തിരുവനന്തപുരം കിളിമാനൂരില് മന്ത്രവാദത്തിന്റെ മറവില് പീഡനം നടത്തിയ കേസില് ജ്യോത്സ്യൻ അറസ്റ്റില്. കടയ്ക്കല് സ്വദേശി ശരത് ബാബു ആണ് പിടിയിലായത്. പ്രായപൂര്ത്തിയാവാത്ത പെണ്കുട്ടികളാണ് പീഡനത്തിന് ഇരയായത്.
അമ്മയും രണ്ടു പെണ്കുട്ടികളുമാണ് വീട്ടില് താമസിച്ചിരുന്നത്. അമ്മയുടെ പേരിലുള്ള ഭൂമിയുടെ വിൽപനയുമായി ബന്ധപ്പെട്ട് ചില പ്രശ്നങ്ങള് ഉണ്ടായിരുന്നു. ഇത് തീര്ക്കുന്നതിനായാണ് കുടുംബം ശരത് ബാബുവിനെ സമീപിച്ചത്. പിന്നാലെ ഭൂമിയുടെ വില്പന നടന്നു. ഇതോടെ ഇയാളിലുള്ള കുടുംബത്തിന്റെ വിശ്വാസ്യത വർധിച്ചു. ഇതിന് ശേഷം ഇയാള് വീട്ടില് നിത്യസന്ദര്ശകനായി. അമ്മയുടെ ദോഷം മാറ്റാന് ലൈംഗിക ബന്ധത്തിൽ ഏർപ്പെടണമെന്ന് പറഞ്ഞ് വിശ്വസിപ്പിച്ച് ഇയാള് പെണ്കുട്ടികളെ നിരന്തരം ഉപദ്രവിച്ചു എന്നതാണ് പരാതിയില് പറയുന്നത്.
2024 ഏപ്രില് മുതല് 2026 മാര്ച്ച് വരെ നീളുന്ന ലൈംഗികാതിക്രമമാണ് നടന്നത്. ഒടുവില് നിവൃത്തിയില്ലാതെ മൂത്ത സഹോദരി അമ്മയോട് കാര്യങ്ങള് തുറന്നുപറയുകയായിരുന്നു. തുടര്ന്ന് പെണ്കുട്ടികളെ കൗണ്സിലിങ്ങ് നടത്തിയപ്പോഴാണ് ഇയാളില് നിന്ന് ലൈംഗികാതിക്രമം നേരിട്ടിരുന്നു എന്ന കാര്യം പെണ്കുട്ടികള് വെളിപ്പെടുത്തിയത്. ഇതിന് പിന്നാലെ ഇയാള്ക്കെതിരെ പോലീസ് കേസെടുത്തു. കേസെടുത്തതിന് പിന്നാലെ ഒളിവില് പോയ പ്രതിയെ തിരച്ചിലിന് ഒടുവിലാണ് പിടികൂടിയത്.
അമ്മയുടെ ദോഷങ്ങൾ മാറാൻ പെൺകുട്ടികൾ ലൈംഗിക ബന്ധത്തിൽ ഏർപ്പെടണമെന്ന് പറഞ്ഞു വിശ്വസിപ്പിച്ച് പീഡനം; ജ്യോത്സ്യൻ പിടിയിൽ
