൽ മേൽപ്പാലത്തിന് മുകളിലേക്ക് വരെ വാഹനങ്ങളുടെ നിര നീളുന്നു.
ആസൂത്രണ പിഴവെന്ന് പരാതി
ലക്ഷ്യസ്ഥാനത്തെ തിരക്ക് കുറയ്ക്കുന്നതിന് പകരം സിൽക്ക് ബോർഡിലെ കുരുക്ക് ജെ.പി നഗറിലേക്ക് മാറ്റുക മാത്രമാണ് അധികൃതർ ചെയ്തതെന്ന് യാത്രക്കാർ കുറ്റപ്പെടുത്തുന്നു. പാലത്തിന്റെ എൻട്രൻസ്, എക്സിറ്റ് റാംപുകൾക്ക് ആവശ്യത്തിന് വീതിയില്ലാത്തത് വാഹനങ്ങൾ ഒന്നിച്ച് എത്തുമ്പോൾ തടസ്സമുണ്ടാക്കുന്നുണ്ട്. ഉയർന്ന വേഗതയിൽ എത്തുന്ന വാഹനങ്ങൾ ഇടുങ്ങിയ സിഗ്നലിലേക്ക് പ്രവേശിക്കുന്നത് അപകടങ്ങൾക്കും കാരണമാകുന്നു.
പോലീസിന്റെ പ്രതികരണം
വാഹനയാത്രക്കാർ പുതിയ മാറ്റങ്ങളുമായി പൊരുത്തപ്പെടാൻ സമയമെടുക്കുമെന്നും വരും ദിവസങ്ങളിൽ ഗതാഗത ക്രമീകരണങ്ങളിൽ മാറ്റം വരുത്തുമെന്നും ട്രാഫിക് സൗത്ത് ഡി.സി.പി ഗോപാൽ എം. ബ്യാക്കോഡ് അറിയിച്ചു. രാഗിഗുഡയിലെ സിഗ്നൽ സമയത്തിൽ മാറ്റം വരുത്തുന്നത് പരിഗണനയിലാണെന്നും തിരക്ക് കുറയ്ക്കാൻ പുതിയ ട്രാഫിക് ഡൈവർഷനുകൾ ആസൂത്രണം ചെയ്യുന്നുണ്ടെന്നും അദ്ദേഹം കൂട്ടിച്ചേർത്തു.
എങ്കിലും പഴയതിനെ അപേക്ഷിച്ച് യാത്രാസമയത്തിൽ കുറവുണ്ടായിട്ടുണ്ടെന്നാണ് ഒരു വിഭാഗം യാത്രക്കാരുടെ അഭിപ്രായം. ജയദേവ ഉൾപ്പെടെയുള്ള പ്രധാന ജംഗ്ഷനുകൾ കടന്നുപോകാൻ പണ്ട് എടുത്തിരുന്ന സമയത്തേക്കാൾ കുറഞ്ഞ സമയം കൊണ്ട് ഇപ്പോൾ ലക്ഷ്യസ്ഥാനത്ത് എത്താൻ സാധിക്കുന്നുണ്ടെന്ന് ഇവർ പറയുന്നു.
ബെംഗളൂരുവാർത്തയുടെ ആൻഡ്രോയ്ഡ് ആപ്ലിക്കേഷൻ ഇപ്പോൾ ഗൂഗിൾ പ്ലേസ്റ്റോറിൽ ലഭ്യമാണ്, പോർട്ടലിൽ പ്രസിദ്ധീകരിക്കുന്ന വാർത്തകൾ വേഗത്തിൽ അറിയാൻ മൊബൈൽ ആപ്പ് ഇൻസ്റ്റാൾ ചെയ്യുക. If you cannot read Malayalam,Download BengaluruVartha Android app from Google play store and Click On the News Reader Button. [masterslider id="10"]
