ബംഗളൂരു: ദശാബ്ദത്തോടടുക്കുന്ന ബംഗളൂരുവിലെ ഇജിപ്പുര ഫ്ലൈഓവർ നിർമ്മാണം വീണ്ടും അനിശ്ചിതത്വത്തിൽ. മുൻപ് നിശ്ചയിച്ചിരുന്ന ഒക്ടോബർ അവസാനത്തെ ഡെഡ്‌ലൈനും തെറ്റിയതോടെ പദ്ധതി പൂർത്തിയാക്കാൻ ഡിസംബർ അവസാനം വരെ പുതിയ ലക്ഷ്യപരിധി നിശ്ചയിച്ചിരിക്കുകയാണ് ഗ്രേറ്റർ ബംഗളൂരു അതോറിറ്റി (GBA). എന്നാൽ നിർമ്മാണ സാമഗ്രികളുടെ ദൗർലഭ്യം മൂലം ഡിസംബറിനുള്ളിൽ പണി പൂർത്തിയാക്കുന്നതും വെല്ലുവിളിയാകുമെന്നാണ് സൂചന. കൊരമംഗല വാട്ടർ ടാങ്കിന് സമീപം സർജാപൂർ റോഡിലേക്ക് പ്രവേശിക്കുന്നതിനും പുറത്തുകടക്കുന്നതിനുമായി നിർദ്ദേശിച്ചിട്ടുള്ള റാംപുകളുടെ നിർമ്മാണം അടുത്ത വർഷത്തേക്ക് മാത്രമേ പൂർത്തിയാകൂ.
ഡിസംബറിലെ പുതിയ ലക്ഷ്യം ഇജിപ്പുരയ്ക്കും കേന്ദ്രീയ സദൻ ജംഗ്ഷനും ഇടയിലുള്ള പ്രധാന മേൽപ്പാലത്തിന്റെ നിർമ്മാണത്തിന് മാത്രമായി പരിമിതപ്പെടുത്തിയിട്ടുള്ളതാണ്. സർജാപൂർ റോഡിലെ റാംപുകൾക്ക് പുതിയ ഭൂമിയേറ്റെടുക്കൽ ആവശ്യമായതിനാലാണ് ഈ വൈകൽ. നിർമ്മാണ സാമഗ്രികളായ കരിങ്കല്ലിന്റെയും മെറ്റലിന്റെയും (Stone Aggregates) കടുത്ത ക്ഷാമമാണ് കഴിഞ്ഞ കുറച്ചു മാസങ്ങളായി നിർമ്മാണ വേഗത കുറച്ചതെന്ന് അധികൃതർ വ്യക്തമാക്കി.
അടുത്ത വർഷം മാർച്ച് മാസത്തോടെ പദ്ധതിയുടെ നിർമ്മാണം ആരംഭിച്ചിട്ട് കൃത്യം 10 വർഷം തികയും. 2019 നവംബറിൽ പൂർത്തിയാക്കാൻ ഉദ്ദേശിച്ച് ആരംഭിച്ച പദ്ധതി സാമ്പത്തിക പ്രതിസന്ധിയും നിർമ്മാണത്തിലെ വീഴ്ചകളും കാരണം 2022 മാർച്ചിൽ കരാർ റദ്ദാക്കുന്നതിലേക്ക് വരെ എത്തിയിരുന്നു. തുടർന്ന് 2023 അവസാനത്തോടെ ബി.എസ്.സി.പി.എൽ (BSCPL) ഇൻഫ്രാസ്ട്രക്ചർ ലിമിറ്റഡിന് ശേഷിക്കുന്ന പണികൾ കൈമാറുകയായിരുന്നു. നിരന്തരം ഡെഡ്‌ലൈനുകൾ മാറുന്നത് കാരണം വൻ ഗതാഗതക്കുരുക്കിൽ വലയുകയാണ് കൊരമംഗല, ഇജിപ്പുര നിവാസികളും യാത്രക്കാരും.
ബെംഗളൂരുവാർത്തയുടെ ആൻഡ്രോയ്ഡ് ആപ്ലിക്കേഷൻ ഇപ്പോൾ ഗൂഗിൾ പ്ലേസ്റ്റോറിൽ ലഭ്യമാണ്, പോർട്ടലിൽ പ്രസിദ്ധീകരിക്കുന്ന വാർത്തകൾ വേഗത്തിൽ അറിയാൻ മൊബൈൽ ആപ്പ് ഇൻസ്റ്റാൾ ചെയ്യുക. If you cannot read Malayalam,Download BengaluruVartha Android app from Google play store and Click On the News Reader Button. [masterslider id="10"]
