ബെംഗളൂരു: നഗരത്തിലെ പ്രധാന പച്ചക്കറി-പൂവ് വിപണിയായ കെ.ആർ. മാർക്കറ്റിൽ പ്രവേശിക്കുന്ന ചരക്കുവാഹനങ്ങൾക്ക് 350 രൂപ വരെ പ്രവേശന ഫീസ് ഈടാക്കാൻ നിർദ്ദേശം. സ്മാർട്ട് ഗേറ്റും ഡിജിറ്റൽ ഫീസ് ശേഖരണ സംവിധാനവും നടപ്പിലാക്കുന്നതിന്റെ ഭാഗമായി ബെംഗളൂരു സെൻട്രൽ സിറ്റി കോർപ്പറേഷനാണ് പുതിയ നിരക്കുകൾ നിർദ്ദേശിച്ചിരിക്കുന്നത്.
പുതിയ നിരക്കുകൾ പ്രകാരം ആറോ അതിലധികമോ ടയറുകളുള്ള ട്രക്കുകൾക്കും വലിയ വാഹനങ്ങൾക്കും ഒരു തവണത്തെ പ്രവേശനത്തിന് 350 രൂപ നൽകണം. നാല് ചക്രമുള്ള ചരക്കുവാഹനങ്ങൾക്ക് 100 രൂപയും ത്രീ വീലറുകൾക്ക് 75 രൂപയുമാണ് ഫീസ്. മാർക്കറ്റിലെ പ്രവേശനവും പുറത്തുപോകലും ആധുനികീകരിക്കുന്നതിനായി 10 വർഷത്തെ കരാർ അടിസ്ഥാനത്തിലാണ് ഈ പദ്ധതി തയ്യാറാക്കിയിരിക്കുന്നത്. എന്നാൽ ഇത് എന്ന് മുതൽ നിലവിൽ വരുമെന്ന കാര്യം തീരുമാനിച്ചിട്ടില്ല.
വാഹനങ്ങളുടെ പ്രവേശന ഫീസിന് പുറമെ, മാർക്കറ്റിലേക്ക് കൊണ്ടുവരുന്ന സാധനങ്ങൾക്കും വ്യാപാരികൾ പ്രത്യേക ഫീസ് നൽകേണ്ടിവരും. പഴങ്ങൾ, പച്ചക്കറികൾ, പൂക്കൾ, ഇലക്കറികൾ, നാളികേരം എന്നിവയ്ക്ക് ചാക്ക് ഒന്നിനോ കെട്ട് ഒന്നിനോ 5 രൂപ വീതം ഈടാക്കും. കോഴി, മുട്ട, ഇറച്ചി, മീൻ വിഭവങ്ങൾ എന്നിവയ്ക്ക് ബോക്സ് ഒന്നിനോ ട്രേ ഒന്നിനോ 10 രൂപ വീതമായിരിക്കും നിരക്ക്.
പ്രവേശനം ഡിജിറ്റലാക്കുന്നതിലൂടെ മാർക്കറ്റിലേക്കുള്ള ചരക്കുനീക്കം കൃത്യമായി നിരീക്ഷിക്കാനും കോർപ്പറേഷന്റെ വരുമാന ചോർച്ച തടയാനും സാധിക്കുമെന്നാണ് അധികൃതരുടെ വിലയിരുത്തൽ. യു.പി.ഐ, ക്യൂ.ആർ കോഡ്, കാർഡുകൾ, പോസ് മെഷീനുകൾ, ഫാസ്ടാഗ് എന്നിവ വഴി പണമടയ്ക്കാനും ഇലക്ട്രോണിക് രസീതുകൾ ലഭ്യമാക്കാനുമാണ് പദ്ധതിയിടുന്നത്.
അതേസമയം, പ്രവേശന ഫീസ് വർദ്ധനവിനെതിരെ മാർക്കറ്റിലെ വ്യാപാരികൾ പ്രതിഷേധവുമായി രംഗത്തെത്തിയിട്ടുണ്ട്. ഈ തീരുമാനത്തെക്കുറിച്ച് അധികൃതരിൽ നിന്ന് ഔദ്യോഗികമായി ഒരു അറിയിപ്പും ലഭിച്ചിട്ടില്ലെന്ന് വ്യാപാരികൾ വ്യക്തമാക്കുന്നു. ആയിരക്കണക്കിന് ആളുകളുടെ ഉപജീവനമാർഗ്ഗത്തെ ബാധിക്കുന്ന ഇത്തരം തീരുമാനങ്ങൾ തങ്ങളുമായി ആലോചിക്കാതെ ഏകപക്ഷീയമായി നടപ്പിലാക്കരുതെന്ന് ഇവിടുത്തെ മൊത്തവ്യാപാരികൾ ആവശ്യപ്പെട്ടു.
പുതിയ തീരുമാനം വ്യാപാരികളുടെയും കടത്തുകാരുടെയും പ്രവർത്തനച്ചെലവ് കൂട്ടുമെന്ന ആശങ്കയും ശക്തമാണ്. ഫീസ് വർദ്ധനവ് 2000-ത്തിലധികം വരുന്ന കച്ചവടക്കാരെ മാത്രമല്ല, കർഷകരെയും പൊതുജനങ്ങളെയും ഒരുപോലെ ബാധിക്കുമെന്ന് കെ.ആർ. മാർക്കറ്റ് ഫ്ലവർ മെർച്ചന്റ്സ് അസോസിയേഷൻ പ്രസിഡന്റ് ജി.എം. ദിവാകർ പറഞ്ഞു. പൊതുജനങ്ങൾക്കുള്ള മാർക്കറ്റിനെ വരുമാനമുണ്ടാക്കാനുള്ള മാർഗ്ഗമായി സർക്കാർ കാണരുതെന്നും അദ്ദേഹം കൂട്ടിച്ചേർത്തു. വരും ദിവസങ്ങളിൽ ഈ അധികച്ചെലവ് സാധനങ്ങളുടെ വിലക്കയറ്റത്തിന് കാരണമായേക്കും.
പദ്ധതി നടപ്പിലാക്കുന്നതിനുള്ള ടെൻഡർ വിളിച്ചിട്ടുണ്ടെന്നും എന്നാൽ പുതിയ നിയമങ്ങൾ പ്രാബല്യത്തിൽ വരുന്ന തീയതി ഇതുവരെ തീരുമാനിച്ചിട്ടില്ലെന്നും ഗ്രേറ്റർ ബെംഗളൂരു അതോറിറ്റിയിലെ (GBA) മുതിർന്ന ഉദ്യോഗസ്ഥൻ വ്യക്തമാക്കി.
