ബെംഗളൂരു: നഗരത്തിൽ രണ്ടുദിവസമായി തുടരുന്ന കനത്ത മഴ ദുരിതങ്ങൾക്കൊപ്പം ചില ഹൃദയസ്പർശിയായ മനുഷ്യത്വത്തിന്റെ കഥകളും ബാക്കിവെക്കുന്നു. ജെ.പി നഗറിൽ നിന്നും കോറമംഗലയിലേക്കുള്ള യാത്രയ്ക്കിടെ പ്രിയങ്ക എന്ന യുവതിക്ക് ഉണ്ടായ അനുഭവമാണ് ഇപ്പോൾ സമൂഹമാധ്യമങ്ങളിൽ വൈറലാകുന്നത്. പ്രിയങ്ക ഇൻസ്റ്റാഗ്രാമിൽ പങ്കുവെച്ച വീഡിയോയിലൂടെയാണ് ഒരു ഓട്ടോ ഡ്രൈവറുടെ കരുണയും അതിന് താൻ നൽകിയ മറുപടിയും ലോകത്തെ അറിയിച്ചത്.
യാത്ര തുടങ്ങിയ ഉടനെയായിരുന്നു കനത്ത മഴ പെയ്തത്. വശങ്ങളിൽ മറയില്ലാത്ത ഓട്ടോയായതിനാൽ പ്രിയങ്കയും ഡ്രൈവറും മിനിറ്റുകൾക്കുള്ളിൽ പൂർണ്ണമായും നനഞ്ഞു കുതിർന്നു. താൻ നനയുന്നതിൽ ഡ്രൈവർ അങ്ങേയറ്റം അസ്വസ്ഥനാകുന്നത് പ്രിയങ്ക ശ്രദ്ധിച്ചിരുന്നു. എവിടെയെങ്കിലും ഓട്ടോ നിർത്തിക്കൂടെ എന്ന് ചോദിച്ചപ്പോൾ ഡ്രൈവർ നൽകിയ മറുപടി പ്രിയങ്കയെ അത്ഭുതപ്പെടുത്തി. താൻ എവിടെയെങ്കിലും വണ്ടി നിർത്തിയാൽ അത് യാത്രക്കാരിയുടെ സമയത്തെ ബാധിക്കുമെന്നും അവളുടെ ബുദ്ധിമുട്ട് കരുതിയാണ് നിർത്താതെ പോയതെന്നുമായിരുന്നു ഡ്രൈവറുടെ മറുപടി.
യാത്ര അവസാനിച്ചപ്പോൾ തിരികെ വീട്ടിലേക്ക് പോകാനിരുന്ന ഡ്രൈവറുടെ അവസ്ഥ കണ്ട പ്രിയങ്കയ്ക്ക് വെറുതെയിരിക്കാനായില്ല. നനഞ്ഞു വിറയ്ക്കുന്ന ഡ്രൈവറോട് അല്പനേരം കാത്തുനിൽക്കാൻ ആവശ്യപ്പെട്ട പ്രിയങ്ക, വീട്ടിൽ പോയി ഒരു പുത്തൻ ടി-ഷർട്ടുമായി തിരിച്ചെത്തി അത് അയാൾക്ക് സമ്മാനിച്ചു. ആ നിമിഷം ആ ഡ്രൈവറുടെ മുഖത്തുണ്ടായ പുഞ്ചിരി തനിക്ക് മറക്കാനാവില്ലെന്ന് പ്രിയങ്ക പറയുന്നു. മറ്റുള്ളവരുടെ പ്രശംസയ്ക്ക് വേണ്ടിയല്ല, മറിച്ച് സഹജീവികളുടെ ചെറിയ വിഷമങ്ങൾ തിരിച്ചറിയാനും അവരെ സഹായിക്കാനും നമുക്ക് കഴിയണമെന്ന ഓർമ്മപ്പെടുത്തലായിട്ടാണ് താൻ ഈ വീഡിയോ പങ്കുവെക്കുന്നതെന്നും അവർ കൂട്ടിച്ചേർത്തു. കനത്ത മഴയുടെ തണുപ്പിലും ഈ മനുഷ്യത്വം നിറഞ്ഞ പ്രവർത്തി ബെംഗളൂരുക്കാരുടെ മനസ്സ് നിറയ്ക്കുകയാണ്.
