ബെംഗളൂരു ∙ കേരളത്തിന്റെ തനത് സൗന്ദര്യക്കാഴ്ചകളുമായി റോയൽ സ്ട്രോക്സ് ചിത്രപ്രദർശനത്തിനു ചിത്രകലാ പരിഷത് ആർട് ഗാലറിയിൽ തുടക്കമായി. ക്ഷേത്രച്ചുമരുകളെ മനോഹരമാക്കുന്ന ചുമര് ചിത്രങ്ങളുമായി കോഴിക്കോട് സ്വദേശി നിബിൻരാജും കേരളീയ കലാരൂപങ്ങളും മനുഷ്യഭാവങ്ങളും വരകളിലാക്കിയ ബെംഗളൂരു മലയാളി അംബിക ജി.നായരുമാണ് പ്രദർശനത്തിൽ പങ്കെടുക്കുന്നത്. ഗുരുവായൂരിലെ ചുമർ ചിത്രകലാ ഇൻസ്റ്റിറ്റ്യൂട്ടിൽനിന്ന് ഡിപ്ലോമ നേടിയ നിബിൻ മാഹി കേരള കലാഗ്രാമത്തിലെ ചിത്രകലാ അധ്യാപകനാണ്.
കേരളത്തിലെ വിവിധ ക്ഷേത്രങ്ങളിൽ നിബിൻ വരച്ച ചുമർ ചിത്രങ്ങൾ ശ്രദ്ധ നേടിയിട്ടുണ്ട്. കേരളത്തിന്റെ പ്രകൃതിസൗന്ദര്യവും കലാരൂപങ്ങളുമാണ് അംബിക വാട്ടർ കളറിലും അക്രിലിക്കിലുമായി വരച്ചിരിക്കുന്നത്. കോഴിക്കോട് സ്വദേശിനിയായ അംബിക വിവാഹശേഷം വസുന്ധരലേഔട്ടിലാണ് താമസം. ചിത്രകലാപരിഷത്തിൽനിന്നു പരിശീലനം നേടിയ അംബിക ചിത്രരചനാ ക്ലാസുകൾക്കു നേതൃത്വം നൽകുന്നുണ്ട്. പ്രദർശനത്തിന്റെ ഉദ്ഘാടനം ചിത്രകാരൻ പി.വി.ഭാസ്കരൻ ആചാരി നിർവഹിച്ചു. രാവിലെ 10.30 മുതൽ വൈകിട്ട് ഏഴു വരെയുള്ള പ്രദർശനം 22നു സമാപിക്കും.
