ബെംഗളൂരു: ലക്കി ഭാസ്കർ സിനിമയിലെ ദുല്ഖർ സല്മാന്റെ കഥാപാത്രത്തില് നിന്ന് പ്രചോദനം ഉള്ക്കൊണ്ട് പണക്കാരനകാൻ തുനിഞ്ഞ് ഒൻപതാം ക്ലാസ് വിദ്യാർത്ഥികള്.
ലക്ഷ്യം നിറവേറ്റനായി നാല് പേരാണ് ഹോസ്റ്റലിന്റെ മതില് ചാടിയത്.
ചരണ് തേജ, രഘു, കാർത്തിക്, കിരണ് കുമാർ എന്നിവരാണ് മഹാറാണിപ്പേട്ടിലെ ഹോസ്റ്റലില് നിന്ന് കാണാതായത്. ഇവർ നാല് പേരും ലക്കി ഭാസ്കർ കണ്ടിരുന്നുവെന്നും ഇതില് ആകൃഷ്ടരായാണ് ഹോസ്റ്റല് ചാടിയതെന്നും സഹപാഠികള് പറഞ്ഞു.
സ്വന്തമായി പണം സമ്പാദിച്ച് കാറും വീടും വാങ്ങിയ ശേഷം മാത്രമേ തിരികെ വരൂവെന്ന് നാല് പേരും സഹപാഠികളോട് പറഞ്ഞിരുന്നു. ഇതിന് പിന്നാലെയാണ് നാലവർ സംഘത്തിന്റെ ഒളിവില് പോക്ക്.
കുട്ടികളിലൊരാള് വീട്ടില് നിന്ന് 12,000 രൂപ ഹോസ്റ്റല് ഫീസ് നല്കാനെന്ന് പറഞ്ഞ് വാങ്ങിയിരുന്നു.
ഇതില് 8,000 രൂപ ഹോസ്റ്റലില് അടയ്ക്കുകയും ചെയ്തു. ശേഷിക്കുന്ന പണം ഉപയോഗിച്ചാണ് കുട്ടികള് മുങ്ങിയിരിക്കുന്നത്. ഹോസ്റ്റല് ചാടുന്നതിന്റെ ദൃശ്യങ്ങള് പുറത്തുവന്നിട്ടുണ്ട്
ഹോസ്റ്റല് അധികൃതർ വിവരമറിയിച്ചതിന് പിന്നാലെ മാതാപിതാക്കള് വിശാഖപട്ടണം പൊലീസില് പരാതി നല്കി.
കുട്ടികള്ക്ക് ഹോസ്റ്റലില് മറ്റ് എന്തെങ്കിലും ബുദ്ധിമുട്ട് അനുഭവപ്പെട്ടിട്ടുണ്ടോയെന്നും പൊലീസ് അന്വേഷിക്കുന്നുണ്ട്.
