Month: August 2025

ബെംഗളൂരു : ഭക്ഷ്യവിഷബാധയെത്തുടർന്ന് ചിക്കമഗളൂരുവിലെ റെസിഡൻഷ്യൽ സ്കൂളിലെ നാല് വിദ്യാർഥികളെ ആശുപത്രിയിൽ പ്രവേശിപ്പിച്ചു. കല്യാണനഗറിലെ അൽദൂർ അംബേദ്കർ റെസിഡൻഷ്യൽ സ്കൂളിലെ വിദ്യാർഥികളാണ് കഴിഞ്ഞദിവസം ഉച്ചഭക്ഷണം കഴിച്ചതിനെത്തുടർന്ന് ഛർദിച്ചത്. ഇവരെ ഉടൻ ആശുപത്രിയിലെത്തിച്ചു. വിദ്യാർഥികളുടെ ആരോഗ്യസ്ഥിതി മെച്ചപ്പെട്ടുവെന്ന് സ്കൂൾ അധികൃതർ അറിയിച്ചു.

തിരുവനന്തപുരത്ത് നിന്ന് ഡൽഹിയിലേക്ക് പറന്ന എയർ ഇന്ത്യ 2455 വിമാനം ചെന്നൈയിൽ അടിയന്തര ലാൻഡിംഗ് നടത്തിയതിൽ വിശദീകരണവുമായി എയർ ഇന്ത്യ. റൺവേയിൽ മറ്റൊരു വിമാനം ഉണ്ടായിരുന്നില്ലെന്നും സംഭവിച്ചത് ​ഗോ എറൗണ്ട് എന്നും എയർ ഇന്ത്യ വിശദീകരിച്ചു. ഇത്തരം സാഹചര്യങ്ങൾ നേരിടാൻ പൈലറ്റുമാർ സജ്ജരാണ്. റൺവേയിൽ മറ്റൊരു വിമാനം ഉണ്ടായിരുന്നെന്ന വാദവും എയർ ഇന്ത്യ തള്ളി. കെ.സി വേണുഗോപാൽ, കൊടിക്കുന്നിൽ സുരേഷ്, അടൂർ പ്രകാശ്, കെ.രാധാകൃഷ്ണൻ, റോബർട്ട് ബ്രൂസ് എന്നീ എംപിമാരും വിമാനത്തിലുണ്ടായിരുന്നു. സാങ്കേതിക തകരാറിന്റെ കാരണം കണ്ടെത്തുന്നതിനായി എയർ ഇന്ത്യ ആഭ്യന്തര അന്വേഷണം പ്രഖ്യാപിച്ചിട്ടുണ്ട്.

ബെംഗളൂരു : നഗരത്തിലെ ചാമരാജേന്ദ്ര മൃഗശാലയിലെ രക്ഷിത എന്ന പെൺ സിംഹം ഇന്നലെ ചത്തു.. 21 കാരിയായ രക്ഷിത വാർദ്ധക്യസഹജമായ അസുഖങ്ങൾക്ക് ഒരാഴ്ചയായി ചികിത്സയിലായിരുന്നു. 2004 ഏപ്രിൽ 1 ന് മൈസൂരു മൃഗശാലയിൽ ഉണ്ടായിരുന്ന സിംഹത്തിനും മാനിനി എന്ന പെൺസിംഹത്തിനും ജനിച്ചതാണ് രക്ഷിത. അന്നുമുതൽ, മൃഗശാലയിലെ ഒരു ജനപ്രിയ ആകർഷണമായിരുന്നു രക്ഷിത. രക്ഷിതയുടെ മരണത്തിൽ മൃഗശാല മാനേജ്‌മെന്റും, വെറ്ററിനറി സംഘവും, മൃഗസംരക്ഷണ സംഘവും അഗാധമായ ദുഃഖം രേഖപ്പെടുത്തി, സിംഹത്തിന്റെ മരണം വലിയൊരു നഷ്ടമാണെന്ന് പറഞ്ഞു.

ബെംഗളൂരു : കർണാടക നിയമസഭയുടെ വർഷകാല സമ്മേളനത്തിന് തിങ്കളാഴ്ച തുടക്കമാകും. 12 ദിവസം നീണ്ടുനിൽക്കുന്ന സമ്മേളനത്തിനാണ് തുടക്കം കുറിക്കുന്നത്. ലോക്‌സഭാ പ്രതിപക്ഷനേതാവ് തുടക്കമിട്ട വോട്ടുതട്ടിപ്പ് ആരോപണം കർണാടകത്തിൽ കത്തിപ്പടരുന്നതിനിടെയാണ് സഭാ സമ്മേളനം തുടങ്ങുന്നത്. നിയമസഭയ്ക്കകത്ത് ഇതുമായി ബന്ധപ്പെട്ട് ഭരണ-പ്രതിപക്ഷ അംഗങ്ങൾ തമ്മിൽ കൊമ്പുകോർക്കലുണ്ടാകുമെന്ന് സൂചനയുണ്ട്. പ്രധാനപ്പെട്ട ഒട്ടേറെ ബില്ലുകൾ ഇത്തവണ സഭയുടെ പരിഗണനയ്ക്ക് വരുന്നുണ്ട്.

ബെംഗളൂരു,: ബെംഗളൂരു ഉൾപ്പെടെ കർണാടകയിലെ 17 ജില്ലകളിലും ഓഗസ്റ്റ് 17 വരെ ശക്തമായ മഴയ്ക്ക് സാധ്യതയുണ്ടെന്ന് കാലാവസ്ഥാ നിരീക്ഷണ കേന്ദ്രം അറിയിച്ചു. ബാഗൽകോട്ട്, ബെൽഗാം, ബിദർ, കലബുറഗി, കോപ്പൽ, റായ്ച്ചൂർ, വിജയപുര, യാദ്ഗിരി, ബെംഗളൂരു റൂറൽ, ചിക്കബെല്ലാപൂർ, ചിത്രദുർഗ, മൻസൻഗരെ, മൈസൂരു, ബെംഗളൂരു സിറ്റി, ചാമരാജനഗർ, ഗദഗ്, ധാർവാഡ്, ഉത്തര കന്നഡ, ദക്ഷിണ കന്നഡ, ഉഡുപ്പി, ശിവമോഗ, രാമനഗര, കുടക്, ചിക്കമംഗളൂരു, വിജയനഗർ എന്നിവിടങ്ങളിലാണ് മഴ മുന്നറിയിപ്പ് ഉള്ളത്.