ബെംഗളൂരു : സ്വകാര്യചിത്രം പുറത്തുവിടുമെന്ന ആൺസുഹൃത്തിന്റെ ഭീഷണിയെത്തുടർന്ന് കോളേജ് വിദ്യാർഥിനി ജീവനൊടുക്കി. ബെംഗളൂരു സൗത്ത് ജില്ലയിലെ വിഭൂതിക്കരേ സ്വദേശിനി വർഷിണിയെയാണ് (22) വീട്ടിൽ തൂങ്ങിമരിച്ച നിലയിൽ കണ്ടത്.
സുഹൃത്തായ തുമകൂരു സ്വദേശി അഭി വിവാഹവാഗ്ദാനം നൽകി ലൈംഗികമായി പീഡിപ്പിച്ചെന്നും ശേഷം സ്വകാര്യചിത്രം കാട്ടി ഭീഷണിപ്പെടുത്തുന്നത് പതിവാക്കിയെന്നുമാണ് ആത്മഹത്യാക്കുറിപ്പിൽ ആരോപിക്കുന്നത്.
മൈസൂരൂവിലെ സ്വകാര്യ കോളേജിൽ എംഎസ്സി ബയോടെക്നോളജി രണ്ടാംവർഷ വിദ്യാർഥിനിയായിരുന്നു.
സ്വകാര്യചിത്രം കാട്ടി വീണ്ടും ലൈംഗികമായി പീഡിപ്പിക്കാൻ ശ്രമിച്ച അഭി ഭീഷണിപ്പെടുത്തി പണവും സ്വർണവും കൈക്കലാക്കിയെന്നും ആത്മഹത്യാക്കുറിപ്പിലുണ്ട്. ആത്മഹത്യ പ്രേരണാക്കുറ്റത്തിന് അഭിയുടെപേരിൽ പോലീസ് കേസെടുത്തു.
