ബെംഗളൂരു: തിരക്കുപിടിച്ച നഗരജീവിതത്തിനിടയിൽ അപ്രതീക്ഷിതമായി ലഭിക്കുന്ന ചെറിയൊരു കരുതൽ പോലും വലിയ സന്തോഷമാണ് സമ്മാനിക്കുക. അത്തരത്തിൽ ബെംഗളൂരു നഗരത്തിൽ നിന്നും പുറത്തുവന്ന ഒരു ഹൃദയസ്പർശിയായ വീഡിയോയാണ് ഇപ്പോൾ സോഷ്യൽ മീഡിയയിൽ വൈറലാകുന്നത്. ഒരൊറ്റ പൂവ് ചോദിച്ച യുവതിക്ക് ഒരു പൂച്ചെണ്ട് മുഴുവൻ സമ്മാനിച്ച് മനസ്സ് കവർന്നിരിക്കുകയാണ് ഒരു ടെമ്പോ ഡ്രൈവർ.
വൈഷ്ണവി എന്ന യുവതി തന്റെ ഇൻസ്റ്റാഗ്രാം പേജിലൂടെ പങ്കുവെച്ച വീഡിയോയാണ് ആളുകളുടെ ശ്രദ്ധ പിടിച്ചുപറ്റുന്നത്. കാറിനുള്ളിലിരുന്ന് പൂച്ചെണ്ട് കയ്യിലേന്തി സന്തോഷം പങ്കുവെക്കുന്ന വൈഷ്ണവിയെ വീഡിയോയിൽ കാണാം. തന്റെ ആഴ്ച മുഴുവൻ സന്തോഷഭരിതമാക്കാൻ ഈയൊരു ഒറ്റ പ്രവൃത്തിക്ക് സാധിച്ചുവെന്ന് യുവതി കുറിക്കുന്നു.
“ടെമ്പോ വാലെ ഭയ്യ എന്റെ ആഴ്ച മുഴുവൻ മനോഹരമാക്കി. ഞങ്ങൾ ഒരൊറ്റ പൂവ് മാത്രമാണ് ചോദിച്ചത്, എന്നാൽ അദ്ദേഹം ആ പൂച്ചെണ്ട് മുഴുവനായി ഞങ്ങൾക്ക് നൽകി,” എന്ന അടിക്കുറിപ്പോടെയാണ് വീഡിയോ പങ്കുവെച്ചിരിക്കുന്നത്.
യാത്രയ്ക്കിടയിൽ റോഡിൽ വെച്ചാണ് വൈഷ്ണവിയും കൂട്ടുകാരും ടെമ്പോ ഡ്രൈവറോട് ഒരു പൂവ് ചോദിക്കുന്നത്. എന്നാൽ ഒട്ടും മടി കൂടാതെ കയ്യിലുണ്ടായിരുന്ന മുഴുവൻ പൂച്ചെണ്ടും അദ്ദേഹം ഇവർക്ക് നീട്ടുകയായിരുന്നു. “ബെംഗളൂരുവിലെ ഈ മധുരമുള്ള അനുഭവം എന്നും ഹൃദയത്തിൽ സൂക്ഷിക്കും,” എന്ന് വൈഷ്ണവി ഇൻസ്റ്റാഗ്രാമിൽ കുറിച്ചു.
അപൂർവ്വമായി മാത്രം കാണാറുള്ള ഇത്തരം സ്നേഹപ്രകടനങ്ങളെ നെഞ്ചിലേറ്റുകയാണ് സോഷ്യൽ മീഡിയ. “വളരെ മനോഹരമായ പ്രവൃത്തി”, “ഹൃദയം നിറയ്ക്കുന്ന കാഴ്ച” എന്നിങ്ങനെ നിരവധി കമന്റുകളാണ് വീഡിയോയ്ക്ക് താഴെ വരുന്നത്. ജീവിതത്തിലെ ചെറിയ നിമിഷങ്ങളിലാണ് യഥാർത്ഥ സന്തോഷം ഒളിഞ്ഞിരിക്കുന്നത് എന്ന് ഓർമ്മിപ്പിക്കുന്നതാണ് ഈ സംഭവമെന്ന് സോഷ്യൽ മീഡിയ ഉപയോക്താക്കൾ അഭിപ്രായപ്പെടുന്നു.
