ബെംഗളൂരു: കർണാടക സർക്കാരിൻ്റെ നന്ദിനി പാലിന് ലിറ്ററിന് 10 രൂപ വരെ വർധിപ്പിച്ചാൽ ബെംഗളൂരുവിലെ ഹോട്ടലുകളിൽ ഭക്ഷണസാധനങ്ങളുടെ വില കൂട്ടേണ്ടി വരുമെന്ന് ഹോട്ടലുടമകളുടെ മുന്നറിയിപ്പ്. ലിറ്ററിന് രണ്ടോ മൂന്നോ രൂപയുടെ വർധനവാണെങ്കിൽ ഉപഭോക്താക്കളിലേക്ക് ഭാരം കൈമാറാതെ ഹോട്ടലുകൾക്ക് സഹിക്കാനാകും. എന്നാൽ പെട്ടെന്ന് 10 രൂപ കൂട്ടുന്നത് വലിയ സാമ്പത്തിക പ്രതിസന്ധിയുണ്ടാക്കുമെന്ന് ബ്രഹത് ബെംഗളൂരു ഹോട്ടൽസ് അസോസിയേഷൻ (ബി.ബി.എച്ച്.എ) പ്രതിനിധി പി.സി. റാവു വ്യക്തമാക്കി.
പശ്ചിമേഷ്യൻ സംഘർഷത്തെത്തുടർന്ന് പാചകവാതക വില ഉയർന്നപ്പോഴും വിതരണം തടസ്സപ്പെട്ടപ്പോഴും നഗരത്തിലെ പല ഹോട്ടലുകളും കടുത്ത നഷ്ടത്തിലായിരുന്നു. പല സ്ഥാപനങ്ങളും ദിവസങ്ങളോളം അടച്ചിടേണ്ടി വരികയും ചെയ്തു. ഇതിന് പിന്നാലെ പാലിനും വലിയ തുക വില കൂട്ടിയാൽ ഭക്ഷണസാധനങ്ങളുടെ വില വർധിപ്പിക്കുകയല്ലാതെ മറ്റ് മാർഗമില്ലെന്ന് ഹോട്ടലുടമകൾ ചൂണ്ടിക്കാണിക്കുന്നു. തൈര്, നെയ്യ്, വെണ്ണ, പനീർ തുടങ്ങിയ പാൽ ഉൽപ്പന്നങ്ങൾക്കും ഇതോടൊപ്പം വില ഉയരും. ഇത് മധുരപലഹാരങ്ങൾ, ബേക്കറി സാധനങ്ങൾ എന്നിവയുടെ നിർമാണച്ചെലവിനെയും പ്രതികൂലമായി ബാധിക്കും.
ഒറ്റയടിക്ക് വലിയ തുക കൂട്ടുന്നതിന് പകരം ഘട്ടംഘട്ടമായി വില വർധിപ്പിക്കാനാണ് ഹോട്ടലുടമകൾ സർക്കാരിനോട് ആവശ്യപ്പെടുന്നത്. ആറുമാസത്തിലൊരിക്കലോ വർഷത്തിലൊരിക്കലോ രണ്ടോ മൂന്നോ രൂപ വീതം കൂട്ടിയാൽ വിപണിക്ക് അത് ഉൾക്കൊള്ളാൻ എളുപ്പമായിരിക്കും. കൂടാതെ, നന്ദിനി പാലിൻ്റെ വില അമിതമായി വർധിപ്പിച്ചാൽ ആളുകൾ മറ്റ് സ്വകാര്യ ബ്രാൻഡുകളിലേക്ക് മാറാൻ സാധ്യതയുണ്ടെന്നും ഇത് നന്ദിനിക്ക് തിരിച്ചടിയാകുമെന്നും ബി.ബി.എച്ച്.എ മുന്നറിയിപ്പ് നൽകുന്നു.
അതേസമയം, പാലുൽപ്പാദക യൂണിയനുകളുമായി കൂടിക്കാഴ്ച നടത്തിയ ഉപമുഖ്യമന്ത്രി ഡി.കെ. ശിവകുമാർ, മന്ത്രിസഭയിൽ ചർച്ച ചെയ്ത ശേഷമേ വിലവർധനവിൽ അന്തിമ തീരുമാനമെടുക്കൂ എന്ന് അറിയിച്ചു. ക്ഷീരകർഷകരും യൂണിയനുകളും നിലവിൽ കടുത്ത നഷ്ടത്തിലാണെന്നും അവർക്ക് പിന്തുണ നൽകേണ്ടത് സർക്കാരിൻ്റെ ഉത്തരവാദിത്തമാണെന്നും അദ്ദേഹം കൂട്ടിച്ചേർത്തു. ലിറ്ററിന് 12 രൂപ വർധിപ്പിക്കണമെന്നാണ് യൂണിയനുകളുടെ ആവശ്യം. അയൽ സംസ്ഥാനങ്ങളായ തമിഴ്‌നാട്, ആന്ധ്രാപ്രദേശ്, തെലങ്കാന എന്നിവിടങ്ങളിലെ പാൽ വില പരിശോധിച്ച് റിപ്പോർട്ട് നൽകാൻ ഉദ്യോഗസ്ഥരോട് ആവശ്യപ്പെട്ടിട്ടുണ്ടെന്നും ഇതിൻ്റെ അടിസ്ഥാനത്തിൽ ഉടൻ തീരുമാനമെടുക്കുമെന്നും സർക്കാർ വ്യക്തമാക്കി.
