ബെംഗളൂരു: പിതാവിന്റെ അപ്രതീക്ഷിത വേർപാടിനെത്തുടർന്ന് അമ്മയ്ക്ക് കൂട്ടായിരിക്കാനും സ്വന്തം സമയത്തിന് മുൻഗണന നൽകാനുമായി കോർപ്പറേറ്റ് ഐടി ജോലി ഉപേക്ഷിച്ച് റാപ്പിഡോ ഓട്ടോ ഡ്രൈവറായി മാറി യുവതി. തൻവി എന്ന ഡിജിറ്റൽ കണ്ടന്റ് ക്രിയേറ്റർ ഇൻസ്റ്റാഗ്രാമിൽ പങ്കുവെച്ച വീഡിയോയിലൂടെയാണ് ബെംഗളൂരു സ്വദേശിയായ യുവതിയുടെ പ്രചോദനാത്മകമായ ഈ ജീവിതകഥ പുറത്തുവന്നത്.
ഐടി മേഖലയിലെ നൈറ്റ് ഷിഫ്റ്റ് ജോലിയുടെ തിരക്കുകൾക്കിടയിലാണ് യുവതിക്ക് പിതാവിനെ നഷ്ടമാകുന്നത്. ഇതോടെ ഒറ്റയ്ക്കായ അമ്മയെ പരിചരിക്കാനും അവർക്കൊപ്പം സമയം ചെലവഴിക്കാനും ജോലിയിലെ അമിത ജോലിഭാരം തടസ്സമായി. തുടർന്ന് അമ്മയ്ക്ക് തണലാകാൻ ഐടി ജോലി ഉപേക്ഷിക്കാൻ ഇവർ തീരുമാനിക്കുകയായിരുന്നു. ആദ്യഘട്ടത്തിൽ കുടുംബത്തിൽ നിന്ന് എതിർപ്പുകൾ ഉയർന്നെങ്കിലും, തന്റെ അന്നത്തെ സാഹചര്യത്തിന് ഏറ്റവും അനുയോജ്യമായ വഴി എന്ന നിലയിൽ യുവതി ഓട്ടോ ഡ്രൈവിംഗ് തൊഴിലായി തിരഞ്ഞെടുക്കുകയായിരുന്നു.
ഏതൊരു തൊഴിലിനുമുള്ള മാന്യത ഉയർത്തിപ്പിടിക്കുന്ന യുവതി, താൻ മുൻപ് ചെയ്തിരുന്ന ഐടി ജോലിയേക്കാൾ കൂടുതൽ വരുമാനം ഇപ്പോൾ ഓട്ടോ ഓടിക്കുന്നതിലൂടെ ലഭിക്കുന്നുണ്ടെന്ന് വ്യക്തമാക്കുന്നു. യാത്രക്കാരുമായുള്ള സംഭാഷണത്തിനിടെ മുൻപ് ജോലി ചെയ്തിരുന്ന വിവരവും ഇംഗ്ലീഷ് ഭാഷയിലുള്ള നൈപുണ്യവും കേട്ട് പലരും അത്ഭുതപ്പെടാറുണ്ട്. “നന്നായി ഇംഗ്ലീഷ് സംസാരിക്കാൻ അറിയാവുന്ന നിങ്ങളെന്തിനാണ് ഓട്ടോ ഓടിക്കുന്നത്?” എന്ന ചോദ്യം തനിക്ക് പലപ്പോഴും നേരിടേണ്ടി വന്നിട്ടുണ്ടെന്ന് ഇവർ പറയുന്നു. ഓട്ടോ ഡ്രൈവർമാരെക്കുറിച്ചുള്ള സമൂഹത്തിന്റെ പരമ്പരാഗത ധാരണകളെ തിരുത്തുന്നതായിരുന്നു ഇത്തരം അനുഭവങ്ങൾ.
തന്റെ വ്യക്തിപരമായ സാഹചര്യങ്ങൾ കണക്കിലെടുത്തും കുടുംബത്തിന് മുൻഗണന നൽകിയുമാണ് ഇത്തരമൊരു തീരുമാനമെടുത്തതെന്ന് ഏക മകൾ കൂടിയായ ഈ യുവതി കൂട്ടിച്ചേർത്തു. സോഷ്യൽ മീഡിയയിൽ പ്രചരിക്കുന്ന വീഡിയോയ്ക്ക് മികച്ച പിന്തുണയാണ് ലഭിക്കുന്നത്. രാത്രികാലങ്ങളിൽ അമ്മയെ തനിച്ചാക്കാതിരിക്കാൻ യുവതി കാണിച്ച മനസ്സിനെയും, സ്വന്തം ഇഷ്ടപ്രകാരം സ്വതന്ത്രമായ തൊഴിൽ പാത തിരഞ്ഞെടുത്തതിനെയും അഭിനന്ദിച്ച് നിരവധിയാളുകളാണ് കമന്റുകളുമായി രംഗത്തെത്തുന്നത്.
ബെംഗളൂരുവാർത്തയുടെ ആൻഡ്രോയ്ഡ് ആപ്ലിക്കേഷൻ ഇപ്പോൾ ഗൂഗിൾ പ്ലേസ്റ്റോറിൽ ലഭ്യമാണ്, പോർട്ടലിൽ പ്രസിദ്ധീകരിക്കുന്ന വാർത്തകൾ വേഗത്തിൽ അറിയാൻ മൊബൈൽ ആപ്പ് ഇൻസ്റ്റാൾ ചെയ്യുക. If you cannot read Malayalam,Download BengaluruVartha Android app from Google play store and Click On the News Reader Button. [masterslider id="10"]
