ബെംഗളൂരു: നഗരത്തിലെ പ്രമുഖ അപ്പാർട്ട്മെന്റ് സമുച്ചയമായ മന്ത്രി സെറിനിറ്റിക്ക് (Mantri Serenity) നോട്ടീസ് അയച്ച് ബെംഗളൂരു ഇലക്ട്രിസിറ്റി സപ്ലൈ കമ്പനി ലിമിറ്റഡ് (Bescom). അപ്പാർട്ട്മെന്റിൽ പ്രവർത്തിക്കുന്ന 30 ലിഫ്റ്റുകൾ മതിയായ അനുമതിയില്ലാതെയാണ് പ്രവർത്തിക്കുന്നതെന്ന് ചൂണ്ടിക്കാട്ടിയാണ് നടപടി.
ഇലക്ട്രിക്കൽ ഇൻസ്പെക്ടറേറ്റിൽ നിന്ന് ആവശ്യമായ അനുമതി വാങ്ങാതെയാണ് കനകപുര റോഡിലെ ദൊഡ്ഡക്കല്ലസന്ദ്രയിലുള്ള ഈ അപ്പാർട്ട്മെന്റിൽ ലിഫ്റ്റുകൾ പ്രവർത്തിപ്പിച്ചിരുന്നത്. ഫെബ്രുവരി 11-നാണ് ബെസ്കോം ഇത് സംബന്ധിച്ച നോട്ടീസ് ഉടമയ്ക്ക് നൽകിയത്. 15 ദിവസത്തിനകം ലിഫ്റ്റുകൾ പ്രവർത്തിപ്പിക്കുന്നതിനായുള്ള ഔദ്യോഗിക അനുമതി പത്രം ഹാജരാക്കണം. പരാജയപ്പെട്ടാൽ ലിഫ്റ്റുകളുടെ പ്രവർത്തനവും അപ്പാർട്ട്മെന്റിലെ വൈദ്യുതി വിതരണവും മുൻകൂട്ടി അറിയിക്കാതെ തന്നെ വിച്ഛേദിക്കുമെന്ന് അധികൃതർ വ്യക്തമാക്കി.
2015-ലെ കർണാടക ലിഫ്റ്റ്, എസ്കലേറ്റർ, പാസഞ്ചർ കൺവെയേഴ്സ് നിയമപ്രകാരം, ഏത് ലിഫ്റ്റും കമ്മീഷൻ ചെയ്യുന്നതിനും പ്രവർത്തിപ്പിക്കുന്നതിനും മുൻപായി ബന്ധപ്പെട്ട വകുപ്പുകളിൽ നിന്ന് സുരക്ഷാ പരിശോധന പൂർത്തിയാക്കി അനുമതി വാങ്ങിയിരിക്കണം. നിയമവിരുദ്ധമായി പ്രവർത്തിക്കുന്ന ലിഫ്റ്റുകൾ കണ്ടെത്തുകയോ സുരക്ഷാ മാനദണ്ഡങ്ങൾ പാലിക്കാതിരിക്കുകയോ ചെയ്താൽ കർശന നിയമനടപടികൾ സ്വീകരിക്കാൻ ബെസ്കോമിന് അധികാരമുണ്ട്.
മുൻപ് സമാനമായ രീതിയിൽ വൈദ്യുതി ബില്ലുകൾ അടയ്ക്കാത്തതിനെ തുടർന്ന് പ്രോപ്കെയർ റിയൽ എസ്റ്റേറ്റ് മാനേജ്മെന്റ് പ്രൈവറ്റ് ലിമിറ്റഡ് കമ്പനിക്കെതിരെയും ബെസ്കോം നടപടിയെടുത്തിരുന്നു.
ബെംഗളൂരുവാർത്തയുടെ ആൻഡ്രോയ്ഡ് ആപ്ലിക്കേഷൻ ഇപ്പോൾ ഗൂഗിൾ പ്ലേസ്റ്റോറിൽ ലഭ്യമാണ്, പോർട്ടലിൽ പ്രസിദ്ധീകരിക്കുന്ന വാർത്തകൾ വേഗത്തിൽ അറിയാൻ മൊബൈൽ ആപ്പ് ഇൻസ്റ്റാൾ ചെയ്യുക. If you cannot read Malayalam,Download BengaluruVartha Android app from Google play store and Click On the News Reader Button. [masterslider id="10"]
