ബെംഗളൂരു (ഓഗസ്റ്റ് 31): നഗരത്തിൽ അനധികൃതമായി താമസിച്ചുവന്ന 31 ബംഗ്ലാദേശ് പൗരന്മാരെ പോലീസ് സംഘം തിരിച്ചറിഞ്ഞു. ‘ഓപ്പറേഷൻ മുക്ത്’ എന്ന പേരിൽ ബെംഗളൂരു പോലീസ് നടപ്പിലാക്കിയ പ്രത്യേക തിരച്ചിൽ ദൗത്യത്തിലാണ് ഇവരെ പിടികൂടിയത്. പിടിയിലായവരെ സ്വന്തം രാജ്യത്തേക്ക് നാടുകടത്തുന്നതിനുള്ള നടപടികൾ അധികൃതർ ആരംഭിച്ചു.
ഇലക്ട്രോണിക് സിറ്റിയിലെ 10 പോലീസ് സ്റ്റേഷൻ പരിധികളിലായി ആയിരത്തിലധികം ആളുകളുടെ തിരിച്ചറിയൽ രേഖകൾ പോലീസ് സംഘം വിശദമായി പരിശോധിച്ചിരുന്നു. ഈ പരിശോധനയിലാണ് ആവശ്യമായ രേഖകളില്ലാതെ ഇന്ത്യയിൽ കഴിഞ്ഞിരുന്ന ബംഗ്ലാദേശ് സ്വദേശികളെ തിരിച്ചറിഞ്ഞത്. ഇവരെ പശ്ചിമ ബംഗാളിലെ മാൾഡയിലേക്ക് ട്രെയിൻ മാർഗ്ഗം എത്തിക്കുന്നതിനുള്ള നടപടികൾ ആരംഭിച്ചു കഴിഞ്ഞു. ബെംഗളൂരുവിൽ നിന്നുള്ള 20 അംഗ പോലീസ് സംഘമാണ് ഇവരെ അനുഗമിക്കുന്നത്.
മാൾഡയിലെത്തിക്കുന്ന ഇവരെ ബോർഡർ സെക്യൂരിറ്റി ഫോഴ്സ് (ബി.എസ്.എഫ്) ഉദ്യോഗസ്ഥർക്ക് കൈമാറും. തുടർന്ന് ബി.എസ്.എഫ് നടപടിക്രമങ്ങൾ പൂർത്തിയാക്കി ഇവരെ ബംഗ്ലാദേശിലേക്ക് തിരിച്ചയക്കും. ബെംഗളൂരുവിൽ ദീർഘകാലമായി നിയമവിരുദ്ധമായി തുടരുന്ന വിദേശികളെ കണ്ടെത്താനുള്ള നീക്കങ്ങൾ ഘട്ടംഘട്ടമായി പുരോഗമിക്കുകയാണെന്ന് പോലീസ് അറിയിച്ചു. കഴിഞ്ഞ ഒരു മാസമായി തുടരുന്ന ഈ ദൗത്യം വരും ദിവസങ്ങളിലും ശക്തമായി തുടരുമെന്ന് അധികൃതർ വ്യക്തമാക്കി.
ബെംഗളൂരുവാർത്തയുടെ ആൻഡ്രോയ്ഡ് ആപ്ലിക്കേഷൻ ഇപ്പോൾ ഗൂഗിൾ പ്ലേസ്റ്റോറിൽ ലഭ്യമാണ്, പോർട്ടലിൽ പ്രസിദ്ധീകരിക്കുന്ന വാർത്തകൾ വേഗത്തിൽ അറിയാൻ മൊബൈൽ ആപ്പ് ഇൻസ്റ്റാൾ ചെയ്യുക. If you cannot read Malayalam,Download BengaluruVartha Android app from Google play store and Click On the News Reader Button. [masterslider id="10"]
