കൊച്ചി: പിതാവിന്റെ കൈവശമുള്ള എല്ലാ സ്വത്തുവകകളിലും മക്കൾക്കോ പേരക്കുട്ടികൾക്കോ ജന്മാവകാശമില്ലെന്ന് നിയമ വിദഗ്ദ്ധരും സമീപകാല കോടതി വിധികളും വ്യക്തമാക്കുന്നു. പാരമ്പര്യമായി ലഭിക്കുന്ന എല്ലാ സ്വത്തുക്കളും കുടുംബത്തിന്റെ വകയാണെന്നും അതിൽ മക്കൾക്ക് അവകാശമുണ്ടെന്നുമുള്ള പൊതുധാരണ തെറ്റാണെന്നാണ് ഹിന്ദു പിന്തുടർച്ചാവകാശ നിയമവും കേരള, കർണാടക ഹൈക്കോടതികളുടെയും സുപ്രീംകോടതിയുടെയും ഉത്തരവുകളും വ്യക്തമാക്കുന്നത്. സ്വത്തിന്റെ സ്വഭാവവും ഉത്ഭവവും എന്താണെന്നതിനെ ആശ്രയിച്ചാണ് ഇതിലെ നിയമപരമായ അവകാശങ്ങൾ നിശ്ചയിക്കപ്പെടുന്നത്.
പിതാവ്, മുത്തച്ഛൻ, മുത്തച്ഛന്റെ അച്ഛൻ എന്നിങ്ങനെ കുറഞ്ഞത് നാല് തലമുറകളിലൂടെ കൈമാറി വന്നതും ഇതുവരെ ഭാഗം വെക്കാത്തതുമായ സ്വത്തിനെ മാത്രമാണ് യഥാർത്ഥ ‘പാരമ്പര്യ സ്വത്ത്’ എന്ന് വിളിക്കാൻ സാധിക്കുക. ഇത്തരം സ്വത്തുക്കളിൽ മാത്രമാണ് ജനിക്കുന്ന കുട്ടികൾക്ക് ജനനം മുതൽ തുല്യ ജന്മാവകാശമുള്ളത്. ഇവ കുടുംബാംഗങ്ങളുടെ സമ്മതമില്ലാതെ പിതാവിന് മാത്രമായി വിൽക്കാനോ മറ്റ് തീരുമാനങ്ങൾ എടുക്കാനോ സാധിക്കില്ല. എന്നാൽ പിതാവ് സ്വന്തം വരുമാനം കൊണ്ടോ ബിസിനസ്സ് ആദായം കൊണ്ടോ വാങ്ങിയതോ, സ്വന്തം മാതാപിതാക്കളിൽ നിന്ന് സമ്മാനമായോ വിൽപ്പത്രം വഴിയോ ലഭിച്ചതോ ആയ സ്വത്തുക്കൾ ‘സ്വയം ആർജിച്ച സ്വത്തായി’ കണക്കാക്കപ്പെടും.
പിതാവ് ജീവിച്ചിരിക്കുമ്പോൾ അദ്ദേഹത്തിന്റെ സ്വയം ആർജിച്ച സ്വത്തിന്മേൽ ഭാഗം ചോദിക്കാനോ അവകാശവാദം ഉന്നയിക്കാനോ മക്കൾക്ക് നിയമപരമായി സാധിക്കില്ല. ഇത്തരം സ്വത്തുക്കൾ ഇഷ്ടമുള്ളയാൾക്ക് വിൽക്കാനോ, സമ്മാനമായി നൽകാനോ, വിൽപ്പത്രം എഴുതിക്കൊടുക്കാനോ പിതാവിന് പൂർണ്ണ സ്വാതന്ത്ര്യമുണ്ട്. എന്നാൽ പിതാവ് വിൽപ്പത്രം എഴുതാതെ മരിക്കുകയാണെങ്കിൽ മാത്രമാണ് സ്വയം ആർജിച്ച സ്വത്ത് ഒന്നാം ക്ലാസ് നിയമപരമായ അവകാശികളിലേക്ക് എത്തുക്കയുള്ളൂ. കുടുംബാംഗങ്ങൾ ഒന്നിച്ചു താമസിക്കുന്നു എന്നതുകൊണ്ട് മാത്രം എല്ലാ സ്വത്തുക്കളും പാരമ്പര്യ സ്വത്താകില്ലെന്നും, സ്വത്തിന്റെ ഉറവിടം വ്യക്തമാക്കുന്ന ആധാരങ്ങളാണ് കോടതികളിൽ നിർണ്ണായകമാകുന്നതെന്നും വിധികൾ ചൂണ്ടിക്കാണിക്കുന്നു.
ബെംഗളൂരുവാർത്തയുടെ ആൻഡ്രോയ്ഡ് ആപ്ലിക്കേഷൻ ഇപ്പോൾ ഗൂഗിൾ പ്ലേസ്റ്റോറിൽ ലഭ്യമാണ്, പോർട്ടലിൽ പ്രസിദ്ധീകരിക്കുന്ന വാർത്തകൾ വേഗത്തിൽ അറിയാൻ മൊബൈൽ ആപ്പ് ഇൻസ്റ്റാൾ ചെയ്യുക. If you cannot read Malayalam,Download BengaluruVartha Android app from Google play store and Click On the News Reader Button. [masterslider id="10"]
