ബെംഗളൂരു: നഗരത്തിൽ ഉള്ളവർക്ക് സൗജന്യ കോവിഡ്-19 പരിശോധനയുമായി ശിവാജി നഗറിലെ സ്വകാര്യ ലാബ്.
സന്നദ്ധസംഘടനയുടെ സഹകരണത്തോടെയാണ് ന്യൂബെർഗ് ആനന്ദ് ഡയഗ്നോസ്റ്റിക്സ് ലാബ് സൗജന്യ പരിശോധന നടത്തുന്നത്.
ഐ.സി.എം.ആർ. അംഗീകരിച്ച നാലുവിധ പരിശോധനകളും ലാബിൽ ലഭിക്കും. കൊറോണ വ്യാപനത്തിനെത്തിരെയുള്ള പോരാട്ടത്തിന്റെ ഭാഗമായാണ് സംവിധാനമൊരുക്കുന്നതെന്ന് ലാബ് അധികൃതർ പറഞ്ഞു.
ന്യൂബർഗിന്റെ രാജ്യത്തെ നാലുലാബുകളിലും പരിശോധനാ സംവിധാനമുണ്ട്. ചെന്നൈ, അഹമ്മദാബാദ്, പുണെ എന്നിവിടങ്ങളിലാണ് മറ്റു ലാബുകൾ പ്രവർത്തിക്കുന്നത്.
ഡോക്ടറുടെ കുറിപ്പും തിരിച്ചറിയൽ രേഖയുമായി എത്തുന്നവർക്കാണ് പരിശോധനനടത്താനുള്ള സൗകര്യമൊരുക്കുന്നത്. സർക്കാർ സംവിധാനങ്ങളും ഐ.സി. എം. ആറും നിർദേശിക്കുന്ന വിധത്തിലാണ് പരിശോധന നടത്തുന്നതെന്നും ന്യൂബർഗ് ആനന്ദ് ലാബ് അറിയിച്ചു.
കൊറോണ വ്യാപനത്തിന്റെ രണ്ടാമത്തെയും മൂന്നാമത്തെയും ഘട്ടത്തിന് ഇടയിലൂടെയാണ് രാജ്യം കടന്നുപോകുന്നതെന്നും കൂടുതൽ വ്യാപനം തടയുന്നതിന് സർക്കാരിനെ സഹായിക്കുകയാണ് ലാബിന്റെ ലക്ഷ്യമെന്നും ചെയർമാൻ ഡോ. ജി.എസ്.കെ. വേലു പറഞ്ഞു.
