തിരുവനന്തപുരം: പുതിയ മുഖ്യമന്ത്രിയെ തിരഞ്ഞെടുക്കുന്നതുമായി ബന്ധപ്പെട്ട് അസാധാരണമായ കാലതാമസം ഉണ്ടായിട്ടില്ലെന്ന് മുതിർന്ന കോൺഗ്രസ് നേതാവ് തിരുവഞ്ചൂർ രാധാകൃഷ്ണൻ. ഇത്തരം സുപ്രധാന തീരുമാനങ്ങളിൽ എന്നും അവസാന വാക്ക് ദേശീയ നേതൃത്വത്തിന്റേതാണെന്നും അദ്ദേഹം വ്യക്തമാക്കി. ദേശീയ നേതൃത്വം കൈക്കൊള്ളുന്ന തീരുമാനം പൂർണ്ണമായും അംഗീകരിക്കുക എന്നതാണ് പാർട്ടിയുടെ നയമെന്ന് അദ്ദേഹം വാർത്താസമ്മേളനത്തിൽ പറഞ്ഞു.
മുഖ്യമന്ത്രിയെ നിശ്ചയിക്കുന്നതിൽ കാലതാമസം നേരിടുന്നു എന്ന തരത്തിലുള്ള വിമർശനങ്ങൾ രാഷ്ട്രീയ കേന്ദ്രങ്ങളിൽ ചർച്ചയാകുന്ന പശ്ചാത്തലത്തിലാണ് തിരുവഞ്ചൂരിന്റെ പ്രതികരണം. സ്വാഭാവികമായ നടപടിക്രമങ്ങൾ മാത്രമാണ് ഇപ്പോൾ നടക്കുന്നത്. ഘടകകക്ഷികളുടെ ഭാഗത്തുനിന്നുള്ള വിമർശനങ്ങളും നിർദ്ദേശങ്ങളും പാർട്ടി ഗൗരവമായി തന്നെ പരിഗണിക്കുമെന്നും അദ്ദേഹം ഉറപ്പുനൽകി. എല്ലാവരെയും വിശ്വാസത്തിലെടുത്ത് ഐക്യത്തോടെ മുന്നോട്ടുപോകാനാണ് കോൺഗ്രസ് ആഗ്രഹിക്കുന്നതെന്നും തിരുവഞ്ചൂർ രാധാകൃഷ്ണൻ കൂട്ടിച്ചേർത്തു.
