ബെംഗളൂരു : ഇന്ത്യയെ ‘നരകക്കുഴി’ (Hellhole) എന്ന് വിശേഷിപ്പിച്ച അമേരിക്കൻ പ്രസിഡന്റ് ഡൊണാൾഡ് ട്രംപിനെതിരെ രൂക്ഷവിമർശനവുമായി കർണാടക തൊഴിൽ വകുപ്പ് മന്ത്രി സന്തോഷ് ലാഡ്. ട്രംപിന്റെ പരാമർശം ഇന്ത്യയെയും പ്രധാനമന്ത്രി നരേന്ദ്ര മോദിയെയും അപമാനിക്കുന്നതാണെന്ന് പറഞ്ഞ മന്ത്രി, വാർത്താസമ്മേളനത്തിനിടെ ട്രംപിന് നേരെ നടുവിരൽ ഉയർത്തിക്കാട്ടി തന്റെ പ്രതിഷേധം രേഖപ്പെടുത്തി.
“അമേരിക്കൻ പ്രസിഡന്റ് പലതവണ നമ്മുടെ രാജ്യത്തെ അപമാനിച്ചിട്ടുണ്ട്. പ്രധാനമന്ത്രിയെ അധിക്ഷേപിച്ചതിന് പുറമെ ഇന്ത്യയെ ഒരു ‘നരകക്കുഴി’ എന്നാണ് അദ്ദേഹം വിശേഷിപ്പിച്ചത്. മിസ്റ്റർ ട്രംപ്, നിങ്ങളൊരു ‘മാഡ് മാക്സ്’ (Mad Max) ആണ്,” സന്തോഷ് ലാഡ് പറഞ്ഞു.
അമേരിക്കൻ പ്രസിഡന്റാണെന്ന് കരുതി തന്റെ രാജ്യത്തെക്കുറിച്ച് എന്തും പറയാമെന്ന് ട്രംപ് കരുതേണ്ടെന്നും മന്ത്രി കൂട്ടിച്ചേർത്തു. “ഞാൻ ഇതിനെ ശക്തമായി അപലപിക്കുന്നു. പ്രതിഷേധസൂചകമായി എനിക്ക് നടുവിരൽ ഉയർത്തിക്കാട്ടാനും മടിയില്ല,” എന്ന് പറഞ്ഞുകൊണ്ടാണ് മന്ത്രി ആംഗ്യം കാണിച്ചത്.
അമേരിക്കയിലെ ‘ജനനാല്പതവകാശ പൗരത്വ’വുമായി (Birthright citizenship) ബന്ധപ്പെട്ട തർക്കങ്ങൾക്കിടെയാണ് ഇന്ത്യയെയും ചൈനയെയും ‘നരകക്കുഴികൾ’ എന്ന് വിശേഷിപ്പിക്കുന്ന കുറിപ്പ് ട്രംപ് തന്റെ സോഷ്യൽ മീഡിയ പ്ലാറ്റ്ഫോമായ ‘ട്രൂത്ത് സോഷ്യൽ’-ൽ പങ്കുവെച്ചത്. ഇത് വലിയ നയതന്ത്ര ചർച്ചകൾക്ക് വഴിവെച്ചിരുന്നു.
അതേസമയം, ട്രംപിന്റെ പരാമർശത്തെക്കുറിച്ച് റിപ്പോർട്ടുകൾ കണ്ടുവെന്നും കൂടുതൽ പ്രതികരണങ്ങൾക്കില്ലെന്നുമാണ് ഇന്ത്യൻ വിദേശകാര്യ മന്ത്രാലയ വക്താവ് രൺധീർ ജയ്സ്വാൾ നേരത്തെ പ്രതികരിച്ചത്. എന്നാൽ വിഷയത്തിൽ കർണാടക മന്ത്രി പരസ്യമായി രംഗത്തെത്തിയത് ദേശീയ തലത്തിലും ശ്രദ്ധിക്കപ്പെട്ടിരിക്കുകയാണ്.
ബെംഗളൂരുവാർത്തയുടെ ആൻഡ്രോയ്ഡ് ആപ്ലിക്കേഷൻ ഇപ്പോൾ ഗൂഗിൾ പ്ലേസ്റ്റോറിൽ ലഭ്യമാണ്, പോർട്ടലിൽ പ്രസിദ്ധീകരിക്കുന്ന വാർത്തകൾ വേഗത്തിൽ അറിയാൻ മൊബൈൽ ആപ്പ് ഇൻസ്റ്റാൾ ചെയ്യുക. If you cannot read Malayalam,Download BengaluruVartha Android app from Google play store and Click On the News Reader Button. [masterslider id="10"]
