ബെംഗളൂരു: ഏറെ പ്രതീക്ഷയോടെ കാത്തിരിക്കുന്ന ജനപ്രിയ കന്നഡ റിയാലിറ്റി ഷോ ‘ബിഗ് ബോസ് സീസൺ 13’ (BBK 13) ആരംഭിക്കാൻ ഏതാനും ദിവസങ്ങൾ മാത്രം ബാക്കി നിൽക്കെ പരിപാടി വീണ്ടും നിയമക്കുരുക്കിലേക്ക്. ബിഡാദിക്കടുത്തുള്ള ‘ജോളിവുഡ് സ്റ്റുഡിയോ’യിൽ ബിഗ് ബോസ് ചിത്രീകരണത്തിന് ഒരു കാരണവശാലും അനുമതി നൽകരുതെന്ന് കാണിച്ച് സാമൂഹിക പ്രവർത്തകൻ ദിനേശ് കല്ലഹള്ളി കർണാടക സംസ്ഥാന മലിനീകരണ നിയന്ത്രണ ബോർഡിന് (KSPCB) ഔദ്യോഗിക പരാതി നൽകി.
കഴിഞ്ഞ വർഷം ജോളിവുഡ് സ്റ്റുഡിയോയിൽ നടന്ന പരിസ്ഥിതി നിയമ ലംഘനങ്ങളും അതിന്മേൽ ചുമത്തിയ പിഴ തുകയും ഇതുവരെ തീർപ്പാക്കിയിട്ടില്ലെന്ന് പരാതിയിൽ ചൂണ്ടിക്കാട്ടുന്നു. മലിനജല ശുദ്ധീകരണ പ്ലാന്റ് (STP) ഉൾപ്പെടെയുള്ള നിർബന്ധിത പാരിസ്ഥിതിക നിർദ്ദേശങ്ങൾ സ്റ്റുഡിയോ മാനേജ്മെന്റ് വേണ്ടത്ര പാലിക്കുന്നില്ലെന്ന ഗുരുതരമായ ആരോപണമാണ് ദിനേശ് കല്ലഹള്ളി ഉന്നയിച്ചിരിക്കുന്നത്.
സ്റ്റുഡിയോ സമുച്ചയത്തിൽ നിലവിൽ മതിയായ ഡ്രെയിനേജ് സംവിധാനമുണ്ടോ എന്നും മാലിന്യ നിർമാർജന നിയമങ്ങൾ കർശനമായി പാലിക്കുന്നുണ്ടോ എന്നും പരിശോധിക്കാൻ ബോർഡ് ഉദ്യോഗസ്ഥർ ഉടൻ സ്ഥലം സന്ദർശിച്ച് പരിശോധന നടത്തണമെന്ന് അദ്ദേഹം ആവശ്യപ്പെട്ടു. പരിശോധനയിൽ നിയമലംഘനം കണ്ടെത്തിയാൽ ഷോയ്ക്ക് യാതൊരു കാരണവശാലും അനുമതി നൽകരുതെന്നും പരാതിയിൽ വ്യക്തമാക്കുന്നുണ്ട്.
സെപ്റ്റംബർ 6-ന് ബിഗ് ബോസ് പുതിയ സീസൺ വലിയ ആഘോഷങ്ങളോടെ ആരംഭിക്കാൻ ദിവസങ്ങൾ മാത്രം ശേഷിക്കെ ഉയർന്നിരിക്കുന്ന ഈ നിയമ തടസ്സം ഷോയുടെ സംഘാടകർക്കും സ്റ്റുഡിയോ മാനേജ്മെന്റിനും വലിയ തിരിച്ചടിയായിട്ടുണ്ട്. പരാതിയുടെ പശ്ചാത്തലത്തിൽ ഷോ നിശ്ചിത തീയതിയിൽ ആരംഭിക്കാൻ സാധിക്കുമോ എന്ന ആശങ്കയിലാണ് കന്നഡ ബിഗ് ബോസ് ആരാധകർ.
ബെംഗളൂരുവാർത്തയുടെ ആൻഡ്രോയ്ഡ് ആപ്ലിക്കേഷൻ ഇപ്പോൾ ഗൂഗിൾ പ്ലേസ്റ്റോറിൽ ലഭ്യമാണ്, പോർട്ടലിൽ പ്രസിദ്ധീകരിക്കുന്ന വാർത്തകൾ വേഗത്തിൽ അറിയാൻ മൊബൈൽ ആപ്പ് ഇൻസ്റ്റാൾ ചെയ്യുക. If you cannot read Malayalam,Download BengaluruVartha Android app from Google play store and Click On the News Reader Button. [masterslider id="10"]
