ബെംഗളൂരു: ഐടി തലസ്ഥാനമായ ബെംഗളൂരുവിലെ ഏറ്റവും തിരക്കേറിയ കെമ്പെഗൗഡ അന്താരാഷ്ട്ര വിമാനത്താവള റോഡിലെ ഭയാനകമായ ഗതാഗതക്കുരുക്കിന് ശാശ്വത പരിഹാരം കാണാൻ കേന്ദ്ര ഉപരിതല ഗതാഗത വകുപ്പ് മന്ത്രി നിതിൻ ഗഡ്കരിയോട് ആവശ്യപ്പെട്ട് ഐടി വ്യവസായ പ്രമുഖർ. വിമാനത്താവളത്തിലേക്കുള്ള പാതയിൽ പ്രവർത്തിക്കുന്ന ടോൾ പ്ലാസയിലെ തകരാറുകളാണ് നഗരവാസികളെയും യാത്രക്കാരെയും മണിക്കൂറുകളോളം വഴിയാധാരമാക്കുന്നത്. ടോൾ പ്ലാസ പൂർണ്ണമായി ഒഴിവാക്കി പുതിയ സാങ്കേതികവിദ്യ നടപ്പിലാക്കണമെന്ന് ആവശ്യപ്പെട്ട് പ്രമുഖ വ്യവസായി മോഹൻദാസ് പൈ രംഗത്തെത്തി.
ഫാസ്ടാഗ് സ്കാനിംഗ് താറുമാറായി; കിലോമീറ്ററുകളോളം ക്യൂ
എയർപോർട്ട് റോഡിലെ ടോൾ പ്ലാസയിൽ ഫാസ്ടാഗ് ശരിയായി സ്കാൻ ചെയ്യാൻ കഴിയാത്തതാണ് പ്രതിസന്ധി രൂക്ഷമാക്കുന്നത്. ഓരോ വാഹനത്തിൽ നിന്നും തുക ഈടാക്കാൻ മിനിറ്റുകളോളം സമയമെടുക്കുന്നതോടെ കിലോമീറ്ററുകളോളമാണ് വാഹനങ്ങളുടെ ക്യൂ നീളുന്നത്. വിമാനത്താവളത്തിലേക്ക് കൃത്യസമയത്ത് എത്താനാകാതെ നൂറുകണക്കിന് യാത്രക്കാരാണ് ദിനംപ്രതി ദുരിതത്തിലാകുന്നത്. സോഷ്യൽ മീഡിയയിൽ ഇതിനോടകം തന്നെ ടോൾ പ്ലാസയ്ക്കെതിരെ വൻ ജനരോഷമാണ് ഉയർന്നുകൊണ്ടിരിക്കുന്നത്.
മൾട്ടി-ലൈൻ ഫ്രീ ഫ്ലോ സാങ്കേതികവിദ്യ വേണമെന്ന് ആവശ്യം
നിലവിലെ ടോൾ ബൂത്തുകൾക്ക് പകരം ‘മൾട്ടി-ലൈൻ ഫ്രീ ഫ്ലോ’ (Multi-Lane Free Flow) ടോൾ മോഡൽ നടപ്പിലാക്കണമെന്ന് മോഹൻദാസ് പൈ എക്‌സ് (ട്വിറ്റർ) പോസ്റ്റിലൂടെ നിതിൻ ഗഡ്കരിയോട് അഭ്യർത്ഥിച്ചു. തമിഴ്‌നാട്ടിലെ താംബരം-ദിണ്ടിവനം നാഷണൽ ഹൈവേയിലെ പരന്നൂർ ടോൾ പ്ലാസയിൽ നാഷണൽ ഹൈവേ അതോറിറ്റി ഓഫ് ഇന്ത്യ (NHAI) നിലവിൽ ഈ സംവിധാനം വിജയകരമായി നടപ്പിലാക്കിയിട്ടുണ്ട്. വാഹനങ്ങൾ നിർത്താതെ തന്നെ ഓട്ടോമാറ്റിക് നമ്പർ പ്ലേറ്റ് റെക്കഗ്നിഷൻ (ANPR) ക്യാമറകളും ഹൈ-സ്പീഡ് ഫാസ്ടാഗ് റീഡറുകളും വഴി ടോൾ ഈടാക്കുന്ന രീതിയാണിത്.
കേന്ദ്രത്തിന്റെ തീരുമാനത്തിനായി കാത്തിരിപ്പ്
തമിഴ്‌നാട് ടെക്‌നോളജി സിറ്റി ഉൾപ്പെടെയുള്ള മേഖലകളിൽ നടപ്പിലാക്കിയ ഈ സംവിധാനം ബെംഗളൂരുവിലേക്കും കൊണ്ടുവരണമെന്ന ആവശ്യം സോഷ്യൽ മീഡിയയിലും ശക്തമാണ്. വിമാനത്താവള പാതയിലെ ഗതാഗത തടസ്സം ഒഴിവാക്കാൻ ഈ സാങ്കേതികവിദ്യയിലൂടെ സാധിക്കുമെന്നാണ് വിലയിരുത്തപ്പെടുന്നത്. വിഷയം കേന്ദ്രമന്ത്രിയുടെ ശ്രദ്ധയിൽപ്പെട്ട സാഹചര്യത്തിൽ, ബെംഗളൂരു നിവാസികളുടെ യാത്രാദുരിതം പരിഹരിക്കാൻ കേന്ദ്ര മന്ത്രാലയം എന്ത് നടപടിയെടുക്കുമെന്ന പ്രതീക്ഷയിലാണ് യാത്രക്കാർ.
ബെംഗളൂരുവാർത്തയുടെ ആൻഡ്രോയ്ഡ് ആപ്ലിക്കേഷൻ ഇപ്പോൾ ഗൂഗിൾ പ്ലേസ്റ്റോറിൽ ലഭ്യമാണ്, പോർട്ടലിൽ പ്രസിദ്ധീകരിക്കുന്ന വാർത്തകൾ വേഗത്തിൽ അറിയാൻ മൊബൈൽ ആപ്പ് ഇൻസ്റ്റാൾ ചെയ്യുക. If you cannot read Malayalam,Download BengaluruVartha Android app from Google play store and Click On the News Reader Button. [masterslider id="10"]
