ഹൈദരാബാദ്: ടോളിവുഡ് താരം സാമന്തയുടെ സിനിമാ ലോകത്തേക്കുള്ള തിരിച്ചുവരവ് വൻ വിജയമായി മാറുന്നു. സാമന്ത ആദ്യമായി നിർമ്മാണ പങ്കാളിയാവുകയും പ്രധാന വേഷത്തിൽ അഭിനയിക്കുകയും ചെയ്ത ‘മാ ഇൻതി ബംഗാരം’ എന്ന ചിത്രം ബോക്സ് ഓഫീസിൽ മികച്ച കളക്ഷനാണ് നേടുന്നത്. ജൂൺ 19-ന് തിയേറ്ററുകളിലെത്തിയ ചിത്രം റിലീസ് ചെയ്ത് വെറും നാല് ദിവസത്തിനുള്ളിൽ ലോകമെമ്പാടുനിന്നുമായി 46.04 കോടി രൂപയുടെ മൊത്തം കളക്ഷൻ സ്വന്തമാക്കി കഴിഞ്ഞു.
ബോക്സ് ഓഫീസ് കണക്കുകൾ പരിശോധിക്കുമ്പോൾ, നാലാം ദിവസം മാത്രം ഇന്ത്യയിൽ നിന്ന് 4.10 കോടി രൂപയാണ് ചിത്രം നേടിയത്. ഇതോടെ രാജ്യത്തെ മൊത്തം ഗ്രോസ് കളക്ഷൻ 31.44 കോടി രൂപയായി ഉയർന്നു. വിദേശത്ത് നാലാം ദിവസം ഒരു കോടി രൂപ നേടിയതോടെ അവിടുത്തെ ആകെ കളക്ഷൻ 14.60 കോടി രൂപയിലെത്തി. നന്ദിനി റെഡ്ഡി സംവിധാനം ചെയ്ത ഈ ചിത്രത്തിൽ ദിഗന്ത്, ശ്രീമുഖി, ഗൗതമി എന്നിവരും പ്രധാന വേഷങ്ങളിൽ അണിനിരക്കുന്നുണ്ട്.
വൈറലായി ബേബി ബമ്പ് ചിത്രങ്ങളും സാമന്തയുടെ ആ പഴയ വെളിപ്പെടുത്തലും
ചിത്രത്തിന്റെ വൻ വിജയത്തോടൊപ്പം പ്രമോഷൻ പരിപാടികൾക്കിടെ സാമന്തയുടെ ബേബി ബമ്പ് ഫോട്ടോകൾ സോഷ്യൽ മീഡിയയിൽ വൈറലായതും വലിയ ചർച്ചകൾക്ക് വഴിവെച്ചു. ഇതോടെ, മുൻപ് മാതൃത്വത്തെക്കുറിച്ചും കുട്ടികളെക്കുറിച്ചും സാമന്ത ഒരു അഭിമുഖത്തിൽ പങ്കുവെച്ച വാക്കുകൾ ഇപ്പോൾ വീണ്ടും ആരാധകർക്കിടയിൽ തരംഗമാവുകയാണ്.
തന്റെ കുട്ടിക്കാലത്ത് ഒരുപാട് കഷ്ടപ്പാടുകൾ നേരിട്ടിട്ടുണ്ടെന്നും അത്തരമൊരു സാഹചര്യത്തിലൂടെ കടന്നുപോയ ഏതൊരാളെയും പോലെ സ്വന്തം കുട്ടികൾക്ക് ഏറ്റവും ആഡംബരപൂർണ്ണമായ ജീവിതം നൽകാനാണ് താൻ ആഗ്രഹിക്കുന്നതെന്നും സാമന്ത അന്ന് വ്യക്തമാക്കിയിരുന്നു.
ജോലി ചെയ്യുന്നതോടൊപ്പം കുട്ടികളെയും വീട്ടുജോലികളെയും ഒരേപോലെ പരിപാലിക്കുന്ന സ്ത്രീകളോട് തനിക്ക് വലിയ ബഹുമാനമുണ്ടെന്നും നടി കൂട്ടിച്ചേർത്തു. തനിക്കൊരു കുഞ്ഞുണ്ടായാൽ കുറച്ചു വർഷത്തേക്ക് അവരെ മറ്റെങ്ങും വിടാതെ, തന്റെ സർവ്വസ്വവുമായി കണ്ട് അത്രയേറെ സ്നേഹത്തോടെയും കരുതലോടെയും കൂടെ നിർത്തുമെന്നായിരുന്നു സാമന്തയുടെ വാക്കുകൾ.
സാമന്തയുടെ ഈ പഴയ അഭിമുഖം വീണ്ടും ശ്രദ്ധനേടിയതോടെ, സാമന്ത-രാജ് ദമ്പതികളിൽ നിന്നും ഉടൻ തന്നെ ഒരു സന്തോഷവാർത്ത കേൾക്കാനായുള്ള കാത്തിരിപ്പിലാണ് ആരാധകർ. കുഞ്ഞിന്റെ ജനനത്തിന് ശേഷം താരം കുറച്ചുകാലത്തേക്ക് സിനിമാ മേഖലയിൽ നിന്ന് വിട്ടുനിൽക്കാനുള്ള സാധ്യതയുണ്ടെന്ന വിലയിരുത്തലുകളും സിനിമാ ലോകത്ത് സജീവമാണ്.
