ബെംഗളൂരു : വടക്കൻ കർണാടകയിലെ പ്രശസ്തമായ ബിങ്കടകട്ടി മൃഗശാലയിൽ മൃഗങ്ങൾക്കിടയിൽ മാരകമായ അണുബാധ സ്ഥിരീകരിച്ചു. രോഗം പടരാതിരിക്കാൻ മൃഗശാലയിലെ ഇരുന്നൂറിലധികം സസ്യഭുക്കുകളെ വനംവകുപ്പ് ക്വാറന്റൈനിലാക്കി. ഇതോടെ മൃഗശാലയിലെ പ്രധാന ഭാഗങ്ങൾ സന്ദർശിക്കുന്നതിന് വിനോദസഞ്ചാരികൾക്ക് നിയന്ത്രണം ഏർപ്പെടുത്തി.
നീലഗായുടെ മരണം മുന്നറിയിപ്പായി
ഫെബ്രുവരി 3-ന് മൃഗശാലയിലെ ഒരു നീലഗായ് ചത്തതോടെയാണ് രോഗവിവരം പുറത്തറിയുന്നത്. പോസ്റ്റ്മോർട്ടം പരിശോധനയിൽ ‘ഹെമറാജിക് സെപ്റ്റിസീമിയ’ (Hemorrhagic Septicemia) അഥവാ കരളിനെ ബാധിക്കുന്ന മാരകമായ അണുബാധയാണ് മരണകാരണമെന്ന് സ്ഥിരീകരിച്ചു. സസ്യഭുക്കുകൾക്കിടയിൽ അതിവേഗം പടരാൻ സാധ്യതയുള്ള രോഗമാണിത്. ഇതോടെയാണ് നീലഗായ്, കൃഷ്ണമൃഗം, മാൻ, കാട്ടുപോത്ത് എന്നിവയെ പാർപ്പിച്ചിരിക്കുന്ന ഇടങ്ങൾ പ്രത്യേക ‘ക്വാറന്റൈൻ സോൺ’ ആയി പ്രഖ്യാപിച്ചത്. മൃഗങ്ങളെ പുറത്തുനിന്ന് കാണാതിരിക്കാൻ പച്ച സ്ക്രീനുകൾ ഉപയോഗിച്ച് ഈ ഭാഗം താത്കാലികമായി അടച്ച നിലയിലാണ്.
മൃഗശാലയിലെ 37 നീലഗായ്കളെ പ്രത്യേകം നിരീക്ഷിക്കുന്നുണ്ട്. നാല് കീപ്പർമാരുടെ നേതൃത്വത്തിൽ ഇവയുടെ ആരോഗ്യം നിരന്തരം പരിശോധിച്ച വരികയാണ്. അടുത്ത 21 ദിവസത്തേക്ക് സസ്യഭുക്കുകളെ കർശന നിരീക്ഷണത്തിൽ വയ്ക്കാനാണ് അധികൃതരുടെ തീരുമാനം.
“ബെൽഗാം മൃഗശാലയിൽ അടുത്തിടെ കൃഷ്ണമൃഗങ്ങൾ സമാനമായ രോഗം ബാധിച്ച് ചത്ത സാഹചര്യത്തിൽ, ബിങ്കടകട്ടിയിൽ കൂടുതൽ ജാഗ്രത പുലർത്തുന്നുണ്ട്. സസ്യഭുക്കുകൾ ഒഴികെയുള്ള മറ്റ് മൃഗങ്ങളെ കാണാൻ പൊതുജനങ്ങൾക്ക് അനുവാദമുണ്ട്. എന്ന്
— സ്നേഹ കൊപ്പൽ, ആർ.എഫ്.ഒ (മൃഗശാല) വ്യക്തമാക്കി
സഞ്ചാരികൾക്ക് നിരാശ
മൃഗശാലയിലെ പ്രധാന ആകർഷണങ്ങളായ മാനുകളെയും കൃഷ്ണമൃഗങ്ങളെയും കാണുന്നതിന് നിയന്ത്രണം ഏർപ്പെടുത്തിയത് വിനോദസഞ്ചാരികളെയും മൃഗസ്നേഹികളെയും നിരാശരാക്കിയിട്ടുണ്ട്. എന്നാൽ മൃഗങ്ങളുടെ ജീവൻ സംരക്ഷിക്കുന്നതിനായി കർശന നടപടികളുമായി മുന്നോട്ട് പോകാനാണ് വനംവകുപ്പിന്റെ തീരുമാനം. അണുബാധ പൂർണ്ണമായും നിയന്ത്രണവിധേയമായ ശേഷം മാത്രമേ നിയന്ത്രണങ്ങൾ നീക്കുകയുള്ളൂ.
