ബെംഗളൂരു : ചാമുണ്ഡേശ്വരി മണ്ഡലം മുഖ്യമന്ത്രി സിദ്ധരാമയ്യയ്ക്കു സുരക്ഷിതമല്ലെന്ന്, ഇന്റലിജൻസ് എഡിജിപിയുടേതെന്ന പേരിൽ പ്രചരിക്കുന്ന റിപ്പോർട്ട് വ്യാജമാണെന്നു മുഖ്യമന്ത്രിയുടെ ഓഫിസ്. ഇത്തരം വ്യാജ റിപ്പോർട്ട് എങ്ങിനെ ഉണ്ടായെന്ന് അന്വേഷിക്കാൻ ഇന്റലിജൻസ് ഡിഐജിയോട് ആവശ്യപ്പെട്ടിട്ടുണ്ട്. ഇന്റലിജൻസ് വിഭാഗം ഇത്തരത്തിൽ ഒരു റിപ്പോർട്ടും നൽകിയിട്ടില്ല.
സമൂഹ മാധ്യമങ്ങളിലൂടെ ഇപ്പോൾ പ്രചരിക്കുന്ന വാർത്ത കെട്ടിച്ചമച്ചതാണ്. ഇന്റലിജൻസ് എഡിജിപിയുടെ തസ്തിക ഒഴിഞ്ഞുകിടക്കുകയാണ്. മാത്രമല്ല, ഇന്റലിജൻസ് റിപ്പോർട്ട് സാധാരണ കന്നഡയിലാണ് ഇറക്കുകയെന്നും ഇംഗ്ലിഷിൽ അല്ലെന്നും മുഖ്യമന്ത്രിയുടെ ഓഫിസ് പ്രസ്താവനയിലൂടെ അറിയിച്ചു.
