വാഷിങ്ടൺ: വൈറ്റ്ഹൗസ് പ്രതിനിധികൾക്കായി സംഘടിപ്പിച്ച അത്താഴവിരുന്നിനിടെ വെടിയൊച്ച കേട്ടതിനെത്തുടർന്ന് അമേരിക്കൻ പ്രസിഡന്റ് ഡൊണാൾഡ് ട്രംപിനെ വേദിയിൽ നിന്നും അടിയന്തരമായി ഒഴിപ്പിച്ചു. ശനിയാഴ്ച രാത്രി നടന്ന വിരുന്നിനിടെയാണ് നാടകീയമായ സംഭവങ്ങൾ അരങ്ങേറിയത്. വെടിയൊച്ച കേട്ട ഉടൻ തന്നെ സീക്രട്ട് സർവീസ് ഉദ്യോഗസ്ഥർ പ്രസിഡന്റിനും പ്രഥമവനിത മെലാനിയ ട്രംപിനും ചുറ്റും സുരക്ഷാ വലയം തീർക്കുകയും അവരെ സുരക്ഷിത സ്ഥാനത്തേക്ക് മാറ്റുകയും ചെയ്തു.
മറ്റ് പ്രമുഖ നേതാക്കളും വിരുന്നിൽ പങ്കെടുത്തിരുന്നെങ്കിലും ആർക്കും പരിക്കേറ്റതായി ഇതുവരെ റിപ്പോർട്ടുകളില്ല. വെടിയൊച്ച കേട്ടതോടെ ഉദ്യോഗസ്ഥർ ട്രംപിനെ വളയുന്നതും വേദിയിൽ നിന്ന് വേഗത്തിൽ പുറത്തേക്ക് കൊണ്ടുപോകുന്നതുമായ ദൃശ്യങ്ങൾ ഇതിനോടകം പുറത്തുവന്നിട്ടുണ്ട്. സംഭവത്തെത്തുടർന്ന് പ്രദേശത്ത് കനത്ത സുരക്ഷാ ക്രമീകരണങ്ങളാണ് ഏർപ്പെടുത്തിയിരിക്കുന്നത്.
വെടിവെപ്പിന്റെ ഉറവിടത്തെക്കുറിച്ചോ പ്രതികളെക്കുറിച്ചോ ഉള്ള കൂടുതൽ വിവരങ്ങൾ അധികൃതർ പുറത്തുവിട്ടിട്ടില്ല. അതീവ സുരക്ഷാ മേഖലയിലുണ്ടായ ഈ സംഭവം വലിയ സുരക്ഷാ വീഴ്ചയായാണ് വിലയിരുത്തപ്പെടുന്നത്. ഇതിനെക്കുറിച്ച് വിശദമായ അന്വേഷണം ആരംഭിച്ചതായി സുരക്ഷാ ഏജൻസികൾ വ്യക്തമാക്കി.
