ബെംഗളൂരു: മൺസൂൺ വൈകിയാണെങ്കിലും ശക്തമായതോടെ കർണാടകയുടെ വിവിധ ഭാഗങ്ങളിൽ കനത്ത മഴ തുടരുന്നു. വരും ദിവസങ്ങളിലും മഴ ശക്തമാകുമെന്ന പ്രവചനങ്ങളുടെ പശ്ചാത്തലത്തിൽ മുൻകരുതൽ നടപടിയായി ഉത്തര കന്നഡ, ചിക്കമഗളൂരു, ബെലഗാവി, ശിവമോഗ, ഹാസൻ ഉൾപ്പെടെയുള്ള വിവിധ ജില്ലകളിലെ സ്കൂളുകൾക്കും കോളേജുകൾക്കും ഇന്ന് (ജൂലൈ 07, ചൊവ്വാഴ്ച) ബന്ധപ്പെട്ട ജില്ലാ ഭരണകൂടങ്ങൾ അവധി പ്രഖ്യാപിച്ചു. കനത്ത മഴയെത്തുടർന്ന് പലയിടങ്ങളിലും ജനജീവിതം ദുരിതത്തിലായ സാഹചര്യത്തിലാണ് വിദ്യാർത്ഥികളുടെ സുരക്ഷ മുൻനിർത്തിയുള്ള നടപടി.
ഉത്തര കന്നഡ ജില്ലയിൽ കാലവർഷം കനത്ത നാശം വിതയ്ക്കുന്ന സാഹചര്യത്തിൽ റെഡ് അലേർട്ട് പ്രഖ്യാപിച്ചിട്ടുണ്ട്. മുൻകരുതൽ നടപടിയായി ജില്ലയിലെ സിർസി, സിദ്ധാപൂർ, ജോയ, ദണ്ഡേലി, യെല്ലാപൂർ എന്നീ അഞ്ച് താലൂക്കുകളിലെ അംഗൻവാടികൾ, പ്രൈമറി, ഹൈസ്കൂളുകൾ എന്നിവയ്ക്കാണ് ഉത്തര കന്നഡ ഡെപ്യൂട്ടി കമ്മീഷണർ ലക്ഷ്മി പ്രിയ അവധി പ്രഖ്യാപിച്ചത്.
മലനാട് മേഖലയിൽ ഉൾപ്പെടുന്ന ചിക്കമഗളൂരു ജില്ലയിലും കനത്ത മഴ തുടരുകയാണ്. ഇതേത്തുടർന്ന് കൊപ്പ, ശൃംഗേരി, കലാസ എന്നീ മൂന്ന് താലൂക്കുകളിലെ എല്ലാ അങ്കണവാടികൾക്കും പ്രൈമറി, ഹൈസ്കൂളുകൾക്കും ജില്ലാ കളക്ടർ ഭൻവർ സിംഗ് മീണ അവധി നൽകി ഉത്തരവിറക്കി.
ബെലഗാവി ജില്ലയിലും പശ്ചിമഘട്ട മേഖലയിലും വ്യാപകമായ മഴ തുടരുന്ന സാഹചര്യത്തിൽ ബെലഗാവി, ഖാനാപൂർ താലൂക്കുകളിലെ നഗര, ഗ്രാമപ്രദേശങ്ങളിലെ എല്ലാ വിദ്യാഭ്യാസ സ്ഥാപനങ്ങൾക്കും ഡെപ്യൂട്ടി കമ്മീഷണർ മുഹമ്മദ് റോഷൻ ഒരു ദിവസത്തെ അവധി പ്രഖ്യാപിച്ചു. അംഗൻവാടികൾ, പ്രൈമറി സ്കൂളുകൾ, ഹൈസ്കൂളുകൾ എന്നിവയ്ക്ക് പുറമേ പിയു (പ്രീ-യൂണിവേഴ്സിറ്റി) കോളേജുകൾക്കും ഈ അവധി ബാധകമായിരിക്കും.
തുടർച്ചയായ മഴയെത്തുടർന്ന് ശിവമോഗ ജില്ലയിലെ സാഗർ, തീർത്ഥഹള്ളി, ഹൊസനഗർ എന്നീ മൂന്ന് താലൂക്കുകളിലെ അംഗൻവാടികൾക്കും സ്കൂളുകൾക്കും കോളേജുകൾക്കും ചൊവ്വാഴ്ച തഹസിൽദാരുടെ നിർദ്ദേശപ്രകാരം അവധി പ്രഖ്യാപിച്ചിട്ടുണ്ട്. മഴ കാരണം നഷ്ടപ്പെടുന്ന അധ്യയന ദിവസങ്ങൾക്ക് വരും ദിവസങ്ങളിൽ ക്ലാസുകൾ നടത്തി നഷ്ടപരിഹാരം നൽകാൻ സ്കൂൾ മാനേജ്മെന്റുകളോട് അധികൃതർ നിർദ്ദേശിച്ചിട്ടുണ്ട്.
കഴിഞ്ഞ അഞ്ച് ദിവസമായി കനത്ത മഴയും ഇടിമിന്നലും തുടരുന്ന ഹാസൻ ജില്ലയിലെ സകലേശ്പൂർ താലൂക്കിലും ഇന്ന് ജാഗ്രതയുടെ ഭാഗമായി അവധിയാണ്. താലൂക്കിലെ എല്ലാ അംഗൻവാടികൾ, പ്രൈമറി-ഹൈസ്കൂളുകൾ, കോളേജുകൾ എന്നിവയ്ക്ക് അവധി ബാധകമായിരിക്കുമെന്ന് തഹസിൽദാർ സുപ്രിത അറിയിച്ചു. വരും മണിക്കൂറുകളിലും മഴ ശക്തമായി തുടരുമെന്നാണ് കാലാവസ്ഥാ പ്രവചനം.
