ബെംഗളൂരു: ഫാം ഹൗസിൽ അപൂർവയിനം വിദേശ ദേശാടനപ്പക്ഷികളെ അനധികൃതമായി കൈവശംവെച്ചതിന് കന്നഡനടൻ ദർശനും ഭാര്യ വിജയലക്ഷ്മിക്കും കോടതിയുടെ സമൻസ്.
മൈസൂരു ജില്ലയിലെ ടി. നരസിപുരയിലെ പ്രാദേശിക കോടതിയാണ് ജൂലായ് നാലിന് വാദം കേൾക്കുന്നതിനായി ദമ്പതിമാരോട് കോടതിയിൽ ഹാജരാകാനാവശ്യപ്പെട്ട് സമൻസ് അയച്ചത്.
ടി. നരസിപുര താലൂക്കിലെ കെമ്പായനഹുണ്ടിയിലെ ദർശന്റെ ഫാം ഹൗസിൽ വനംവകുപ്പ് ഉദ്യോഗസ്ഥർ നേരത്തേ റെയ്ഡ് നടത്തിയിരുന്നു.
പരിശോധനയിൽ വന്യജീവിസംരക്ഷണ നിയമപ്രകാരം സംരക്ഷിത ഇനമായ നാല് വിദേശ ദേശാടനപ്പക്ഷികളെ കണ്ടെത്തിയിരുന്നു.
മധ്യേഷ്യയിൽനിന്നുള്ളതും കാലാനുസൃതമായ ദേശാടനത്തിന് പേരുകേട്ടതുമായ പക്ഷികളെ അനുമതിയില്ലാതെ തടവിൽവെക്കാൻ കഴിയില്ല.
സുഹൃത്തുക്കൾ സമ്മാനമായി നൽകിയ പക്ഷികളാണിതെന്ന് ദർശൻ അവകാശപ്പെട്ടിരുന്നു.
