ബെംഗളൂരു: റോഡ് വികസനത്തിന്റെ ഭാഗമായുള്ള വൈറ്റ് ടോപ്പിംഗ് പ്രവൃത്തികൾ ആരംഭിച്ചതിനെ തുടർന്ന് സെൻട്രൽ ബെംഗളൂരുവിലെ മൗര്യ സർക്കിൾ ജംഗ്ഷനിൽ നിന്ന് റേസ് കോഴ്സ് റോഡിലേക്കുള്ള ഗതാഗതം അടച്ചു. പണികൾ പൂർത്തിയാകാൻ ഏകദേശം രണ്ടുമാസമെടുക്കുമെന്നതിനാൽ ഈ ഭാഗത്ത് കടുത്ത ഗതാഗതക്കുരുക്കിന് സാധ്യതയുണ്ട്.
മൗര്യ സർക്കിൾ ജംഗ്ഷൻ മുതൽ പഴയ കോൺഗ്രസ് ഓഫീസ് വരെയുള്ള റോഡിലാണ് വാഹനങ്ങൾക്ക് നിരോധനം ഏർപ്പെടുത്തിയിരിക്കുന്നത്. നിർമ്മാണ പ്രവർത്തനങ്ങളുടെ ഭാഗമായി ജെ.സി.ബി, ബുൾഡോസറുകൾ, വാട്ടർ ടാങ്കറുകൾ എന്നിവ പ്രദേശത്ത് സജ്ജീകരിച്ചിട്ടുണ്ട്. മജസ്റ്റിക്കിൽ നിന്ന് റേസ് കോഴ്സ് റോഡ്, ചാലൂക്യ സർക്കിൾ, വിധാന സൗധ, മല്ലേശ്വരം, ശേഷാദ്രിപുരം എന്നിവിടങ്ങളിലേക്ക് പോകുന്ന യാത്രക്കാർ പ്രധാനമായും ആശ്രയിക്കുന്ന പാതയാണിത്.
റോഡ് അടച്ചതോടെ ചുറ്റുമുള്ള റോഡുകളിൽ തിരക്ക് വർദ്ധിക്കുമെന്ന് ട്രാഫിക് പോലീസ് മുന്നറിയിപ്പ് നൽകി. മജസ്റ്റിക്കിൽ നിന്ന് വരുന്ന വാഹനങ്ങൾ ട്രാഫിക് തടസ്സങ്ങൾ ഒഴിവാക്കുന്നതിനായി ആനന്ദ് റാവു സർക്കിൾ ഫ്ലൈഓവർ വഴി റേസ് കോഴ്സ് റോഡിലേക്ക് തിരിഞ്ഞുപോകണമെന്ന് പോലീസ് നിർദ്ദേശിച്ചിട്ടുണ്ട്. തിരക്ക് നിയന്ത്രിക്കുന്നതിനായി കൂടുതൽ പോലീസുകാരെ പ്രദേശത്ത് നിയോഗിച്ചിട്ടുണ്ട്. രണ്ടു മാസത്തിനകം നിർമ്മാണം പൂർത്തിയാക്കി റോഡ് പൂർണ്ണമായി തുറന്നുകൊടുക്കാനാണ് സിവിക് അതോറിറ്റിയുടെ തീരുമാനം.
