ബെംഗളൂരു: സിലിക്കൺ സിറ്റിയിൽ ഓട്ടോ എൽപിജി പ്രതിസന്ധിക്ക് പിന്നാലെ പെട്രോൾ, ഡീസൽ വിതരണത്തിലും വൻ തടസ്സം നേരിടുന്നു. നഗരത്തിലെ പ്രധാന പൊതുമേഖലാ എണ്ണ വിതരണക്കാരായ ഹിന്ദുസ്ഥാൻ പെട്രോളിയം (എച്ച്പി), ഭാരത് പെട്രോളിയം (ബിപി) എന്നിവയുടെ കീഴിലുള്ള പമ്പുകളിലാണ് കഴിഞ്ഞ രണ്ട് ദിവസമായി ഇന്ധന സ്റ്റോക്ക് തീരുന്നത്. ഇതോടെ നഗരത്തിന്റെ വിവിധ ഭാഗങ്ങളിൽ വാഹനമോടിക്കുന്നവർ മണിക്കൂറുകളോളം ക്യൂ നിൽക്കേണ്ട അവസ്ഥയാണ്.
സ്വകാര്യ ഇന്ധന സ്റ്റേഷനുകളിലെ വില വർദ്ധനവ് മൂലം ഉപഭോക്താക്കൾ കൂട്ടത്തോടെ പൊതുമേഖലാ പമ്പുകളെ ആശ്രയിക്കാൻ തുടങ്ങിയതാണ് നിലവിലെ വിതരണ ശൃംഖലയെ തകിടം മറിച്ചത്. പെട്രോൾ പമ്പ് ഉടമകൾ മുൻകൂറായി പണം അടച്ചിട്ടുണ്ടെങ്കിലും ഓയിൽ ഡിപ്പോകളിൽ നിന്ന് പമ്പുകളിലേക്ക് കൃത്യസമയത്ത് ഇന്ധനം എത്തുന്നില്ലെന്ന് പരാതിയുണ്ട്. നിലവിൽ ഇന്ത്യൻ ഓയിൽ കോർപ്പറേഷന്റെ (ഐഒസി) പമ്പുകളിൽ വിതരണം സാധാരണ നിലയിലാണെങ്കിലും എച്ച്പി, ബിപി പമ്പുകളിൽ ബോർഡുകൾ തൂങ്ങിയത് ജനങ്ങളെ പരിഭ്രാന്തിയിലാക്കിയിട്ടുണ്ട്.
നഗരത്തിൽ അടുത്തിടെയുണ്ടായ ഓട്ടോ എൽപിജി, വാണിജ്യ സിലിണ്ടർ വില വർദ്ധനവ് സൃഷ്ടിച്ച ആഘാതം മാറുന്നതിന് മുൻപേയാണ് പുതിയ പ്രതിസന്ധി ഉടലെടുത്തിരിക്കുന്നത്. പാചകവാതക വില വർദ്ധനവ് പേയിംഗ് ഗസ്റ്റ് (പിജി) താമസ സൗകര്യങ്ങളുടെ വാടക ഉയർത്തുമോ എന്ന ആശങ്ക നിലനിൽക്കുന്നതിനിടെയാണ് ഇന്ധനക്ഷാമവും എത്തുന്നത്. ഓട്ടോ എൽപിജിക്ക് വേണ്ടി കിലോമീറ്ററുകളോളം ക്യൂ നിൽക്കുന്ന ദൃശ്യങ്ങൾ ഇപ്പോൾ പെട്രോൾ പമ്പുകൾക്ക് മുന്നിലും ആവർത്തിക്കുകയാണ്.
ചില പമ്പുകളിൽ ഇന്ന് ഭാഗികമായി ഇന്ധനം എത്തിയെങ്കിലും ആവശ്യകത നിറവേറ്റാൻ അത് മതിയാകുന്നില്ല. വിതരണത്തിലെ തടസ്സത്തെക്കുറിച്ച് എണ്ണ കമ്പനികളിൽ നിന്ന് വ്യക്തമായ വിശദീകരണം ലഭിക്കാത്തത് പമ്പ് ഉടമകളെയും വലയ്ക്കുന്നുണ്ട്. വരും ദിവസങ്ങളിലും വിതരണം പുനഃസ്ഥാപിച്ചില്ലെങ്കിൽ നഗരത്തിലെ ഗതാഗത സംവിധാനത്തെ ഇത് ഗുരുതരമായി ബാധിക്കുമെന്ന് ഉറപ്പാണ്.
ബെംഗളൂരുവാർത്തയുടെ ആൻഡ്രോയ്ഡ് ആപ്ലിക്കേഷൻ ഇപ്പോൾ ഗൂഗിൾ പ്ലേസ്റ്റോറിൽ ലഭ്യമാണ്, പോർട്ടലിൽ പ്രസിദ്ധീകരിക്കുന്ന വാർത്തകൾ വേഗത്തിൽ അറിയാൻ മൊബൈൽ ആപ്പ് ഇൻസ്റ്റാൾ ചെയ്യുക. If you cannot read Malayalam,Download BengaluruVartha Android app from Google play store and Click On the News Reader Button. [masterslider id="10"]
