തിരുവനന്തപുരം : അന്താരാഷ്ട്ര വനിതാ ദിനത്തോടനുബന്ധിച്ച് ഇന്നലെ തിരുവനന്തപുരം കനകക്കുന്നു മുതൽ കിഴക്കേകോട്ട വരെ രാത്രി നടത്തം സംഘടിപ്പിച്ചു.
പൊതുയിടങ്ങള് സ്ത്രീകളുടേതും കൂടി എന്ന് ഓര്മ്മിപ്പിക്കുന്നതിന് വേണ്ടിയാണ് വനിതാ ദിനത്തില് രാത്രി 10 മണി മുതല് രാത്രി നടത്തം സംഘടിപ്പിച്ചത്. ഇതിനോടൊപ്പം നൈറ്റ് ഷോപ്പിംഗും നടത്തി.ആരോഗ്യ വകുപ്പ് മന്ത്രി വീണാ ജോര്ജാണ് രാത്രി നടത്തത്തിന് നേതൃത്വം നല്കിയത്. പൊതുയിടങ്ങള് സ്ത്രീകള്ക്കും കൂടി അവകാശപ്പെട്ടതാണെന്ന് മന്ത്രി പറഞ്ഞു. സ്ത്രീകള്ക്ക് രാത്രിയില് സഞ്ചരിക്കാന് പറ്റാത്ത അവസ്ഥ മാറണം. ജോലി കഴിഞ്ഞിട്ട് പോകുന്ന സ്ത്രീകള്ക്കും പെണ്കുട്ടികള്ക്കും രാത്രിയിലും സഞ്ചാര സ്വാതന്ത്യം ഉണ്ടാകണം. ഇത് പൊതു സമൂഹത്തിന്റെ ഉത്തരവാദിത്തമാണ്. ഈ യാത്ര മറ്റുള്ള സ്ത്രീകള്ക്കും പ്രചോദനമാകണമെന്നും മന്ത്രി വീണ ജോർജ് വ്യക്തമാക്കി.
വനിത ശിശുവികസന ഡയറക്ടര് ടി.വി. അനുപമ, കളക്ടര് ഡോ. നവജ്യോത് ഖോസ, ലക്ഷ്മി നായര്, സിനി ആര്ട്ടിസ്റ്റുകളായ ഇന്ദുലേഖ, അഞ്ജിത, രാഖി രവീന്ദ്രന്, മീര അനില്, മേഘ്ന വിന്സെന്റ്, പ്രശസ്ത കവി മുരുകന് കാട്ടാക്കട തുടങ്ങിയവർ രാത്രി നടത്തത്തില് പങ്കെടുത്തു.
