ബെംഗളൂരു: ടൈപ്പ് 2 പ്രമേഹത്തിനും അമിതഭാര നിയന്ത്രണത്തിനുമായി ഉപയോഗിക്കുന്ന ‘മൗഞ്ചാരോ ക്വിക്ക് പെൻ’ (Mounjaro KwikPen) എന്ന മരുന്നിന്റെ ചില ബാച്ചുകൾ വ്യാജമാണെന്ന് കണ്ടെത്തിയതിനെത്തുടർന്ന് വിപണിയിൽ നിന്ന് പിൻവലിക്കാൻ നിർദ്ദേശം.
ഹരിയാന ഫുഡ് ആൻഡ് ഡ്രഗ് അഡ്മിനിസ്ട്രേഷൻ (FDA) മുന്നറിയിപ്പ് നൽകിയതിന് പിന്നാലെ ബാംഗ്ലൂർ ഡിസ്ട്രിക്റ്റ് കെമിസ്റ്റ്സ് ആൻഡ് ഡ്രഗ്ഗിസ്റ്റ്സ് അസോസിയേഷൻ (BDCDA) നഗരത്തിലെ ഫാർമസികൾക്ക് കർശന ജാഗ്രതാനിർദ്ദേശം നൽകി.
ആറ് ബാച്ചുകൾ സംശയനിഴലിൽ
2025-ൽ നിർമ്മിച്ചതും 2027 ജൂലൈ-സെപ്റ്റംബർ മാസങ്ങളിൽ കാലാവധി തീരുന്നതുമായ 2.5mg, 5mg, 7.5mg, 10mg, 12.5mg, 15mg വീര്യമുള്ള ആറ് ബാച്ചുകളാണ് വ്യാജമെന്ന് സംശയിക്കുന്നത്. ഇവയുടെ വിൽപനയും വിതരണവും ഉടൻ നിർത്തിവെക്കാൻ മൊത്ത-ചില്ലറ വ്യാപാരികൾക്ക് നിർദ്ദേശം നൽകി.
നിലവിലുള്ള സ്റ്റോക്കുകൾ മാറ്റിസൂക്ഷിക്കാനും ഡ്രഗ് കൺട്രോൾ അതോറിറ്റിയെ വിവരമറിയിക്കാനും അസോസിയേഷൻ ആവശ്യപ്പെട്ടു.
ആരോഗ്യത്തിന് വൻ ഭീഷണി
അതീവ വിലപിടിപ്പുള്ള ഈ മരുന്നിന്റെ 2.5mg ബാച്ചിന് 13,125 രൂപയും 15mg പതിപ്പിന് 27,500 രൂപയുമാണ് വിപണി വില. വ്യാജവും ഗുണനിലവാരമില്ലാത്തതുമായ മരുന്നുകൾ പൊതുജനാരോഗ്യത്തിനും രോഗികളുടെ സുരക്ഷയ്ക്കും വലിയ ഭീഷണിയാണെന്ന് ബിഡിസിഡിഎ പ്രസിഡന്റ് ബി. തിരുനാവുക്കരശ് പറഞ്ഞു. ലാഭത്തേക്കാൾ പ്രധാനം പ്രൊഫഷണൽ ധാർമ്മികതയ്ക്കും മനുഷ്യജീവിതത്തിനുമാണെന്നും വ്യാജ മരുന്നുകളെക്കുറിച്ചുള്ള ഏത് സംശയവും ഉടൻ റിപ്പോർട്ട് ചെയ്യണമെന്നും അദ്ദേഹം കൂട്ടിച്ചേർത്തു.
മരുന്നുകൾ അംഗീകൃത വിതരണക്കാരിൽ നിന്ന് മാത്രം വാങ്ങണമെന്നും ലൈസൻസില്ലാത്ത ഇടനിലക്കാരെ ഒഴിവാക്കണമെന്നും ഫാർമസികൾക്ക് നിർദ്ദേശം നൽകിയിട്ടുണ്ട്. വ്യാജ മരുന്ന് ഉപയോഗിക്കുന്നത് രോഗികളിൽ ഭീതിയും അനിശ്ചിതത്വവും ഉണ്ടാക്കുമെന്നും അസോസിയേഷൻ മുന്നറിയിപ്പ് നൽകി.
ബെംഗളൂരുവാർത്തയുടെ ആൻഡ്രോയ്ഡ് ആപ്ലിക്കേഷൻ ഇപ്പോൾ ഗൂഗിൾ പ്ലേസ്റ്റോറിൽ ലഭ്യമാണ്, പോർട്ടലിൽ പ്രസിദ്ധീകരിക്കുന്ന വാർത്തകൾ വേഗത്തിൽ അറിയാൻ മൊബൈൽ ആപ്പ് ഇൻസ്റ്റാൾ ചെയ്യുക. If you cannot read Malayalam,Download BengaluruVartha Android app from Google play store and Click On the News Reader Button. [masterslider id="10"]
