ചെന്നൈ: തമിഴ്നാട് മുഖ്യമന്ത്രി സി. ജോസഫ് വിജയ്യുടെ ഓഫീസർ ഓൺ സ്പെഷ്യൽ ഡ്യൂട്ടിയായി (OSD) പ്രശസ്ത ജ്യോതിഷിയും ടി.വി.കെ വക്താവുമായ റിക്കി രാധൻ പണ്ഡിറ്റിനെ നിയമിച്ചു. ഇതുസംബന്ധിച്ച ഔദ്യോഗിക ഉത്തരവ് സർക്കാർ പുറത്തിറക്കി. ചുമതലയേൽക്കുന്ന തീയതി മുതൽ പ്രാബല്യത്തോടെയാണ് നിയമനമെന്നും ഇതിന്റെ നിബന്ധനകളും വ്യവസ്ഥകളും പ്രത്യേകം അറിയിക്കുമെന്നും പ്രിൻസിപ്പൽ സെക്രട്ടറി റീത്ത ഹരീഷ് തക്കർ ഒപ്പിട്ട ഉത്തരവിൽ വ്യക്തമാക്കുന്നു.
വിജയ്യുടെ വ്യക്തിഗത ജ്യോതിഷി കൂടിയായ റിക്കി രാധൻ പണ്ഡിറ്റ്, 2026-ലെ നിയമസഭാ തിരഞ്ഞെടുപ്പിൽ ടി.വി.കെ മികച്ച വിജയം നേടുമെന്ന് നേരത്തെ പ്രവചിച്ചിരുന്നു. തിരഞ്ഞെടുപ്പ് വിജയത്തിന് പിന്നാലെ അദ്ദേഹം വിജയ്യുടെ വസതിയിലെത്തി കൂടിക്കാഴ്ച നടത്തുകയും ചെയ്തിരുന്നു. പാർട്ടി വക്താക്കൾ മാധ്യമങ്ങളെ കാണുന്ന വേളകളിലെല്ലാം സ്ഥിരസാന്നിധ്യമായിരുന്ന ഇദ്ദേഹം, ജ്യോതിഷവും രാഷ്ട്രീയവും ഇടകലർത്തിയുള്ള പ്രസ്താവനകളിലൂടെ തമിഴ് രാഷ്ട്രീയത്തിൽ വലിയ ശ്രദ്ധ നേടിയിട്ടുള്ള വ്യക്തിയാണ്.
ആരാണ് റിക്കി രാധൻ പണ്ഡിറ്റ്?
വേദ ജ്യോതിഷം, സംഖ്യാശാസ്ത്രം, മെഡിറ്റേഷൻ എന്നീ മേഖലകളിൽ നാല് പതിറ്റാണ്ടോളമായി പ്രവർത്തിക്കുന്ന റിക്കി രാധൻ പണ്ഡിറ്റ് ഇന്ത്യയിലെ തന്നെ പ്രശസ്തനായ സെലിബ്രിറ്റി ജ്യോതിഷിയാണ്. ബി.ജെ.പി, കോൺഗ്രസ്, ഡി.എം.കെ, എ.ഐ.എ.ഡി.എം.കെ തുടങ്ങി വിവിധ രാഷ്ട്രീയ പാർട്ടികളുടെ ഭാവി പ്രവചിച്ചിട്ടുള്ള ഇദ്ദേഹത്തിന് മുൻ മുഖ്യമന്ത്രി ജെ. ജയലളിതയുമായും അടുത്ത ബന്ധമുണ്ടായിരുന്നു.
പണ്ഡിറ്റ് വെട്രിവേൽ എന്ന പേരിൽ അറിയപ്പെട്ടിരുന്ന അദ്ദേഹം 2008-ൽ ഡൽഹിയിലേക്ക് താമസം മാറിയ ശേഷമാണ് റിക്കി രാധൻ പണ്ഡിറ്റ് എന്ന് പേര് മാറ്റിയത്. വിജയ് രാഷ്ട്രീയ പ്രവേശനം നടത്തുന്നതിന് വർഷങ്ങൾക്ക് മുമ്പ് തന്നെ ഇരുവരും തമ്മിൽ ആത്മബന്ധമുണ്ട്. വിജയ്യുടെ ജാതകത്തിന് ‘സുനാമി പോലെ’ ശക്തിയുണ്ടെന്നും അത്ഭുതകരമായ രാഷ്ട്രീയ വിജയം അദ്ദേഹം നേടുമെന്നും റിക്കി രാധൻ പണ്ഡിറ്റ് പ്രവചിച്ചിരുന്നു. രാഷ്ട്രീയ വൃത്തങ്ങളിൽ ഇതിനോടകം തന്നെ ചർച്ചയായ ഈ നിയമനം തമിഴ് രാഷ്ട്രീയത്തിലെ ജ്യോതിഷ സ്വാധീനത്തെ വീണ്ടും ചർച്ചകളിലേക്ക് എത്തിച്ചിരിക്കുകയാണ്.
