ബെംഗളൂരു: ജിമ്മിന്റെ വാർഷികാഘോഷത്തിനിടെയുണ്ടായ തർക്കത്തെത്തുടർന്ന് ബംഗളൂരുവിൽ 25 വയസ്സുകാരനായ ജിം ട്രെയിനർ ദാരുണമായി കൊല്ലപ്പെട്ടു. വടക്കൻ ബംഗളൂരുവിലെ സഹാകർ നഗറിലുള്ള അപ്പാർട്ട്‌മെന്റിൽ ശനിയാഴ്ച രാത്രിയാണ് സംഭവം നടന്നത്. കൊല്ലപ്പെട്ടത് ജിം ട്രെയിനറായ നന്ദൻ ആണെന്ന് പോലീസ് സ്ഥിരീകരിച്ചു. സംഭവവുമായി ബന്ധപ്പെട്ട് നന്ദന്റെ സുഹൃത്തുക്കളായ നാലുപേരെ അമൃതഹള്ളി പോലീസ് കസ്റ്റഡിയിലെടുത്ത് ചോദ്യം ചെയ്തുവരികയാണ്.
അപ്പാർട്ട്‌മെന്റിന്റെ 16-ാം നിലയിലെ ഫ്ലാറ്റിൽ നടന്ന ജിം വാർഷികാഘോഷ പരിപാടിക്കിടെയാണ് ദാരുണമായ സംഭവം അരങ്ങേറിയത്. ആഘോഷങ്ങൾക്കിടെ നന്ദനും വിശ്വനാഥ് എന്നയാളും തമ്മിൽ നിസ്സാര കാര്യത്തെച്ചൊല്ലി വാക്കുതർക്കമുണ്ടാകുകയായിരുന്നു. താൻ വിശ്വനാഥന്റെ ശിഷ്യനാണെന്ന് മറ്റുള്ളവരുടെ മുന്നിൽ വെച്ച് വിശേഷിപ്പിച്ചതിനെ നന്ദൻ ചോദ്യം ചെയ്തതാണ് തർക്കത്തിന് തുടക്കമിട്ടത്. വാക്കുതർക്കം പിന്നീട് കയ്യാങ്കളിയിലേക്ക് വഴിവെച്ചു. ഫ്ലാറ്റിലെ ബാത്ത്‌റൂമിൽ വെച്ചുണ്ടായ സംഘർഷത്തിൽ മൂർച്ചയേറിയ ചില്ലുകഷണം കൊണ്ട് തലയ്ക്ക് ഗുരുതരമായി പരിക്കേറ്റാണ് നന്ദൻ വീണത്.
ആക്രമണത്തിൽ നന്ദന് ഗുരുതരമായി പരിക്കേറ്റ് രക്തം വാർന്നിട്ടും ഒപ്പമുണ്ടായിരുന്നവർ ആശുപത്രിയിലെത്തിക്കാനോ അടിയന്തര വൈദ്യസഹായം നൽകാനോ തയ്യാറായില്ലെന്ന് പോലീസ് പറഞ്ഞു. മണിക്കൂറുകളോളം രക്തം വാർന്നു കിടന്ന നന്ദനെ പിന്നീട് സ്വകാര്യ ആശുപത്രിയിൽ എത്തിച്ചെങ്കിലും അതിനോടകം മരണം സംഭവിച്ചിരുന്നു. പരിക്കേറ്റ ഉടൻ തന്നെ ആശുപത്രിയിൽ എത്തിച്ചിരുന്നെങ്കിൽ നന്ദന്റെ ജീവൻ രക്ഷിക്കാമായിരുന്നുവെന്ന് അമൃതഹള്ളി പോലീസ് സ്റ്റേഷനിലെ മുതിർന്ന ഉദ്യോഗസ്ഥൻ പ്രാഥമിക അന്വേഷണത്തിന് ശേഷം വ്യക്തമാക്കി.
മകന്റെ മരണത്തിൽ ദുരൂഹതയുണ്ടെന്ന് കാട്ടി നന്ദന്റെ അമ്മ നൽകിയ പരാതിയുടെ അടിസ്ഥാനത്തിൽ പോലീസ് കൊലപാതകത്തിന് കേസെടുത്തിട്ടുണ്ട്. പോലീസ് വിളിച്ച് ആശുപത്രിയിലെത്താൻ ആവശ്യപ്പെട്ടപ്പോഴാണ് സംഭവത്തെക്കുറിച്ച് അറിയുന്നതെന്ന് ബന്ധുക്കൾ പറഞ്ഞു. യാതൊരുവിധ ദുശ്ശീലങ്ങളുമില്ലാത്ത ഉത്തരവാദിത്തമുള്ള യുവാവായിരുന്നു നന്ദനെന്നും പെട്ടെന്നുണ്ടായ ദുരന്തത്തിൽ ഞെട്ടിയിരിക്കുകയാണെന്നും ബന്ധുവായ പ്രസന്ന പ്രതികരിച്ചു.
പാർട്ടിയിൽ പങ്കെടുത്തവരുടെ മൊഴികൾ രേഖപ്പെടുത്തിവരികയാണ്. കൂടാതെ ഫ്ലാറ്റിലെ സിസിടിവി ദൃശ്യങ്ങൾ പരിശോധിച്ച് സംഭവത്തിന്റെ കൃത്യമായ വിവരങ്ങളും ആക്രമണത്തിൽ പങ്കെടുത്തവരെയും തിരിച്ചറിയാനുള്ള ശ്രമത്തിലാണ് പോലീസ്.
ബെംഗളൂരുവാർത്തയുടെ ആൻഡ്രോയ്ഡ് ആപ്ലിക്കേഷൻ ഇപ്പോൾ ഗൂഗിൾ പ്ലേസ്റ്റോറിൽ ലഭ്യമാണ്, പോർട്ടലിൽ പ്രസിദ്ധീകരിക്കുന്ന വാർത്തകൾ വേഗത്തിൽ അറിയാൻ മൊബൈൽ ആപ്പ് ഇൻസ്റ്റാൾ ചെയ്യുക. If you cannot read Malayalam,Download BengaluruVartha Android app from Google play store and Click On the News Reader Button. [masterslider id="10"]
