ബെംഗളൂരു : ഭീകരകേന്ദ്രങ്ങളിൽ വ്യോമസേന നടത്തിയ ആക്രമണങ്ങളെത്തുടർന്ന് വടക്കേ ഇന്ത്യയിലെ ഒട്ടേറെ വിമാനത്താവളങ്ങൾ താത്കാലികമായി അടച്ചുപൂട്ടിയതിന്റെ പശ്ചാത്തലത്തിൽ ബെംഗളൂരു വിമാനത്താവളത്തിൽ നിന്നുള്ള ചില സർവീസുകൾ ബുധനാഴ്ച റദ്ദാക്കി.
യാത്രക്കാർ വിമാനത്താവളത്തിലേക്ക് പുറപ്പെടുന്നതിന് മുൻപ് ടിക്കറ്റ് ബുക്ക് ചെയ്ത വിമാനക്കമ്പനികളുമായി ബന്ധപ്പെട്ട് വിമാനങ്ങളുടെ തത്സമയസ്ഥിതി പരിശോധിക്കണമെന്ന് ബെംഗളൂരു ഇന്റർനാഷണൽ എയർപോർട്ട് ലിമിറ്റഡ് (ബിഐഎഎൽ) അധികൃതർ നിർദേശിച്ചു.
ഭീകരകേന്ദ്രങ്ങളിൽ വ്യോമസേന നടത്തിയ ആക്രമണം ബെംഗളൂരു ഉൾപ്പെടെ രാജ്യവ്യാപകമായി വിമാന ഗതാഗത ഷെഡ്യൂളുകളിൽ മാറ്റംസൃഷ്ടിച്ചിട്ടുണ്ട്. യാത്രക്കാർ കാണിച്ച ക്ഷമയ്ക്കും സഹകരണത്തിനും ബിഐഎഎൽ അധികൃതർ നന്ദി പറഞ്ഞു.
