നായയുടെ മൂക്കും എ.ഐ. സാങ്കേതികവിദ്യയും: മനുഷ്യന്റെ ശ്വാസത്തിലൂടെ ക്യാൻസർ കണ്ടെത്താൻ ബെംഗളൂരു സ്റ്റാർട്ടപ്പ്

ബെംഗളൂരു: ശ്വാസതരംഗങ്ങളിൽ നിന്ന് രോഗലക്ഷണങ്ങൾ തിരിച്ചറിഞ്ഞ് കാൻസർ നിർണ്ണയം സാധ്യമാക്കുന്ന വേറിട്ട പരീക്ഷണവുമായി ബെംഗളൂരു അധിഷ്ഠിത സ്റ്റാർട്ടപ്പായ ‘ഡോഗ്നോസിസ്’. മനുഷ്യന്റെ ശ്വാസത്തിലെ സങ്കീർണ്ണമായ രാസമാറ്റങ്ങൾ നായകളുടെ ഘ്രാണശക്തി ഉപയോഗിച്ച് തിരിച്ചറിയുകയും, ഈ പ്രതികരണങ്ങളെ കൃത്രിമബുദ്ധി (എഐ) സാങ്കേതികവിദ്യയിലൂടെ വിശകലനം ചെയ്ത് കൃത്യമായ ഡാറ്റയാക്കി മാറ്റുകയുമാണ് ഈ പദ്ധതിയിലൂടെ ചെയ്യുന്നത്. സൂചികളോ സ്കാനിംഗോ ഇല്ലാതെ, ലളിതമായ ശ്വാസപരിശോധനയിലൂടെ രോഗ സാധ്യത മുൻകൂട്ടി കണ്ടെത്താൻ കഴിയുമെന്നതാണ് ഇതിന്റെ പ്രധാന പ്രത്യേകത.

ശ്വാസമാസ്കും അതിശയകരമായ ഘ്രാണശക്തിയും

പരിശോധനയ്ക്ക് വിധേയനാകുന്ന വ്യക്തി പ്രത്യേകമായി രൂപകൽപ്പന ചെയ്ത മാസ്കിലേക്ക് ഏകദേശം 10 മിനിറ്റ് സമയം ശ്വാസമെടുക്കുന്നു. ശ്വാസത്തിലൂടെ പുറത്തുവരുന്ന വോളറ്റൈൽ ഓർഗാനിക് സംയുക്തങ്ങളെ (VOCs) ഈ മാസ്ക് ശേഖരിക്കും. തുടർന്ന് സീൽ ചെയ്ത മാസ്ക് ലാബിലെത്തിച്ച്, പ്രത്യേക പരിശീലനം ലഭിച്ച നായകൾക്ക് മുന്നിൽ വച്ചുനൽകുന്നു. പരിശീലനം ലഭിച്ച നായകൾ മാസ്കിലെ രാസസാന്നിധ്യം മണത്തറിഞ്ഞ് നൽകുന്ന പ്രതികരണങ്ങൾ സെൻസറുകൾ വഴി റെക്കോർഡ് ചെയ്താണ് എഐ സിസ്റ്റത്തിലേക്ക് നൽകുന്നത്.

സാങ്കേതികവിദ്യയും ഡാറ്റാ ശേഖരണവും

നായകളുടെ പെരുമാറ്റത്തിലെ സ്വാഭാവിക പ്രതികരണങ്ങളെ കൃത്യമായ ശാസ്ത്രീയ ഡാറ്റയാക്കി മാറ്റുകയാണ് ഈ സാങ്കേതികവിദ്യ ചെയ്യുന്നത്. പ്രത്യേക പ്ലാറ്റ്‌ഫോമുകളിൽ വച്ചാണ് പരിശോധന നടത്തുന്നത്. സാമ്പിളുകൾ മണക്കുമ്പോൾ നായകൾ കാണിക്കുന്ന വ്യത്യസ്ത തരം പ്രതികരണങ്ങൾ സെൻസറുകൾ കൃത്യമായി രേഖപ്പെടുത്തുന്നു. ദിവസവും 30 മുതൽ 45 മിനിറ്റ് വരെ മാത്രമാണ് നായകളെ ഇതിനായി ഉപയോഗിക്കുന്നത്. ബെംഗളൂരുവിലെയും ഹുബ്ബള്ളിയിലെയും ആറോളം പ്രമുഖ ആശുപത്രികളുടെ സഹകരണത്തോടെയാണ് നിലവിൽ ഈ പഠനം മുന്നേറുന്നത്.

തുടക്കത്തിലെ വിജയവും ഭാവി പ്രതീക്ഷകളും

രണ്ടാം ഘട്ട പരീക്ഷണങ്ങളുടെ ഭാഗമായി 1,500-ലധികം ആളുകളിൽ നടത്തിയ പരിശോധനയിൽ ഏഴ് പ്രമുഖ കാൻസർ തരങ്ങൾ 90 ശതമാനത്തോളം കൃത്യതയോടെ തിരിച്ചറിയാൻ സാധിച്ചതായി ഡോഗ്നോസിസ് വ്യക്തമാക്കുന്നു. എന്നാൽ, വിശാലമായ ജനവിഭാഗങ്ങളിൽ ഇത് പ്രയോഗിക്കുന്നതിന് മുൻപായി കൂടുതൽ വിപുലമായ ക്ലിനിക്കൽ ട്രയലുകൾ ആവശ്യമാണെന്നാണ് വിദഗ്ധരുടെ അഭിപ്രായം. പ്രാഥമിക ഘട്ടത്തിൽ തന്നെ കാൻസർ ലക്ഷണങ്ങൾ കണ്ടെത്താൻ ഈ ലളിതമായ ശ്വാസപരിശോധനയിലൂടെ സാധിച്ചാൽ, അത് ആരോഗ്യമേഖലയിൽ വലിയൊരു വഴിത്തിരിവാകും.

ബെംഗളൂരുവാർത്തയുടെ ആൻഡ്രോയ്ഡ് ആപ്ലിക്കേഷൻ ഇപ്പോൾ ഗൂഗിൾ പ്ലേസ്റ്റോറിൽ ലഭ്യമാണ്, പോർട്ടലിൽ പ്രസിദ്ധീകരിക്കുന്ന വാർത്തകൾ വേഗത്തിൽ അറിയാൻ മൊബൈൽ ആപ്പ് ഇൻസ്റ്റാൾ ചെയ്യുക. If you cannot read Malayalam,Download BengaluruVartha Android app from Google play store and Click On the News Reader Button. [masterslider id="10"]