ബെംഗളൂരു : ഓണാവധിക്കു ബെംഗളൂരുവിൽനിന്നു കേരളത്തിലേക്കുള്ള ട്രെയിനുകളിലെ ടിക്കറ്റുകൾ വെയ്റ്റ് ലിസ്റ്റിലേക്ക്. ഓഗസ്റ്റ് 23നാണ് നാട്ടിലേക്കു കനത്ത തിരക്ക്. ഈ ദിവസം ബെംഗളൂരുവിൽനിന്നു നാട്ടിലേക്ക് എട്ടു ട്രെയിനുണ്ടെങ്കിലും ഇവയിൽ ആറെണ്ണത്തിലെയും ടിക്കറ്റുകൾ വെയ്റ്റ് ലിസ്റ്റിലായി. പകൽ പുറപ്പെടുന്ന എറണാകുളം ഇന്റർസിറ്റി(12677), കൊച്ചുവേളി എസി എക്സ്പ്രസ്(22677) എന്നിവയിലാണു ടിക്കറ്റുകൾ ശേഷിക്കുന്നത്.
തിരുവോണം മൂന്നുമാസം അകലെയെങ്കിലും ഇപ്പോഴേ ടിക്കറ്റ് ഉറപ്പാക്കാനുള്ള നെട്ടോട്ടത്തിലാണു ബെംഗളൂരു മലയാളികൾ. അവസാന നിമിഷം സ്വകാര്യബസുകളിൽ ടിക്കറ്റ് ചാർജ് നാലായിരം രൂപവരെയാകാറുണ്ട്. ഉൽസവകാലങ്ങളിൽ റെയിൽവേ സ്പെഷൽ ട്രെയിൻ അനുവദിക്കുമെന്ന് ഉറപ്പുമില്ല. അതിനാൽ 500 രൂപയിൽ താഴെ മുടക്കി ട്രെയിനിൽ ടിക്കറ്റ് ബുക്ക് ചെയ്യുകയാണു ലാഭമെന്ന ചിന്തയിലാണു ബെംഗളൂരു മലയാളികൾ.
