Month: June 2025

ബെംഗളൂരു: ചാമരാജനഗർ ജില്ലയിലെ ബിലിഗിരിരംഗന ബേട്ട കടുവസംരക്ഷണകേന്ദ്രത്തിലെ ബേഡഗുളി മേഖലയിൽ കടുവയുടെ ആക്രമണത്തിൽ വീട്ടമ്മ മരിച്ചു. ചൊവ്വാഴ്ച രാവിലെയാണ് സംഭവം. ബെഡഗുളി സ്വദേശിനി ഹാദിയ രംഗമ്മ (55) ആണ് രാവിലെ നടക്കാൻപോയപ്പോൾ കടുവയുടെ ആക്രമണത്തിൽ മരിച്ചത്. തിങ്കളാഴ്ച രാത്രി ജോലികഴിഞ്ഞ് വീട്ടിലേക്കുമടങ്ങുന്ന യുവാവിന് ഇതേ കടുവയുടെ ആക്രമണത്തിൽ പരിക്കേറ്റിരുന്നു. രാമയ്യന പൊടിയ സ്വദേശിയായ രവിക്കാണ് പരിക്കേറ്റത്. നിലവിളികേട്ട് നാട്ടുകാർ ഓടിയെത്തി രവിയെ രക്ഷിക്കുകയായിരുന്നു. തലയ്ക്കും കൈകൾക്കും കാലുകൾക്കും പരിക്കേറ്റ രവിയെ ചാമരാജനഗർ സർക്കാർ ആശുപത്രിയിൽ പ്രവേശിപ്പിച്ചിരിക്കുകയാണ്.

ബെംഗളൂരു : മൈസൂരു -ബെംഗളൂരു എക്സ്പ്രസ് ഹൈവേയിൽ മദ്ദൂരിനടുത്തുള്ള അഗരലിംഗനദോഡിക്ക് സമീപം അതിവേഗമെത്തിയ കാർ ഡിവൈഡറിലിടിച്ചശേഷം എതിർദിശയിൽനിന്നുവന്ന മറ്റൊരു കാറിലിടിച്ച് അപകടം. ഞായറാഴ്ച രാത്രി പത്തുമണിക്ക് നടന്ന അപകടത്തിൽ രണ്ടുപേർ മരിക്കുകയും അഞ്ചുപേർക്ക് പരിക്കേൽക്കുകയും ചെയ്തു. ബെംഗളൂരു സ്വദേശികളായ മഖ്സൂദ് (21), അയാൻ (25) എന്നിവരാണ് മരിച്ചത്. ഇതേ കാറിലുണ്ടായിരുന്ന മുജാഹിദ് പാഷ, മറ്റൊരു കാറിലുണ്ടായിരുന്ന ബസവരാജ്, പാർവതി, നാഗരത്ന, നാഗരാജു എന്നിവർക്കാണ് ഗുരുതരമായി പരിക്കേറ്റത്. മദ്ദൂരിലെയും ചന്നപട്ടണയിലെയും ആശുപത്രികളിൽ ഇവർക്ക് പ്രഥമശുശ്രൂഷ നൽകിയശേഷം പിന്നീട് ബെംഗളൂരുവിലേക്കു മാറ്റി.  

ബെംഗളൂരു : നഗരത്തിൽ ഇനി പ്ലാസ്റ്റിക് കവറുകൾക്ക് പകരം ജൈവപാക്കറ്റുകളിൽ പാൽ കിട്ടും. ബെംഗളൂരു മിൽക്ക് യൂണിയൻ ലിമിറ്റഡാണ് (ബമുൽ) മണ്ണിൽ അലിഞ്ഞുചേരുന്ന പാക്കറ്റുകളിൽ പാൽ വിതരണംചെയ്യുക. ആറുമാസത്തിനകം മണ്ണിൽ അലിഞ്ഞുചേരുന്നതിനാൽ പ്ലാസ്റ്റിക്പോലെ മലിനീകരണപ്രശ്നമുണ്ടാക്കുന്നില്ല. നിർമാണച്ചെലവ് കൂടുതലാണെങ്കിലും പാരിസ്ഥിതികമായ ഗുണം പരിഗണിച്ചാണ് ജൈവപാക്കറ്റിലേക്ക് മാറാൻ ബമുൽ തീരുമാനിച്ചത്. നഗരത്തിൽ ദിവസം 14 ലക്ഷം ലിറ്റർ പാലാണ് ബമുൽ വിൽക്കുന്നത്. ഇതിനായി പ്രതിദിനം 25 ലക്ഷം പാൽപാക്കറ്റുകൾ വേണ്ടിവരും. കാഴ്ചയിൽ പ്ലാസ്റ്റിക് കവർപോലെത്തന്നെയാണ് ജൈവപാക്കറ്റും. ഇത് നിർമിക്കാൻ ഉപയോഗിക്കുന്ന പ്രധാന അസംസ്കൃതവസ്തു ചോളപ്പശയാണ്. പരീക്ഷണാർഥം തുടങ്ങിയ…

ബെംഗളൂരു : ബിഎംടിസി കെംപെഗൗഡ വിമാനത്താവളത്തിലേക്ക് വൈദ്യുതി എസി ബസുകൾ ഈ മാസം 15-നുശേഷം ആരംഭിക്കും. നഗരത്തിലെ വിവിധ സ്ഥലങ്ങളിൽനിന്ന് വിമാനത്താവളത്തിലേക്കുള്ള വായുവജ്ര സർവീസിന്റെ ഭാഗമായിട്ടാണ് ഇ-ബസുകൾ നിരത്തിലിറക്കുന്നത്. തുടക്കത്തിൽ 10-ൽ താഴെ ബസുകളായിരിക്കും സർവീസ് നടത്തുന്നത്. പിന്നീട് എണ്ണം വർധിപ്പിക്കും. ആകെ 83 ഇ-ബസുകൾ ഉപയോഗിച്ച് സർവീസ് നടത്താനാണ് ലക്ഷ്യമിടുന്നത്.