ബെംഗളൂരു: കർണാടക സെക്കൻഡറി എജ്യുക്കേഷൻ എക്സാമിനേഷൻ ബോർഡ് (കെഎസ്ഇഇബി) എസ്എസ്എൽസി അല്ലെങ്കിൽ പത്താം ക്ലാസ് അവസാന പരീക്ഷകൾ ഇന്ന് (മാർച്ച് 28 മുതൽ നടത്തും. തുടർന്ന് പരീക്ഷകൾ ഏപ്രിൽ 11ന് അവസാനിക്കും.
ഈ വർഷം കർണാടകയിലെ 15,387 സ്കൂളുകളിൽ നിന്നായി 8,73,846 ഉദ്യോഗാർത്ഥികളാണ് എസ്എസ്എൽസി പരീക്ഷ എഴുതുന്നത്. ഇതിൽ നാല് ട്രാൻസ്ജെൻഡർ വിദ്യാർത്ഥികളും 4,52,732 പുരുഷന്മാരും 4,21,110 സ്ത്രീകളും ഉൾപ്പെടുന്നു.
ആദ്യ ദിവസം വിദ്യാർത്ഥികൾ ഒന്നാം ഭാഷാ പരീക്ഷയും അവസാന ദിവസം സയൻസ്, പൊളിറ്റിക്കൽ സയൻസ്, കർണാടക/ ഹിന്ദുസ്ഥാനി സംഗീത പരീക്ഷകളുമാണ് എഴുതുന്നത്. കൂടാതെ എസ്എസ്എൽസി പരീക്ഷയെഴുതുന്ന വിദ്യാർഥികൾക്ക് യൂണിഫോം നിർബന്ധമാക്കി കർണാടക സർക്കാർ അടുത്തിടെ സർക്കുലർ പുറത്തിറക്കിയട്ടുണ്ട്.
ചോദ്യപേപ്പറുകൾ കൃത്യസമയത്ത് കേന്ദ്രങ്ങളിലെത്തുന്നുവെന്ന് ഉറപ്പാക്കാൻ ഡെപ്യൂട്ടി കമ്മീഷണർ എം കുർമ റാവു ഉദ്യോഗസ്ഥർക്ക് നിർദ്ദേശം നൽകി. കൂടാതെ പരീക്ഷാ കേന്ദ്രങ്ങളുടെ 200 മീറ്റർ ചുറ്റളവിൽ ഡിസി നിരോധനാജ്ഞയും ഏർപ്പെടുത്തിയിട്ടുണ്ട്
നിർദേശങ്ങൾ
- പരീക്ഷ ദിവസങ്ങളിൽ വിദ്യാർത്ഥികൾ പാലിക്കേണ്ട പരീക്ഷാ ദിന നിർദ്ദേശങ്ങളും കോവിഡ് എസ്ഒപികളും KSEEB പുറത്തിറക്കിയിട്ടുണ്ട്.
- പരീക്ഷാ കേന്ദ്രങ്ങളിൽ സിസിടിവി ക്യാമറകൾ ഘടിപ്പിച്ചിട്ടുണ്ട്.
- വിദ്യാർത്ഥികൾക്ക് കർണാടക എസ്എസ്എൽസി അഡ്മിറ്റ് കാർഡുകൾ ബോർഡ് വെബ്സൈറ്റായ sslc.karnataka.gov.in ൽ നിന്ന് ഡൗൺലോഡ് ചെയ്യാം.
- എല്ലാ പരീക്ഷാ ദിവസങ്ങളിലും, പരീക്ഷാ വേദിക്കുള്ളിൽ പ്രവേശനം നേടുന്നതിന് അവർ അഡ്മിറ്റ് കാർഡിന്റെ അച്ചടിച്ച പകർപ്പ് കൊണ്ടുവരേണ്ടതുണ്ട്.
- പൊരുത്തക്കേടുകൾ ഉണ്ടാകാതിരിക്കാൻ വിദ്യാർത്ഥികൾ SOP-കളിലും അഡ്മിറ്റ് കാർഡുകളിലും പറഞ്ഞിരിക്കുന്ന എല്ലാ നിർദ്ദേശങ്ങളും പാലിക്കണം.
- അധികൃതർ നിർദേശിക്കുന്ന ഡ്രസ് കോഡ് പാലിക്കുകയും അനുവദനീയമായ സാധനങ്ങൾ മാത്രം പരീക്ഷാ വേദിയിൽ കൊണ്ടുവരികയും ചെയ്യണം.
- സർക്കാർ സ്കൂളുകളിലെ വിദ്യാർഥികൾ സംസ്ഥാന സർക്കാർ നിർദേശിക്കുന്ന യൂണിഫോം ധരിക്കണമെന്നും സ്വകാര്യ (എയ്ഡഡ്, അൺ എയ്ഡഡ്) സ്കൂളുകളിൽ വിദ്യാർഥികൾ അതത് സ്കൂളുകൾ നിർദേശിക്കുന്ന യൂണിഫോം ധരിക്കണമെന്നും സർക്കുലറിൽ പറയുന്നു.
- സ്കൂളിന്റെ 200 മീറ്റർ ചുറ്റളവിൽ പരീക്ഷ പൂർത്തിയാകുന്നതുവരെ ഫോട്ടോകോപ്പി ചെയ്യുന്ന കടകളെല്ലാം അടഞ്ഞുകിടക്കും.
- പരീക്ഷാ കേന്ദ്രങ്ങൾക്കുള്ളിൽ മൊബൈൽ ഫോൺ ഉപയോഗിക്കുന്നത് നിരോധിച്ചിട്ടുണ്ട്.
