ബെംഗളൂരു: തിരക്കേറിയ റോഡിൽ ഒരു സാധാരണ സംഭാഷണം അപൂർവ്വമായൊരു അത്ഭുത നിമിഷമായി മാറിയതിന്റെ ദൃശ്യങ്ങൾ സോഷ്യൽ മീഡിയയിൽ തരംഗമാകുന്നു. പ്രമുഖ വ്യവസായിയായ യുവാവ് തന്റെ കോടികൾ വിലമതിക്കുന്ന ലംബോർഗിനി സൂപ്പർകാറിന്റെ താക്കോൽ ഒരു സാധാരണ ഓട്ടോ ഡ്രൈവർക്ക് ഓടിക്കാൻ നൽകിയതാണ് ദശലക്ഷക്കണക്കിന് ആളുകളുടെ മനസ്സ് കവരുന്നത്. തികച്ചും അപരിചിതനായ ഒരാളെ വിശ്വസിച്ച് തന്റെ ആഡംബര കാർ കൈമാറിയ ബിസിനസുകാരന്റെ വലിയ മനസ്സിനെ നെറ്റിസൺമാർ ഒന്നടങ്കം അഭിനന്ദിക്കുകയാണ്.
ബെംഗളൂരുവിലെ റോഡിലൂടെ വ്യവസായി ലംബോർഗിനിയിൽ സഞ്ചരിക്കവെയാണ് അതുവഴി വന്ന ഓട്ടോ ഡ്രൈവർ ഇദ്ദേഹത്തെ തിരിച്ചറിയുന്നത്. സോഷ്യൽ മീഡിയയിലൂടെ തനിക്ക് ഇദ്ദേഹത്തെ അറിയാമെന്ന് പറഞ്ഞ ഡ്രൈവർ, ലംബോർഗിനി കാർ ഒരിക്കലെങ്കിലും ഓടിക്കണമെന്ന തന്റെ ആഗ്രഹവും പ്രകടിപ്പിച്ചു. ഇത് കേട്ട ഉടൻ നന്ദി പറഞ്ഞ് മുന്നോട്ട് പോകുന്നതിന് പകരം, വ്യവസായി തന്റെ കാർ റോഡരികിലേക്ക് മാറ്റി പാർക്ക് ചെയ്യാൻ ആവശ്യപ്പെടുകയായിരുന്നു. തുടർന്ന് ഒട്ടും മടിക്കാതെ ലംബോർഗിനിയുടെ താക്കോൽ ഓട്ടോ ഡ്രൈവർക്ക് കൈമാറി. പിന്നീട് ഇരുവരും വാഹനങ്ങൾ പരസ്പരം മാറ്റി യാത്ര തുടരുകയായിരുന്നു. ഓട്ടോ ഡ്രൈവർ അതീവ ജാഗ്രതയോടെയും കൗതുകത്തോടെയും സൂപ്പർകാർ ഓടിച്ചപ്പോൾ, ബിസിനസുകാരൻ പുഞ്ചിരിയോടെ ഓട്ടോയിലിരുന്ന് യാത്ര ചെയ്യുന്ന ദൃശ്യങ്ങളാണ് വീഡിയോയിലുള്ളത്. ഇരു വാഹനങ്ങളും തൊട്ടടുത്തായി റോഡിലൂടെ നീങ്ങുന്നതും ദൃശ്യങ്ങളിൽ കാണാം.
വീഡിയോ പങ്കുവെച്ചുകൊണ്ട് വ്യവസായി കുറിച്ച വാക്കുകളും ഏറെ ശ്രദ്ധേയമായി. വർഷങ്ങൾക്ക് ശേഷം വീണ്ടും ഒരു ഓട്ടോയിൽ കയറിയപ്പോൾ തന്റെ കരിയറിന്റെ തുടക്കകാലത്തെ കഠിനാധ്വാനവും സാമ്പത്തിക ബുദ്ധിമുട്ടുകളുമാണ് കൺമുന്നിൽ തെളിഞ്ഞതെന്ന് അദ്ദേഹം കുറിച്ചു. പണ്ട് ഓട്ടോ ചാർജ് നൽകാൻ പോലും പണമില്ലാതെ ബുദ്ധിമുട്ടിയിരുന്ന താൻ ഇന്ന് എത്രത്തോളം വളർന്നുവെന്ന് തിരിച്ചറിഞ്ഞ നിമിഷമായിരുന്നു അതെന്നും അദ്ദേഹം കൂട്ടിച്ചേർത്തു. സോഷ്യൽ മീഡിയയിൽ പങ്കുവെച്ച വീഡിയോയ്ക്ക് താഴെ വലിയ ജനപിന്തുണയാണ് ലഭിക്കുന്നത്. “നിങ്ങൾ എന്റെ ബഹുമാനം നേടിക്കഴിഞ്ഞു” എന്നും, “ഓട്ടോ ഡ്രൈവറുടെ മുഖത്തെ പുഞ്ചിരിയിൽ എല്ലാമുണ്ട്” എന്നും തുടങ്ങി നിരവധി വൈകാരികമായ കമന്റുകളാണ് വീഡിയോയ്ക്ക് താഴെ വന്നുകൊണ്ടിരിക്കുന്നത്.
