ബെംഗളൂരു: അറ്റകുറ്റപ്പണികൾക്കും അന്തിമ ലോഡ് ടെസ്റ്റിംഗിനുമായി ബെംഗളൂരുവിലെ പീനിയ എലിവേറ്റഡ് ഫ്ലൈഓവർ നാല് ദിവസത്തേക്ക് അടച്ചിടുന്നു. മെയ് 5-ാം തീയതി പുലർച്ചെ 5 മണി മുതൽ മെയ് 8-ാം തീയതി രാവിലെ 11 മണി വരെയാണ് നാഷണൽ ഹൈവേ അതോറിറ്റി ഓഫ് ഇന്ത്യ (NHAI) നിയന്ത്രണം ഏർപ്പെടുത്തിയിരിക്കുന്നത്. ഫ്ലൈഓവർ കേബിൾ സ്ഥാപിക്കൽ ഉൾപ്പെടെയുള്ള നിർണ്ണായക ജോലികൾ പൂർത്തിയാക്കുന്നതിന്റെ ഭാഗമായാണ് ഈ നടപടി.
ഫ്ലൈഓവറിന്റെ ഇരുവശങ്ങളിലേക്കുമുള്ള ഗതാഗതം പൂർണ്ണമായും തടഞ്ഞിട്ടുള്ളതിനാൽ വാഹനമോടിക്കുന്നവർ ബദൽ പാതകൾ ഉപയോഗിക്കണമെന്ന് ബെംഗളൂരു ട്രാഫിക് പോലീസ് നിർദ്ദേശിച്ചു. നേരത്തെ ഏപ്രിൽ 13 മുതൽ അഞ്ച് ദിവസത്തേക്ക് ഫ്ലൈഓവർ അടച്ചിടുമെന്ന് അറിയിച്ചിരുന്നെങ്കിലും സാങ്കേതിക കാരണങ്ങളാൽ ഇത് മാറ്റിവെച്ചിരുന്നു. സുഗമമായ ഗതാഗതത്തിന് താഴെ പറയുന്ന ബദൽ മാർഗ്ഗങ്ങൾ ശ്രദ്ധിക്കുക:
നെലമംഗല ഭാഗത്തുനിന്നും ബെംഗളൂരുവിലേക്ക് വരുന്നവർ: കെന്നമെറ്റൽ ഫാക്ടറിക്ക് സമീപം ഫ്ലൈഓവറിന് താഴെയുള്ള സർവീസ് റോഡ് വഴി പ്രവേശിക്കണം. തുടർന്ന് എട്ടാം മൈൽ, ദാസറഹള്ളി, പീനിയ പോലീസ് സ്റ്റേഷൻ ജംഗ്ഷൻ, എസ്.ആർ.എസ് ജംഗ്ഷൻ, ഗൊരഗുണ്ടെപാളയ, ജലഹള്ളി ക്രോസ് റോഡ് വഴിയും യാത്ര തുടരാം.
ബെംഗളൂരു നഗരത്തിൽ നിന്നും നെലമംഗല ഭാഗത്തേക്ക് പോകുന്നവർ: സി.എം.ടി.ഐയിൽ നിന്നും ഫ്ലൈഓവറിന് താഴെയുള്ള സർവീസ് റോഡ് ഉപയോഗിക്കണം. എസ്.ആർ.എസ് ജംഗ്ഷൻ, പീനിയ പോലീസ് സ്റ്റേഷൻ ജംഗ്ഷൻ, ജലഹള്ളി ക്രോസ്, ദാസറഹള്ളി, എട്ടാം മൈൽ വഴി കടന്നുപോയി റെലിജി ടോളിൽ പ്രവേശിക്കാവുന്നതാണ്.
ഫ്ലൈഓവർ അടച്ചിടുന്നത് മൂലം സർവീസ് റോഡുകളിൽ വലിയ തിരക്ക് അനുഭവപ്പെടാൻ സാധ്യതയുള്ളതിനാൽ വാഹനമോടിക്കുന്നവർ ട്രാഫിക് ഉദ്യോഗസ്ഥരുടെ നിർദ്ദേശങ്ങൾ കർശനമായി പാലിക്കണമെന്ന് അധികൃതർ അഭ്യർത്ഥിച്ചു. നഗരത്തിലെ പ്രധാന ഗതാഗത തടസ്സങ്ങൾ ഒഴിവാക്കാൻ യാത്ര മുൻകൂട്ടി പ്ലാൻ ചെയ്യണമെന്നും പോലീസ് അറിയിച്ചു.
