ബെംഗളൂരു : വായ്പയെടുത്തും, സ്വത്തുക്കൾ വിറ്റും, ആഡംബര വിവാഹങ്ങൾ നടത്തുന്നവർക്ക് മുന്നിൽ മാതൃകയായി ഒരു കുടുംബം, ലക്ഷക്കണക്കിന് വരുമാനമുണ്ടായിട്ടും, മകന്റെ വിവാഹം ലളിതമായി നടത്തിയാണ് ഇവർ ശ്രദ്ധയാകർഷിക്കുന്നത്.
ദരിദ്ര കുടുംബങ്ങളിലെ 11 ദമ്പതികളെ വിവാഹം കഴിപ്പിച്ചും രാമു ഒരു മാതൃകയായി. ബെംഗളൂരു റൂറൽ ജില്ലയിലെ ഹൊസക്കോട്ടെ താലൂക്കിലെ കമ്പാലിപുരയിലുള്ള കതേരമ്മ ക്ഷേത്രത്തിൽ, മകന്റെ വിവാഹത്തോടൊപ്പം 11 ദമ്പതികളുടെ വിവാഹവും രാമു ഒരേ വേദിയിൽ നടത്തി.
മകന്റെ വിവാഹച്ചടങ്ങിനുള്ള ചെലവിൽ 11 പെൺകുട്ടികൾക്ക് സാരി, വസ്ത്രങ്ങൾ, സ്വർണ്ണ താലി, 10,000 രൂപ എന്നിവ അദ്ദേഹം നൽകി. കതേരമ്മ ക്ഷേത്രത്തിൽ നടന്ന സമൂഹ വിവാഹത്തിൽ, വേദങ്ങളും മന്ത്രങ്ങളും ചൊല്ലിയാണ് സമൂഹ വിവാഹം നടത്തിയത്.
വിവാഹത്തിനെത്തിയവർക്ക് അദ്ദേഹം മികച്ച ഭക്ഷണം വിളമ്പി. മകന്റെ വിവാഹം ലളിതമാക്കിയതിനും അതേ ചെലവിൽ 11 നവദമ്പതികൾക്ക് വളകൾ നൽകിയതിനും പൊതുജനങ്ങൾ അഭിനന്ദനം അറിയിച്ചു.
