ബെംഗളൂരു: നമ്മ മെട്രോ ഗ്രീൻ ലൈനിലെ ട്രെയിൻ സർവീസുകളിൽ നാളെ (ഓഗസ്റ്റ് 7, വെള്ളിയാഴ്ച) രാത്രി സമയങ്ങളിൽ കാര്യമായ മാറ്റം വരുത്തിയതായി ബാംഗ്ലൂർ മെട്രോ റെയിൽ കോർപ്പറേഷൻ ലിമിറ്റഡ് (BMRCL) അറിയിച്ചു. പുതിയ സിആർആർസി (CRRC) ട്രെയിനുകൾ സർവീസിന്റെ ഭാഗമാക്കുന്നതിന്റെയും, മെട്രോ റെയിൽ സുരക്ഷാ കമ്മീഷണറുടെ (CMRS) നേതൃത്വത്തിൽ നടക്കുന്ന സുപ്രധാന പരിശോധനകളുടെയും പശ്ചാത്തലത്തിലാണ് ഈ ക്രമീകരണം.
വെള്ളിയാഴ്ച രാത്രി 10:30 മുതൽ സർവീസ് അവസാനിക്കുന്നത് വരെ യശ്വന്ത്പൂർ മുതൽ മാധവരം (മഡവര) വരെയുള്ള അപ് ലൈനിൽ 20 മിനിറ്റ് ഇടവേളകളിലായിരിക്കും ട്രെയിനുകൾ സർവീസ് നടത്തുക. സാധാരണയായി 10 മിനിറ്റ് ഇടവേളകളിലാണ് ഇവിടെ സർവീസ് നടക്കാറുള്ളത്. എന്നാൽ മഡവരയിൽ നിന്ന് രേഷ്മെ സൻസ്തയിലേക്കുള്ള ഡൗൺലൈൻ ട്രെയിൻ സർവീസുകൾ പതിവ് ഷെഡ്യൂൾ അനുസരിച്ച് തന്നെ തുടരുമെന്ന് അധികൃതർ വ്യക്തമാക്കി.
നഗരത്തിലെ 96 കിലോമീറ്റർ നീളുന്ന മെട്രോ ശൃംഖലയിൽ അനുഭവപ്പെടുന്ന കടുത്ത യാത്രാതിരക്ക് പരിഹരിക്കുന്നതിനായി ചൈനീസ് നിർമ്മിതമായ 21 പുതിയ ട്രെയിനുകളാണ് എത്തിക്കുന്നത്. ഇതിൽ മൂന്ന് ട്രെയിനുകൾ ഗ്രീൻ ലൈനിലേക്ക് ഉൾപ്പെടുത്തുന്നതിന്റെ ഭാഗമായാണ് റൂട്ടിൽ പരിശോധനകൾ നടത്തുന്നത്.
ഒരു ദിവസത്തേക്ക് മാത്രമുള്ള ഈ താൽക്കാലിക ക്രമീകരണങ്ങളോട് യാത്രക്കാർ സഹകരിക്കണമെന്നും, പുതിയ സമയക്രമം മനസ്സിലാക്കി യാത്രകൾ ആസൂത്രണം ചെയ്യണമെന്നും ബിഎംആർസിഎൽ വാർത്താക്കുറിപ്പിൽ അഭ്യർത്ഥിച്ചു.
